चेलै रै कम 17 - गददी

थिस्सलुनीके नगरा मन्ज

¹ पौलुस अतै सीलास अम्फिपुलिस अतै अपुल्लोनिया शहर मितै भूच्ची करी थिस्सलुनीके शहर मन्ज आये, जैड़ी यहूदी रा अक्क सभागार थू।

² पौलुस अपणै रीति रै अनुसार तियां बलै गो, अतै त्राई विश्रामदिन पवित्रग्रन्था थऊँ तियां सोगी वाद-विवाद करू;

³ अतै तंयारा अर्थ खोली-खोली करी तियां जो समझांदा थू मसीह जो दुख उठाणा; अतै मरूरै थऊँ जी भूणा, जरूरी थू; अतै “ऐह ही यीशु जसेरी अऊँ उदाहरण हुणाऊ करदा, मसीहा हा।”

⁴ तियां मन्ज कैतनै यहूदी, भक्त यूनानी, अतै मती सारी कुलीन जनानी विस्वास करी लैऊ, अतै पौलुस अतै सीलास सोगी मिली गै।

⁵ पर यहूदी मणुऐ डाह सितै भरी के बजारू मणु थऊँ कुछ बुरै मणु जो सोगी लैऊ, अतै भीड़ इकट्ठी करीके नगरा मन्ज दंगा करनै लगै, अतै यासोन रै घरा पुर हमला करीके पौलुस अतै सीलास जो मणु सामणै अणना चाऊ।

⁶ सो तियां जो तैड़ी ना मुळै ता सो बकदै बकदै यासोन अतै कुछ विस्वासी भाई जो नगरा रै हाकमा रै सामणै खिन्जी लेई आये, अतै बलणा लगै “ऐह मणु जिन्यैं संसार मन्ज हंगामा करी दितुरा, सो ऐठीआ जो भी चली आये हिन।

⁷ यासोन तियां जो अपणै घरै ठहराऊरा हा। ऐह सबी रै सब बलदै हिन कि यीशु ही राजा हा, अतै सम्राट कैसर रै हूक्मा रा विरोध करदै हिन।”

⁸ तिन्यै मणु जो अतै नगरा रै हाकमा जो ऐह हुणाई करी डराई दिता।

⁹ ठेरैतांये तिन्यै यासोन अतै बाकी मणु जो जमानत लेई करी छड़ी दिता।

बिरीया नगरा मन्ज

¹⁰ विस्वासी भाईये झट राती ही पौलुस अतै सीलास जो बिरीया शहर जो भैजी दिता; अतै सो तैड़ी पुजीकरी यहूदी रै सभागार मन्ज गै।

¹¹ ऐह मणु ता थिस्सलुनीके शहर रै यहूदी थऊँ भलै थियै, अतै तिन्यै बड़ी लालसा सितै बचना जो ग्रहण करू, अतै रोज पवित्रग्रन्था मन्ज इन्या गल्ला जो तोपदै कि इन्या ही लिखुरी हिन कि ना।

¹² ठेरैतांये तियां मन्ज मतै अतै यूनानी कुलीन जनानी थऊँ अतै मतै मणु थऊँ विस्वास करू।

¹³ पर जैहणै थिस्सलुनीके शहर रै यहूदी जाणी गै कि पौलुस बिरीया शहर मन्ज भी प्रमात्मैं रा बचन हुणान्दा, ता सो तैड़ी ईच्ची करी मणु जो उकसाणा अतै हलचल मचाणा लगै।

¹⁴ ता विस्वासी भाईये झट पौलुस जो विदा करू कि समुंद्र रै कनारै चली गा; पर सीलास अतै तीमुथियुस तैठिये ही रैह।

¹⁵ पौलुस जो पुजाणै बाळै तैसिओ एथेंस शहर तक लेई गै; अतै सीलास अतै तीमुथियुस तांयें ऐह आज्ञा पौलुस थऊँ लेई करी फिरी कि सो झट थऊँ झट तैस बलै ईन।

एथेंस नगरा मन्ज

¹⁶ जैहणै पौलुस एथेंस शहर मन्ज तंयारी भाळ करू करदा थू, ता नगर जो मूर्ति सितै भरूरा हेरी करी तसेरा जी जळी गो।

¹⁷ ठेरैतांये सो यहूदी रै सभागार मन्ज यहूदी अतै भक्ता सितै, अतै चौका मन्ज जैड़ै भी मणु तैस सोगी मुळदै थियै तियां जो यीशु रै बारै मन्ज दसदा थू।

¹⁸ पौलुस कुछ ऐसै विद्धाना सोगी मुळु जियां जो इपिकूरी अतै स्तोईकी बलदै थियै, ता सो कुछ तैस सोगी तर्क करना लगै, अतै कुछ बलणा लगै, “ऐह बकवादी कै कणैणा चाहन्दा?” पर कुछ बलणा लगै, “ऐह होरी देवता रा प्रचारक लगू करदा” क्ओकि सो यीशु रै अतै दोबारा जी भूणै रा सुसमाचार हुणान्दा थू।

¹⁹ ता सो तैसिओ अपणै सोगी अरियुपगुस नां री यहूदी सभागार मन्ज लेई गै अतै पूछु, “कै अहै जाणी सकदै हिन कि ऐह नोई शिक्षा जैड़ी तू हुणाऊ करदा कै चिज हा?

²⁰ क्ओकि तू अनोखी गल्ला असिओ हुणाऊ करदा, ठेरैतांये अहै जाणना चाहन्दै कि ठेरा मतलब कै हा।”

²¹ (ठेरैतांये कि कई एथेंसवासी अतै परदेसी जैड़ै तैड़ी रैहन्दै थियै, नोई नोई गल्ला करना अतै हुणनै रै अलावा हौ कोई कम ना करदै थियै।)

अरियुपगुस री सभा मन्ज पौलुस रा भाषण

²² ता पौलुसै अरियुपगुस सभागार मन्जै खड़ी करी बल्लू, “हे एथेंस रै मणुओ, अऊँ हेरदा कि तुहै हर गल्ला मन्ज देवता जो बड़ै मनणैवाळै हिन।

²³ क्ओकि अऊँ घुमंदै घुमंदै तून्दै पूजा री चिजा जो हेरू करदा थू, ता अक्क ऐसी वेदि हेरी, जैत पुर लिखुरा थू, ‘अनजाणै ईश्‍वर तांयें।’ ठेरैतांये जैसिओ तुहै बिना जाणै पुजदै हिन, अऊँ तुसिओ तसेरा समाचार हुणान्दा।”

²⁴ “जिनी प्रमात्मैं धरती अतै सब चिजा जो बणाऊरा, सो स्वर्ग अतै धरती रा स्वामी भूच्ची करी, हत्था रै बणाऊरै मन्दरा मन्ज ना रैहन्दा;

²⁵ ना कसी चिजा री जरूरता रै अनुसार मणु रै हत्था री सेवा लैन्दा, क्ओकि सो अप्पू ही सबी जो जिन्दगी अतै सांस अतै सब कुछ दिन्दा।

²⁶ तिनी शुरू मन्ज अक्क ही जोडै थऊँ मणु री सब जाति पूरी धरती पुर रैहणै तांयें बणाई; अतै कुण जाति अतै कुण भाषा कड़ी रैहणी तिनी ही फैसला करूरा,

²⁷ प्रमात्मैं ऐसा करू कि मणु प्रमात्मैं जो तोपन, अतै टटोलीकरी पान भी, तांभी प्रमात्मां असु कसी थऊँ भी दूर निय्आ।

²⁸ क्ओकि अहै तैस मन्ज ही जिन्दै रैहन्दै हिन, चलदै-फिरदै अतै स्थिर रैहन्दै हिन; जिंआं तून्दै कैई कविये भी बलुरा, ‘अहै ता तसेरै ही वंशज हिन’।”

²⁹ “ठेरैतांये प्रमात्मैं रै औलाद भूच्ची करी असिओ ऐह समझणा ठीक निय्आ कि ईश्वरत्व सोनै, रूप या पत्थर सांईयै हा, जैड़ै मणु री कारीगरी अतै कल्पना सितै बणाऊरै हिन।

³⁰ ठेरैतांये प्रमात्मैं मणु री अज्ञानता रै टैमां पुर ध्यान ना दितुरा, पर अबै हर जगह सब मणु जो मन फेराणै रा हूक्म दिन्दा हा।

³¹ क्ओकि तिनी अक्क दिन ठहराऊरा हा, जैत मन्ज तैस मणु रै द्धारा धर्म रै संसार रा न्याय करना, जैसिओ तिनी बणाऊरा, अतै तैसिओ मरूरै थऊँ जियाई करी ऐह गल्ल सबी मणु पुर प्रमाणित करी दिती हा।”

³² मरूरै थऊँ दोबारा जीणै री गल्ला हुणी करी कुछ मजाक करना लगै, अतै कुछ बलणा लगै, “ऐह गल्ल अहै तिजो थऊँ फिरी कदी हुणलै।”

³³ ता पौलुस तंयारै मन्जै थऊँ नकैई गो।

³⁴ पर कुछ मणु तैस सोगी मिली गै, अतै प्रभु पुर विस्वास करू; जिंआं मन्ज दियुनुसियुस जैडा अरियुपगुस रा सदस्य थू, अतै दमरिस नां री अक्क जनानी थी, अतै तियां सोगी होर भी मतै मणु थियै।