2 पतरस 2 - गददी

झूठै शिक्षक

¹ जैस तरीकै इस्त्राएल देश मन्ज झूठै भविष्‍यवक्ता थियै तिन्या ही तून्दै मन्जै भी झूठै शिक्षक प्रकट भूणै। इन्या मणु ईच्ची करी चलाकी सोगी नाश भूणैबाळी झूठी शिक्षा जो सखाणा, अतै अपणै मालक यीशु मसीह रा भी इनकार करना जिनी तिन्या जो छुड़ाऊरा थू। ठेरी वजह थऊँ तिन्या अपणै आपा रा विनाश करना हा।

² कई जैड़ै प्रमात्मैं रै मणु भूणै रा दावा करदै हिन इन्या झूठै शिक्षक री बुरी शिक्षा रै अनुसार चलना अतै तंयारै बुरै कमा री वजह थऊँ मणु सच्चाई रै रस्तै री निन्दा करनी हा।

³ ऐह झूठै शिक्षक बड़ै लालची भूणै अतै इन्या तुसिओ झूठी कहाणी बली करी धोखा दिणा ताकि तूसु थऊँ पैसा लेई सकन। प्रमात्मैं पैहलै थऊँ ही फैसला करूरा थू कि तिन्या जो सजा दिणी हा अतै सो तैयार हा तिन्या जो नाश करनै तांयै।

⁴ प्रमात्मैं तियां स्वर्गदूता जो भी जिऐ पाप करना ना छड़डु, पर नरका जो भैजी करी नैहरै खुआ मन्ज पाई दिता, ताकि न्याय बाळै दिन तिकर कैदी रैहन।

⁵ प्रमात्मैं नूह रै टैमां मन्ज संसार रै तिन्या अभक्त मणु पुर भी दया ना करी, तिन्या जो बाढ़ रै पाणी द्धारा नाश करू फिरी भी तिनी अठ मणु जो बचाऊ जिन्या मन्ज नूह भी थू जिनी सच्चाई रा प्रचार करू।

⁶ सदोम अतै अमोरा रै नगरा जो भी प्रमात्मैं दोषी ठहराऊ अतै तिन्या नगरा जो नाश करीके अक्क धूड़ी रा ढेर बणाई दिता ताकि सो अभक्त मणु तांयै अक्क उदाहरण ठहरा।

⁷ पर सदोम अतै अमोरा नगर रा नाश करनै थऊँ पैहलै प्रमात्मैं अक्क धर्मी मणु लूत जो शहर छड़णै जो दसु ऐस तरीकै प्रमात्मैं लूत जो छुटकारा दिता।

⁸ लूत तिन्या बुरै मणु रै मन्जै रैहन्दा थू अतै हर रोज तंयारै द्धारा करूरै बुरै कमा जो हेरदा अतै हुणदा थू। सो इन्या सबी गल्ला थऊँ परेशान रैहन्दा थू क्ओकि सो अक्क धर्मी मणु थू।

⁹ ता प्रभु भक्ता जो परीक्षा थऊँ कड्ड़ी लैणा अतै पापी जो न्याय बाळै दिन तिकर सजा री दशा मन्ज रखणा भी जाणदा हा।

¹⁰ प्रभु तिन्या मणु सोगी कठोर व्यवहार करना जैड़ै आज्ञा ना मन्दै अतै सदा अपणी बुरी अभिलाषा रै बारै मन्ज ही सोचदै हिन। ऐह ढीठ अतै हठी मणु हिन सो प्रमात्मैं रै शक्तिशाली स्वर्गदूता जो बुरा-भला बलणै थऊँ भी ना डरदै हिन।

¹¹ फिरी भी स्वर्गदूत जैड़ै कि इन्या झूठै शिक्षक थऊँ शक्ति अतै सामर्थ मन्ज ज्यादा ताकतवर हिन, प्रभु रै सामणै तियां जो बुरा-भला बल्ली करी दोष ना लगान्दै हिन।

¹² ऐह झूठै शिक्षक निर्बुद्धि गोरू सांईयै हिन जैड़ै कि पकड़नै तांई अतै नाश भूणै तांई पैदा भछूरै हिन। सो तिन्या गल्ला रै बारै मन्ज बुरा-भला बलदै हिन जिन्या जो सो जाणदै ही ना हिन सो अपणी हड़ैनी मन्ज अप्पू ही हडदै रहन्दै हिन।

¹³ होरी रा बुरा करनै री बजाऐ तिआंरा ही बुरा भूणा, तियां जो दिनै–दफारै ही सुख-विलास करना ठीक लगदा, ऐह कलंक अतै दोष हा जैहणै सो तूसु सोगी खान्दै-पिन्दै हिन, ता अपणी तरफा थऊँ प्रेम भोज करीके भोग-विलास करदै रैहन्दै हिन।

¹⁴ तिआंरी हाख्री मन्ज व्यभिचार बसुरा अतै सो पाप करूरै बिना ना रैई सकदै हिन। सो चंचल मनवाळै जो भकाई लैन्दै हिन, तंयारै मनां जो लोभ लालच करनै रा तर्जबा भूच्ची गछूरा, सो हराप सितै पैदा भच्छुरी औलाद हा।

¹⁵ तिन्यै सही कम करना छडी दितुरा हा अतै सो बुरै कमा जो करदै हिन जैड़ै बओर रै पुत्र बिलाम करूरा थू। सो ऐसा मणु थू जैसिओ गलत तरीकै सितै पैसा कमाणा खरा लगदा थू।

¹⁶ पर प्रमात्मैं तैसिओ तसेरै बुरै कमा री वजह थऊँ झिड़कू अतै तैस भविष्‍यवक्ता री गदही मणु री बोली मन्ज बलणा लगी अतै तैस जो गलत कम करनै थऊँ रोकू।

¹⁷ ऐह झूठै शिक्षक तिन्या बेकार पाणी रै खुआ सांईयै हिन जैड़ै हुक्की गच्छुरै हिन। सो निराशा भरी बदळा सांईयै हिन जिन्या जो हवा बरखा भूणै थऊँ पैहलै ही ऊड़ारी दिन्दी हा। प्रमात्मैं ऐसै मणु तांयै अक्क ऐसी जगह तैयार करूरी हा जैड़ी पूरी तरह थऊँ नैहरा हा।

¹⁸ सो बेकार मन्ज घमण्ड़ री गल्ला बल्ली करी लुचपन रै कम्मा री व्जहा थऊँ तियां मणु जो शरीरिक अभिलाषा मन्ज फसाई लैन्दै हिन जैड़ै कि हल्ली तिकर गलत जिन्दगी थऊँ निकळै हिन।

¹⁹ सो होरी जो आजाद भूणै रा वायदा ता करदै हिन पर अप्पू ता पाप अतै भ्रष्‍टता री गुलामी मन्ज हिन, क्ओकि अक्क मणु तठेरा गुलाम हा जठेरै सो वशा मन्ज हा।

²⁰ जैहणै मणु इन्दै प्रभु अतै उद्धारकर्ता यीशु मसीह जो जाणनै रै द्धारा संसार री दुष्‍टता थऊँ निकळदै हिन अतै अगर फिरी तैस तरीकै री बुराई मन्ज फिरी पैई गान्दै हिन ता तंयारी हालत पैहलै थऊँ भी बड़ी बुरी भूच्ची गान्दी हा।

²¹ तिन्या जो जैड़ी आज्ञा दितुरी थी तिन्यै तैतिओ ठुकराई दिता अतै पवित्र जिन्दगी ना जी, तिन्या तांयै ता ऐह ही खरा थू कि सो धार्मिकता रै रस्तै जो ही ना जाणदै।

²² ऐह झूठै शिक्षक इन्या पखैणा री सच्चाई जो सच सावित करदै हिन, “जियां कुत्र अपणी करूरी उलटी जो चटदा,” अतै “सूअंर साफ करनै थऊँ बाद भी चिकड़ा मन्ज लिमिणै तांई फिरी गाहन्‍दा हा।”