2 तीमुथियुस 4 - गददी1 जैहणै राजा यीशु मसीह ईणा ता तैस सब जिन्दा अतै मरूरै मणु रा न्याय करना। ठेरैतांये प्रमात्मैं अतै यीशु मसीह जो गवाह मन्नी करी अऊँ तिजो ऐह आज्ञा दिन्दा कि तू प्रमात्मैं रै राज्य रै बचन रा प्रचार कर। 2 ऐस कमा जो अपणै मना सोगी कर चाहे मणु हुणना चाहन या ना चाहन। तुसिओ मणु जो सुधारना हा अतै तंयारै पापा रै बारै मन्ज दसणा हा पर तिन्या जो उत्साहित भी करा जैहणै तुहै तिन्या जो सखान्दै हिन अतै सदा धीरज सोगी भरी रेय्आ। 3 क्ओकि ईना टैमं ईणा कि जैहणै मणु खरा उपदेश ना हुणना चाहणा, पर तिन्या अपणी अभिलाषा रै मुताबक चलना अतै अपणै तांई ऐसै उपदेशका जो तोपणा जिन्या सो ही गल्ला कनैणी हिन जैड़ी सो हुणना चाहन्दै हिन। 4 तिन्या सच्चाई जो ना हुणना पर झूठी कथा-कहाणी हुणनी हिन। 5 पर तू सबी गल्ला मन्ज चौकन्ना रैह, दुख झेल, सुसमाचार प्रचार रा कम कर अतै अपणी सेवा जो पुरा कर। 6 मेरी जिन्दगी अतै प्रमात्मैं तांयै मेरी सेवा अबै खत्म भूणैबाळी हा क्ओकि अऊँ जाणदा हा कि अबै मेरा मरनै रा टैमं चली आ। 7 अऊँ अपणी खरी कुश्ती लड़ी चुकुरा अतै अपणी दौड़ पूरी करी चुकुरा, मैंई बफादारी सोगी सुसमाचार रा प्रचार करूरा। 8 ठेरैतांये मिन्जो अक्क मुकुट दितिआ गाणा क्ओकि मैंई प्रभु जो खुश करू हा। तैस सही तरीकै न्याय करना अतै न्याय रै दिन मिन्जो ही ना पर तिन्या सबी जो भी मुकुट दिणा जैड़ै ऐह चाहन्दै हिन कि सो सामर्थ सोगी प्रकट भोआ। व्यक्तिगत संदेश 9 तीमुथियुस मिन्जो बलै झट-फट ईणै री कोशिश कर। 10 क्ओकि विस्वासी भाई देमास जो ऐस संसारा री चिजा प्यारी लगी अतै सो मिन्जो छड़ी करी थिस्सलुनीके शहर जो चली गछूरा। तिन्या ही विस्वासी भाई क्रैसकैंस भी गलातिआ परदेस जो अतै तीतुस दलमतिआ परदेस जो चली गै हिन। 11 मेरै सोगी सिर्फ विस्वासी भाई लूका ही हा, अतै जैहणै तुद ईणा तू विस्वासी भाई मरकुस जो लेई करी अई क्ओकि सेवा तांई सो मेरै बड़ै कमां रा हा। 12 विस्वासी भाई तुखिकुस जो मैंई इफिसुस शहर जो भैजी दिता हा। 13 जैहणै तुद ईणा ता जैडा चोळा अऊँ त्रोआस शहर मन्ज विस्वासी भाई करपुस रै घरै छड़ी छूरा थू, तैतिओ अतै कताबा खास करी चर्मपत्रा जो लैईन्दा अईयैं। 14 सिकन्दर जैड़ा लौहार थू तिनी मिन्जो बड़ी हानि पुजाई हा, प्रभु ही तसेरै कमां रै अनुसार तसेरा न्याय करा। 15 तू भी तैस थऊँ चौकन्ना रैह क्ओकि तिनी इन्दै संदेश रा बड़ा ही विरोध करूरा। 16 पैहली बरी जैहणै मिन्जो जजा बलै खडेरू ता कोई भी मिन्जो सोगी ना थू। सबीये मिन्जो छड़ी दिता अतै अऊँ प्रार्थना करदा कि प्रमात्मां तिन्या जो ऐहा गल्ला तांयै माफ करा। 17 पर प्रभु मेरा साथी रैऊ अतै मिन्जो सामर्थ दिती ताकि अऊँ सुसमाचार जो सही तरीकै प्रचार करी सकू अतै तैहा कचैहरी मन्ज सब गैर यहूदी तैतिओ हुणी सकन। तिनी मिन्जो मौत थऊँ भी बचाऊ जिन्या कोई भूखै शेरा थऊँ बचान्दा हा। 18 अतै प्रभु मिन्जो हर अक्क बुरै कमां थऊँ छुड़ाला अतै अपणै स्वर्ग राज्य मन्ज उद्धार करीके पुजाला, तसेरी महिमा जुगा-जुगा तिकर भोआ। आमीन। अन्तिम अभिवादन 19 बैहण प्रिस्का अतै तसारा घरावाळा अक्विला अतै विस्वासी भाई उनेसिफुरूस रै घरानै जो नमस्कार। 20 विस्वासी भाई इरास्तुस कुरिन्थुस शहर मन्ज ही रैई गो अतै विस्वासी भाई त्रुफिमुस जो अऊँ मीलेतुस शहर मन्ज बीमार छड़ी छूरा। 21 तीमुथियुस तू सर्दी री रित लगणै थऊँ पैहलै ही चली ईणै री कोशिश करैं अतै यूबुलुस, पूदेंस, लिनुस, क्लौदिया अतै सब विस्वासी भाई तिजो नमस्कार करदै हिन। 22 अऊँ प्रार्थना करदा हा कि प्रभु अतै तसेरा अनुग्रह तिजो सोगी रेय्आ। |
This work is licensed under Creative Commons Attribution-ShareAlike 4.0 License.