2 तीमुथियुस 2 - गददीयीशु मसीह रा स्वामिभक्त सपाई 1 तीमुथियुस विस्वास मन्ज मेरै सचै आत्मिक पुत्र; जैड़ा प्रमात्मां तिजो मसीह यीशु द्धारा अनुग्रह दिन्दा तू तैस मन्ज मजबुती सोगी बणी रैह। 2 तुहै मिन्जो कई बरी मतै मणु सामणै मसीह रा संदेश सखान्दै हुणुरा हा अबै अऊँ चाहन्दा कि तू इन्या गल्ला जो होरी विस्वासी जो सखा जैड़ै भरोसै रै योग्य हिन ताकि सो होरी जो भी सखान। 3 मसीह यीशु रै खरै योद्धा सांईं मिन्जो सोगी दुख झेल। 4 जैहणै कोई योद्धा लड़ाई लड़ना गाहन्दा ता सो अपणै भर्ती करनै बाळै जो खुश करना चाहन्दा हा ठेरैतांये सो अपणै आपा जो संसारा रै कमां मन्ज ना फसान्दा। 5 अगर कोई मणु कसी भी खेल मन्ज भाग लैन्दा हा सो तैहणै तक इनाम ना जीती सकदा जैहणै तक सो नियम रा सही पालन ना करदा। 6 जैड़ै किसान मेहनत करदै हिन तंयारा ही पैहला हक्क बणदा हा कि सो अपणी फसल री उपज जो सबी थऊँ पैहलै खान। 7 जिन्या उदाहरण जो मैंई सखाऊ हा तंयारै बारै मन्ज ध्याना सोगी सोचा अतै प्रभु मदद करनी हा कि तुहै इन्या गल्ला जो सही तरीकै समझी सकन। 8 यीशु मसीह जो याद करा कि सो कुण हा, सो राजा दाऊद रै वंशा थऊँ थू। प्रमात्मैं तैसिओ मरूरै थऊँ जिलाऊ अतै ऐह ही सो सुसमाचार हा जठेरा अऊँ प्रचार करदा हा। 9 अऊँ सुसमाचार रा प्रचार करदा ठेरैतांये अऊँ अपराधी सांईयै दुख झेलू करदा हा। ऐठी तक कि अऊँ कैदी भी हा पर कोई भी प्रमात्मैं रा सुसमाचार जो फैलणै थऊँ रोकी ना सकदा। 10 ठेरैतांये अऊँ चुणुरै मणु तांई सब कुछ सहन करदा ताकि सो भी मसीह यीशु पुर विस्वास करीके उद्धार पान अतै सो तैहा अनन्त महिमा जो पाई सकन जैड़ी सदा काल तक हा। 11 ऐह गप्प सच हा, कि अगर अहै मसीह सोगी मरी गान्दै हिन ता तैस सोगी जीणा भी हा। 12 अगर अहै तैस तांयै धीरज सोगी दुख सैहन्दै रैहन ता तैस सोगी राज्य भी करना अगर अहै तसेरा इन्कार करलै ता तैस भी इन्दा इन्कार करना। 13 अगर अहै मसीह रै प्रति विस्वासयोग्य ना भोलै तांभी सो असु तांयै विस्वासयोग्य बणी रहन्दा क्ओकि तैस तांयै जरूरी हा कि सो अपणै स्वभाव रै अनुसार कम करा। खरा कारीगर 14 कसी जो भी इन्या गल्ला जो भूलनै तांयै मौका मत दिन्दै। प्रमात्मैं जो अपणा गवाह मनी करी तिन्या जो चेतावनी दिन्यै कि सो शब्दा पुर तर्क-वितर्क ना करन, जैत थऊँ कोई फाईदा ना भुन्दा बल्कि हुणनैबाळै बिगड़ी गान्हदै हिन। 15 कठण मेहनत करा कि तुहै अपणै आपा जो प्रमात्मैं सामणै हाजिर करी सकन अतै तसेरै ग्रहण योग्य भूच्ची सकन। इन्नै खरै कम करनैवाळा बणनै री कोशिश करा जैसिओ लज्जित भूणै री जरूरत ना पैय्आ, अतै सो सच्चाई रै बचन रा अर्थ ठीक रीति सितै दसदा भोआ। 16 पर अशुद्ध वाद-विवाद थऊँ बची रैह क्ओकि इन्नै जिन्नै मणु होर भी अभक्ति मन्ज बददै गान्हदै हिन। 17 हुमिनयुस अतै फिलेतुस ऐसै उदाहरण हिन कि इन्या सांईयै मणु री झूठी शिक्षा तेजी सोगी फैलदी गान्दी हा अतै मणु रै विस्वास जो कमजोर करदी हा, अक्क खुलै हडुरै फौड़ै सांईयै जैड़ा तेजी सोगी फैलदा हा। 18 ऐसै मणु सच्चाई रै रस्तै जो छड़ी दितुरा हा अतै ऐह बलदै हिन कि मरूरै रा दोबारा जीणा भुच्ची गछूरा हा अतै ऐस तरीकै कुछ मणु जो विस्वास थऊँ दूर भटकाई दिन्दै हिन। 19 फिरी भी प्रमात्मैं री सच्चाई अक्क निऊँ सांईयै पक्की बणी रैहन्दी हा जैस पुर ऐह लिखुरा, “प्रमात्मां जाणदा हा कुण तसेरा अपणा हा” अतै “जैड़ै प्रमात्मैं रै हिन तिन्या जो बुराई थऊँ मुड़ी गाणा जरूरी हा।” 20 बड़ै-बड़ै घरा मन्ज ना सोनै-चान्दी रै बल्कि लकड़ी अतै चिक्का रै भाण्ड़ै भी भुन्दै हिन, सोनै-चान्दी रै भाण्ड़ै खास मौके तांयै अतै बाकी भाण्ड़ै हर रोज तांयै इस्तेमाल भुन्दै हिन। सोनै-चान्दी रै भाण्ड़ै सच्चै विस्वासी सांईयै हिन अतै बाकी भाण्ड़ै झूठै शिक्षक जो दर्शान्दै हिन। 21 ऐस तरीकै ही हरेक विस्वासी जैड़ा अपणै आपा जो इन्या बुरी चिजा थऊँ दूर करला ता सो तैस किमती भाण्ड़ै सांईयै भूणा जैड़ा खास मौके पुर इस्तेमाल भुन्दा हा। जसेरी जिन्दगी पवित्र भुणीआ तैस मालका रै कमै ईणा। 22 जवानी री अभिलाषा थऊँ दूर रैह अतै जैड़ै शुद्व मनां सितै प्रभु रा नां लैन्दै हिन तियां सोगी पवित्रता, विस्वास, प्रेम अतै मेल-मिलाप सितै पिछा कर। 23 पर मूर्खता अतै बेकार विवादा थऊँ दूर रैह क्ओकि तू जाणदा कि इआं थऊँ झगड़ै पैदा भुन्दै हिन। 24 अतै प्रभु रै दासा जो झगड़ालू ना भूणा चहिन्दा पर सबी सोगी नर्म अतै बचन री शिक्षा दिणै मन्ज निपुण अतै सहनशील भोआ। 25 सो सच्चाई रै विरोधी जो नर्म भूच्ची करी समंझा, भूच्ची सकदा हा कि प्रमात्मां तंयारै मना जो बदला अतै सो सच्चाई जो जाणी लैन। 26 तां तंयारै दमाग सही तरीकै कम करना अतै तिन्या शैतान रै जाल थऊँ बच्ची गाणा, क्ओकि शैतानै तिन्या जो अपणा बन्दी बणाई करी रखूरा हा ताकि सो जैड़ा चाह सो तिन्या थऊँ करवाई सका। |
This work is licensed under Creative Commons Attribution-ShareAlike 4.0 License.