2 पतरस 3 - गददी

प्रभु रै आगमन रा दिन

¹ मेरै विस्वासी भाईओ, अबै अऊँ तूसु जो दुई चिट्ठी लिखु करदा अतै दूनी चिट्ठी रै द्धारा तुसिओ याद दुआई करी तून्दै दिला मन्ज पवित्र विचारा जो उकसाणा चाहन्दा हा।

² मेरा उदेश्य ऐह हा कि तुहै तियां पवित्र पूराणै भविष्‍यवक्ता री गल्ला जो याद करा अतै तिन्या आज्ञा जो भी याद करा जैड़ी इन्दै प्रभु यीशु अतै उद्धारकर्ता री तरफा थऊँ थी। तुहै असु प्रेरिता थऊँ इन्या आज्ञा जो पाऊरा हा जिन्यैं तुसिओ सुसमाचार हणाऊरा हा।

³ सबी थऊँ जरूरी गल्ल जैड़ी अऊँ तुसिओ याद दोआणा चाहन्दा कि अन्त काल मन्ज मसीह रै दोबारा ईणै थऊँ पैहलै ऐसै मणु भूणै जिन्या तून्दा मजाक उड़ाणा क्ओकि तुहै मसीह रै दोबारा ईणै रै बारै मन्ज विस्वास करदै हिन पर इन्या बुरी कमा जो करदै रैहणा जैतिओ करनै थऊँ ऐह खुश भुन्दै हिन।

⁴ अतै इन्या पुछणा, “यीशु रै ईणै रा वायदा करा गो हा? क्ओकि जैहणै थऊँ बजुर्ग मरी गच्छुरै हिन तैहणै थऊँ सब कुछ तियां ही चलूरा जिआं कि संसार रै शुरू मन्ज थू।”

⁵ सो ता जाणी-बुजी करी ऐह भुली गान्दै हिन कि पूराणै टैमां मन्ज प्रमात्मैं अपणै बचना री आज्ञा सितै अम्बरा अतै धरती री रचना करी अतै धरती जो पाणी थऊँ नकाळी अतै चऊँ कनारी पाणी सितै ही घेरी दिता।

⁶ फिरी प्रमात्मैं तैस पूराणै संसार जो खत्म करनै तांयै पाणी जो ही अक्क शक्तिशाली बाढ़ रै रूपा मन्ज इस्तेमाल करू।

⁷ पर प्रमात्मैं तैहा आज्ञा रै द्धारा अजा रै अम्बर अतै धरती जो रखूरा हा ताकि तैतिओ अगी मन्ज नाश करया गच्छा। प्रमात्मैं तैतिओ तैस दिना तांयै रखूरा हा जैहणै तैस तिन्या मणु रा न्याय अतै नाश करना जैड़ै तसेरी आज्ञा रा पालन ना करदै।

⁸ मेरै प्यारेओ, ऐह अक्क गल्ला तूसु थऊँ छिपी ना रेय्आ, कि प्रभु तांयै अक्क दिन हजार साला रै बराबर हा अतै हजार साला अक्की साला रै मुताबक हा।

⁹ प्रभु अपणै वायदै जो पुरा करनै तांयै देर ना करदा जिन्या कुछ मणु समझदै हिन। ना ऐसा निय्आ सो तूसु तांयै धीरज सोगी भाळ करदा हा। सो ऐह ना चाहन्दा कि कोई भी मणु नाश भोआ पर चाहन्दा हा कि सबी मणु जो पापा थऊँ मनां फेरनै रा मौका मुळा।

¹⁰ मसीह दोबारा जरूर ईणा जिन्या चोर अचानक इन्दा हा। तैस टैमैं अम्बरा मन्ज बड़ी जड़जडाता भूणी हा अतै अम्बर गायब भूच्ची गाणा अतै अम्बरा मन्ज जैड़ा भी हा सूरज, चाँद, तारै सो भी पूरै तरीकै फूकी गाणै हिन। प्रमात्मैं तैस दिन सब कुछ प्रकट करना कि मणुऐ धरती पुर किनै-किनै कमा जो करूरा हा अतै तठेरै अनुसार न्याय करना।

¹¹ ता जैहणै ऐह सब चिजा ईन्नी साहबै प्रमात्मैं रै द्धारा नाश भूणैबाळी हिन ता ठेरैतांये तुसिओ विस्‍वासा मन्ज भक्ति भरी जिन्दगी जीणा चहिन्दी।

¹² तुहै ऐस तरीकै व्यवहार करा कि यीशु मसीह दोबारा झट अईआ, अतै तसेरै ईणै तक ऐसा भी व्यवहार करा क्ओकि जैहणै प्रमात्मैं संसार रा न्याय करनै तांयै ईणा ता अगी रै द्धारा अम्बरा जो नाश करना अतै तठेरी गर्मी सितै सब चिजा भी पिघळी गाहणी।

¹³ पर अहै विस्वासी तैस अक्क नोए अम्बर अतै धरती री आस रखदै हिन जैड़ा प्रमात्मैं पैहलै वायदा करूरा थू। जैड़ी मणु प्रमात्मैं री इच्छा सोगी वास करना।

जागदै अतै तैयार रेय्आ

¹⁴ ठेरैतांये प्यारेओ, जैहणै कि तुहै तैस दिना री भाळ करू करदै हिन जैहणै प्रमात्मैं संसार रा न्याय करना ता कोशिश करा कि तुहै प्रमात्मैं री नजरा मन्ज पवित्र अतै निष्कलंक ठहरन अतै अक्की दूये सोगी शान्ती मन्ज रेय्आ।

¹⁵ याद रखा कि इन्दै प्रभु रा धीरज मणु जो टैमं दिन्दा कि सो उद्धार पाई सकन। ऐह ही गल्ल इन्दै प्यारे भाई पौलुसै भी तैस ज्ञाना रै अनुसार लिखुरी थी जैड़ा प्रमात्मैं तैसिओ दितुरा थू।

¹⁶ पौलुस इन्या गल्ला रै बारै मन्ज अपणी सब पत्री मन्ज लिखदा हा, पर तसेरी लिखुरी कुछ गल्ला जो समझणा कठण हा। ठेरी वजह थऊँ कुछ अज्ञानी अतै चंचल मणु अपणै आपा रा नाश करदै हिन क्ओकि सो तसेरी गल्ला जो खिन्जी ताणी करीके अपणै तरीकै हुणान्दै हिन। सो पवित्रग्रन्था री होरी गल्ला जो भी इन्या ही हुणान्दै हिन।

¹⁷ हे प्यारेओ ठेरैतांये अऊँ टैमां थऊँ पैहलै तुसिओ चेतावनी दिच्छु करदा हा कि ऐसै बुरै मणु जो मौका मत देय्आ कि तुहै तंयारी गलती अनुसार चलन अतै तुहै तिन्या सच्चाई री गल्ला पुर शक करन जैत पुर तुहै पैहलै विस्वास करदै थियै।

¹⁸ तुहै ऐस तरीकै जिन्दगी जिय्आ ताकि तुहै इन्दै उद्धारकर्ता यीशु मसीह अतै तसेरै अनुग्रह जो होर भी ज्यादा जाणदै रेय्आ। तसेरी ही महिमा अज भी अतै युगा-युग भुन्दी रेय्आ। आमीन।