इफिसियों 5 - गददीप्रेम मन्ज चला 1 तुहै प्रमात्मैं रै प्यारे बच्चै हिन ठेरैतांये तैस सांईयै बणनै री कोशिश करा। 2 अप्पू मन्ज प्रेम रखा, जिआं कि मसीह भी तूसु सितै प्रेम करू। तिनी असु सोगी प्रेम करू अतै अपणै आपा जो सुखदायक खुशबु सांईयै प्रमात्मैं अगो बलिदान करी दिता। 3 अतै जिआं कि पवित्र मणु योग्य हिन ता तूसु मन्ज ना व्यभिचार अतै ना कसी किस्मां रा अशुद्ध कम या लोभ-लालच री चर्चा तक ना भोआ। 4 ना निर्लजलता, ना मूढ़ता री गप्प, ना ठट्ठै री, क्ओकि ऐह गल्ला शोभा ना दिन्दी हिन बल्की प्रमात्मैं जो धन्यवाद ही दितिआ गच्छा। 5 क्ओकि तुहै जाणदै हिन कि कसी व्यभिचारी, अशुद्ध मणु, लोभी मणु, जैडा कि मूर्ति पूजणै रै बराबर हा मसीह अतै प्रमात्मैं रै राज्य रै भागीदार ना हिन। 6 तिन्या मणु रै द्धारा धोखै मन्ज मत इन्दै जैड़ै इन्या पापा जो करनै तांयै बहाना बणान्दै हिन, क्ओकि प्रमात्मैं रा क्रोध आज्ञा ना मनणै बाळै पुर भड़कदा हा। 7 ठेरैतांये तुहै ऐसै मणु सोगी सहभागी मत भोआ। ज्योती री औलाद बणा 8 क्ओकि तुहै ता पैहलै नैहरै मन्ज थियै पर अबै प्रभु री ज्योती मन्ज हिन, ता ज्योती री औलादा सांईयै चला। 9 कजो कि ज्योती रा फळ सबी किस्मां री भलाई, धार्मिकता अतै सच्चाई हा। 10 अतै ऐह परखा कि प्रभु जो कै खरा लगदा हा। 11 अतै नैहरै रै निष्फल कमां मन्ज सहभागी मत भोआ बल्की तंयारा खुलासा करा। 12 क्ओकि बुरै मणु री गुप्त कमां री चर्चा भी लज्जा री गप्प हा। 13 जैहणै सब चिजा जो ज्योती मन्ज बाहर अणया गान्दा हा ता तंयारा सही स्वभाव प्रकट भुन्दा हा। 14 ठेरी व्जहा सितै मणु बल्दै हिन कि, “हे सूणै बाळैआ जागी भो अतै मरूरै थऊँ जी उठ, ता मसीह री ज्योती तिजो पुर चमकणी हा।” 15 ऐत तांई धैना सितै हैरा, कि तुहै कस तरीकै री जिन्दगी जिन्दै हिन। मूर्खा सांईयै जिन्दगी मत जिय्आ पर बुद्धिमान सांईयै जिन्दगी जिय्आ। 16 भलाई करनै तांयै हरेक मौके का इस्तेमाल करा, क्ओकि दिन बुरै हिन। 17 ऐत तांई निर्बुद्धि मत बणा, पर समझणै री कोशिश करा कि प्रभु तूसु थऊँ कै चाहन्दा हा? 18 अतै शराब रै मतवाळै मत बणा कजो कि ऐतिओ पी करी लुचपन भुन्दा, पर पवित्र आत्मा मन्ज परिपूर्ण भुन्दै गच्छा। 19 जैहणै तुहै इकट्ठै भुन्दै हिन अप्पू मन्ज भजन अतै स्तुतिगान अतै आत्मिक गीत गाऊ करा अतै अपणै-अपणै मनां मन्ज प्रभु रा किर्तन करदै रेय्आ। 20 अतै हमेशा सबी गल्ला तांई इन्दै प्रभु यीशु मसीह रै नां मन्ज पिता प्रमात्मैं रा धन्यवाद करदै रेय्आ। 21 अतै मसीह रै प्रति आदर री वजह थऊँ अक्की दुऐ रै अधीन मन्ज रैऊ करा। पति अतै पत्नी 22 हे घरावाळिओ, अपणै-अपणै घरवाळै रै वशा मन्ज इआं रेय्आ जिआं कि प्रभु रै। 23 क्ओकि घरावाळा घरावाळी रा सिर हा जिआं कि मसीह यीशु कलीसिया रा सिर हा अतै अप्पू ही देह अर्थात कलीसिया रा उद्धारकर्ता हा। 24 जिआं कलीसिया मसीह रै वशा मन्ज हा तियां ही घरावाळी भी हर गल्ला मन्ज अपणै घरवाळै रै अधीन मन्ज रैहन। 25 हे घरावाळेओ, अपणी-अपणी घरावाळी सितै प्यार करा जिआं कि मसीह यीशु भी कलीसिया सितै प्यार करीके अपणै आपा जो कलीसिया तांई दी दिता। 26 ताकि मसीह कलीसिया जो सुसमाचार रै द्धारा पाप थऊँ शुद्ध करी सका, जियां अहै पाणी रै स्नान सितै अपणै गन्दै शरीरा जो शुद्व करदै हिन। 27 अतै मसीह तैहा जो अक्क तेजोमय कलीसिया बणाई करी अप्पू बल्लै खरेड़ा, जैत मन्ज ना कलंक, ना झुर्री, ना कोई ईन्नी चिज भोआ, बल्की पवित्र अतै निर्दोष भोआ। 28 ऐस तरीकै घरावाळा भी अपणी घरावाळी सितै अपणै जिस्मां सांईं प्यार करा। जैडा अपणी घरावाळी सितै प्यार रखदा, सो अपणै आपा सितै प्यार रखदा। 29 क्ओकि कोई भी कदी अपणै जिस्मां सितै बैर ना रखदा बल्की तठेरा पालन-पोषण करदा जिआं कि मसीह कलीसिया सितै करदा हा। 30 ठेरैतांये कि अहै मसीह रै शरीरा रै अंग हिन। जिन्या पवित्रग्रन्था मन्ज लिखुरा हा कि, 31 “ठेरी वजह थऊँ मर्द अपणै माँ-बुड़ै जो छड़ी करी अपणी घरावाळी सितै मिलीकरी रैहला अतै सो दोनों अक्क तन भूणै।” 32 इन्या गल्ला रा भेद पाणा ता बड्डा मुसकिल हा जैड़ा प्रमात्मैं प्रकट करूरा पर अऊँ तुसिओ मसीह रै तैस प्रेम रै बारै मन्ज बलदा जैड़ा तिनी कलीसिया सोगी करूआ। 33 पर तूसु मन्ज हर कोई अपणी घरावाळी सितै अपणै सांईयै प्यार रखा अतै घरावाळी भी अपणै घरवाळै रा आदर करा। |
This work is licensed under Creative Commons Attribution-ShareAlike 4.0 License.