चेलै रै कम 20 - गददी

मकिदुनिया, यूनान अतै त्रोआस मन्ज पौलुस

¹ जैहणै हुल्लड़ रूकी गो ता पौलुसै चेलै जो हैदी करी समझाऊ, अतै तियां थऊँ विदा लेई करी मकिदुनिया परदेस री कनारी चली पैऊ।

² तैस पूरै परदेसा मितै भूच्ची करी अतै चेलै जो बड़ा उत्साहित करीके सो यूनान परदेस मन्ज आ।

³ जैहणै त्राई महीनै रैई करी सो तैड़ी जहाजा पुर बैही करी सो सीरिया परदेस जो गाणै बाळा थू, ता यहूदी अगुवै तैसिओ मारा री तोपा पैई गै, ता तिनी ऐह पक्का करू कि मकिदुनिया भूच्ची करी सो सीरिया परदेस जो फिरी गच्छा।

⁴ बिरीया रै रैहणै बाळै पुर्रूस रा पुत्र सोपत्रुस, थिस्सलुनीकियों शहर मन्ज अरिस्तर्खुस अतै सिकुन्दुस, दिरबे शहर रा गयुस, अतै तीमुथियुस, आसिया परदेस रा तुखिकुस अतै त्रुफिमुस आसिया परदेस तक तैस सोगी चली पै।

⁵ ऐह सब साथी अगो गिचीकरी त्रोआस शहर तक इन्दी भाळ करदै रैह।

⁶ अतै अहै अखमीरी रोटी रै त्यौहार रै बाद फिलिप्पी शहर थऊँ जहाजा पुर चड़ी करी पँजा दिन मन्ज त्रोआस शहर मन्ज तियां बलै पुजै, अतै सत दिन तक तैठिये ही रैह।

त्रोआस मन्ज यूतुखुस जो मरूरै थऊँ जिआणा

⁷ हप्तै रै पैहलै दिन जैहणै अहै रोटी त्रोड़णै तांयें इकट्ठै भुएै, ता पौलुस दूये दिन चली गाणा थू ता, तिनी तियां सोगी गल्ला करी; अतै अध्धी राती तक गल्ला करदा रैऊ।

⁸ जैसा अटारी पुर अहै इकट्ठै थियै, तैड़ी मतै दीयै जळू करदै थियै।

⁹ अतै यूतुखुस नां रा अक्क जवान खिड़की पुर बैही करी गहरी निन्द्रा मन्ज झूकु करदा थू। जैहणै पौलुस देरा तक गल्ला करू करदा थू ता सो मणु निन्द्रा मन्ज त्रीं मंज़िल थऊँ पैई गो, अतै जैहणै मणु थलै गै ता सो मरूरा उठाऊ।

¹⁰ पर पौलुस ओसी करी तैस सोगी लिपटी गो, अतै गळै लगाई करी बल्लू, “ड़रा मत; क्ओकि सेरै प्राण ऐस मन्ज ही हिन।”

¹¹ अतै फिर ऊपर गिचीकरी रोटी त्रोड़ी अतै खाणै थऊँ बाद भी ऐतनी देरा तक गल्ला करदा रैऊ कि भ्याग लगी पैई भूणा। फिरी सो चली गो।

¹² अतै सो तैस जवाना जो जिन्दै लेई आये अतै बड़ी शान्ती पाई।

त्रोआस थऊँ मीलेतुस री यात्रा

¹³ अहै पैहलै ही अस्सुस शहर जो जहाजा पुर चड़ी करी ऐह सोची करी अगो चली गै कि तैड़ी अहै पौलुस जो चढ़ाई लैलै, क्ओकि सो पैहलै ही पैदल गाणैवाळा थू।

¹⁴ जैहणै सो अस्सुस शहर मन्ज असिओ मूळु ता अहै तैसिओ जहाजा मन्ज चढ़ाईकरी मितुलेने शहर मन्ज लेई आये।

¹⁵ तैड़ी थऊँ अहै जहाजा मन्ज दूये दिन खियुस शहर रै सामणै पुजै, अतै अगलै दिन सामुस शहर मन्ज गिच्ची रैह; फिरी अगलै दिन मीलेतुस शहर मन्ज आये।

¹⁶ क्ओकि पौलुसै इफिसुस शहर रै बाहरा थऊँ भूच्ची करी गाणै री सोचुरी थी कि करखी ऐसा ना भोआ कि आसिया परदेस मन्ज देर लगा; क्ओकि सो जल्दी मन्ज थू कि अगर भूच्ची सका ता सो पिन्तेकुस्त त्यौहार रै दिन यरूशलेम मन्ज पुजा।

इफिसुस रै स्याणै जो उपदेश

¹⁷ जैहणै पौलुस मीलेतुस शहर मन्ज पुजु ता तिनी इफिसुस शहर री कलीसिया रै अगुवै जो संदेसा भैजु, अतै कलीसिया रै स्याणै जो हदवाई भैजु।

¹⁸ जैहणै सो तैस बलै आये ता, ता तिनी बल्लू; “तुहै जाणदै हिन पैहलै ही दिन थऊँ जैहणा थऊँ अऊँ आसिया परदेस पुजुरा, हर टैमैं तूसु सोगी कस तरीकै रैऊरा

¹⁹ मतलब बड़ी दीनता सितै अतै आँसू बहाई-बहाई करी, अतै तियां परीक्षा मन्ज जैड़ी यहूदी री वजह थऊँ मिन्जो पुर ईच्ची पैई, अऊँ प्रभु री सेवा करदा रैऊ;

²⁰ अतै जैड़ी जैड़ी गल्ला तून्दै भलै री थी, तियां जो मणु रै सामणै अतै घरै घरै दसणै मन्ज कदी भी ना झिझकु,

²¹ बल्कि यहूदी अतै यूनानी रै सामणै गवाही दिन्दा रैऊ कि प्रमात्मैं री तरफ मन फिराणा अतै इन्दै प्रभु यीशु पुर विस्वास करना चहिन्दा।”

²² “अबै हेरा पवित्र आत्मा मिन्जो यरूशलेम शहर जो गाणै जो मजबुर करूआ, अतै ना जाणदा कि तैड़ी मिन्जो पुर कै बीतणा।

²³ सिर्फ ऐह कि पवित्र आत्मा हर नगर मन्ज गवाही दिकरी मिन्जो सोगी बलदा कि बन्धन अतै क्‍लेश तिजो तांयें तैयार हिन।

²⁴ पर अऊँ अपणै प्राणा जो कुछ ना समझदा कि तियां जो प्यारा जाणु, बल्कि ऐह कि अऊँ अपणी दौड़ जो अतै सेवा जो पुरा करू, जैडा मैंई प्रमात्मैं रा अनुग्रह रै सुसमाचार पुर गवाही दिणै तांयें प्रभु यीशु थऊँ पाई हा।”

²⁵ “अबै हेरा, अऊँ जाणदा हा कि तुहै सब जिंआं मन्ज अऊँ प्रमात्मैं रै राज्य रा प्रचार करदा फिरू, मिन्जो तूसु दोबारा ना हेरना।

²⁶ ठेरैतांये अऊँ अजा रै दिन तूसु सोगी गवाही दिकरी बलदा कि, अगर तूसु मन्ज कोई यीशु पुर बिना विस्वास करै मरी गो ता अऊँ निर्दोष हा।

²⁷ क्ओकि अऊँ प्रमात्मैं रै पूरै अभिप्राय जो तुसिओ पूरी रीति सितै बिना झिझका रै दस्सी दिता हा।

²⁸ ठेरैतांये अपणी अतै अपणै पूरै झुण्ड़ री चौकसी करा जैत मन्ज पवित्र आत्मा तुसिओ अध्यक्ष ठहराऊरा हा, कि तुहै प्रमात्मैं री कलीसिया री रखबाळी करन, जैतिओ तिनी अपणै खूना सितै खरीदुरा हा।

²⁹ अऊँ जाणदा कि मेरै गाणै थऊँ बाद तूसु मन्ज झूठै भविष्‍यवक्ता ईणै जैड़ै फाड़णैवाळै भेड़िये सांईयै भूणै जिंआं झुण्ड़ जो ना छड़णा।

³⁰ तूसु मन्जै ही ऐसै ऐसै मणु उूठी खड़ीणै, जिंआं चेलै जो अपणै पिचो खिन्जी लैणैबाळै टेढ़ी-मेढ़ी गल्ला करनी हिन।

³¹ ठेरैतांये जागदै रेय्आ, अतै याद रखा कि मैंई त्राई साला तक रोई-रोई करी हरेक जो चेतावनी दिणा ना छडु।”

³² अतै अबै अऊँ तुसिओ प्रमात्मैं जो अतै तसेरै अनुग्रह रै बचन जो सौंपी दिन्दा, जैडा तुसिओ विस्वास मन्ज पक्का करी सकदा हा अतै सब पवित्र करूरै मणु मन्ज सहभागी करीके मीरास दि सकदा हा।

³³ मैंई कसी रै चाँदी, सोनै या कपड़ै रा लालच ना करू।

³⁴ तुहै अप्पू जाणदै हिन इन्या हत्थै ही मेरी अतै मेरै साथी री जरूरता जो पुरा करूरा।

³⁵ मैंई तुसिओ सब कुछ करीके दसुआ कि कस तरीकै मेहनत करदै कमजोरा जो सम्भालणा अतै प्रभु यीशु रै बचन याद रखणा जरूरी हा, जैडा तिनी अप्पू ही बलुरा हा: “लैणै थऊँ दिणा भला हा”।

³⁶ ऐह बली करी तिनी घुटनै टेकै अतै सबी सोगी प्रार्थना करी।

³⁷ ता सो सब बड़ै रोऐ अतै पौलुस रै गळै लिपटी करी तैसिओ पोक्कु दिणा लगै।

³⁸ ऐह खासकर ऐसा गल्ला थऊँ दुखी थियै जैड़ी तिनी बली थी कि तूसु मिन्जो दोबारा ना हेरना। ता तिन्यै तैसिओ जहाजा तक पुजाऊ।