इफिसियों 3 - गददी

गैर यहूदी मन्ज पौलुस री सेवा

¹ प्रमात्मैं ऐह सब कुछ तूसु गैर यहूदी तांयै करू अतै अऊँ पौलुस तून्दै तांयै प्रार्थना करदा हा। अऊँ जेला मन्ज ठेरैतांये हा क्ओकि अऊँ मसीह री सेवा तूसु तांयै करदा हा।

² तुहै जरूर हुणुरा भूणा कि प्रमात्मैं अपणै अनुग्रह रै द्धारा मिन्जो ऐह कम दितुरा हा कि अऊँ तूसु गैर यहूदी मन्ज सुसमाचार रा प्रचार करूं।

³ जिन्या अऊँ संक्षेप मन्ज पैहलै भी लिखी चुकुरा हा कि प्रमात्मैं अप्पू ही ऐस गुप्त भेद जो मिन्जो पुर प्रकट करूरा हा।

⁴ तुहै ऐसा पत्री जो पढ़ी करी जाणी सकदै हिन कि अऊँ मसीह रा सो भेद कैतनी गहराई सोगी समझदा।

⁵ पूराणै टैमां मन्ज मणु जो ऐह भेद ना दसुरा थू पर प्रमात्मैं अपणै आत्मा रै द्धारा अपणै पवित्र प्रेरित अतै भविष्‍यवक्ता पुर प्रकट करू।

⁶ भेद री गल्ल ऐह हा कि मसीह यीशु मन्ज सुसमाचार री वजह थऊँ गैर यहूदी जो प्रमात्मैं अपणी प्रतिज्ञा रा भागी बणाऊ जैड़ी प्रतिज्ञा तिनी यहूदी सोगी करूरी थी। सो ऐस तरीकै अक्क ही शरीरा रै भागी भूच्ची गै।

⁷ प्रमात्मैं रै अनुग्रह अतै प्रभावशाली सामर्थ रै द्धारा मिन्जो ऐह सुसमाचार जो हुनाणै री सेवा रा महान सौभाग्य मिलुरा हा।

⁸ मिन्जो पुर जैडा कि सबी पवित्र मणु मन्ज सबी थऊँ हल्कै थऊँ हल्का हा, फिरी भी मिन्जो पुर ऐह अनुग्रह भुआ, कि अऊँ गैर यहूदी जो मसीह यीशु रा सो सुसमाचार हणाऊ जैतिओ कि कोई नापी ना सकदा।

⁹ मिन्जो प्रमात्मैं जैडा सबी चिजा रा सृष्‍टिकर्ता हा, तैस गुप्त भेद जो सबीओ दसणै तांयै चुणु जिन्या गल्ला जो तिनी शुरूआत थऊँ गुप्त रखूरा थू।

¹⁰ इन्या गल्ला मन्ज प्रमात्मैं रा मकसद ऐह थू कि सो कलीसिया जो इस्तेमाल करा तैस खरै ज्ञान जो प्रकट करनै तांयै तिन्या सबी अनदेखै प्रधाना अतै अधिकारी पुर जैड़ै स्वर्गीय जगह मन्ज हिन।

¹¹ प्रमात्मैं ऐह अपणी सदा काल री योजना रै अनुसार रै पुरा करू अतै सो ऐसा योजना जो पुरा करी पाऊ क्ओकि प्रभु यीशु मसीह अपणै कम्मा जो पुरा करू।

¹² यीशु मसीह अतै इन्दै तैस पुर विस्वास री वजह थऊँ अहै हिम्मत अतै भरोसै सोगी तसेरी हजुरी मन्ज ईच्ची सकदै हिन।

¹³ अऊँ बिनती करदा कि तुहै तैस क्‍लेश री वजह थऊँ निराश मत भोआ जैडा अऊँ तूसु तांयै सहू करदा, क्ओकि ऐह सब कुछ तून्दै ही फायदै तांयै हा।

मसीह रा प्रेम

¹⁴ जैहणै अऊँ ऐह सब कुछ सोचदा हा ता अऊँ अपणै पिता प्रमात्मैं रै सामणै घुटनै रै भारै बही करी प्रार्थना करदा।

¹⁵ जैड़ा स्वर्गा अतै धरती मन्ज सबी चिजा रा सृष्‍टिकर्ता हा।

¹⁶ अऊँ प्रार्थना करदा कि प्रमात्मां अपणी महिमा रै धना सितै अपणी आत्मा रै द्धारा तुसिओ सामर्थ देय्आ तून्दै अन्दरूनी मनुष्यत्व जो बलवन्त करनै तांयै।

¹⁷ अऊँ प्रार्थना करदा हा कि मसीह विस्वास रै द्धारा तून्दै दिला मन्ज घर बणा, अतै प्रेम मन्ज तुन्दी जड़ अतै नियूँआ भून,

¹⁸ ताकि सब पवित्र मणु सोगी तुहै ऐसा गल्ला जो समझणै री शक्ति पान, कि प्रमात्मैं रै प्रेम री चौड़ाई, लम्बाई, ऊंचाई अतै गहराई कैतनी हा।

¹⁹ अतै मसीह रै तैस प्यारा जो जाणी सकन जैडा कि ज्ञान थऊँ दूर हा, कि तुहै प्रमात्मैं री सारी भरपुरी तिकर परिपूर्ण भुच्‍ची गच्छा।

²⁰ अबै सब महिमा प्रमात्मैं री भोआ जैडा अपणी अदभुत सामर्थ सोगी असु मन्ज कम करदा हा। सो इन्दै मंगणै अतै सोचणै थऊँ बड़ा ज्यादा असु तांयै करनै रै योग्य हा।

²¹ कलीसिया मन्ज, अतै मसीह यीशु मन्ज, प्रमात्मैं री महिमा पीढ़ी थऊँ पीढ़ी मन्ज युगा-युग तिकर भुन्दी रेय्आ। आमीन।