2 यूहन्ना 1 - गददीअभिवादन 1 ऐह पत्री यूहन्ना री तरफा थऊँ हा जैडा विस्वास मन्ज स्याणा हा। अऊँ ऐह पत्री तैहा जनानी अतै तसारै बच्चै जो लिखु करदा जैड़ी कि प्रमात्मैं द्वारा चुणुरी हा अऊँ सच्चाई सितै तिन्या सोगी प्यार करदा हा अतै सो सब भी तूसु सोगी प्रेम करदै हिन जैड़ै सच्चाई जो जाणदै हिन। 2 अहै तूसु सोगी प्रेम करदै हिन क्ओकि सच्चाई अबै इन्दै दिला मन्ज हा अतै सो सदा तक बणी रैहणी हा। 3 पिता प्रमात्मां अतै पुत्र यीशु मसीह री तरफा थऊँ अनुग्रह, दया अतै शान्ती असु सोगी सच्चाई अतै प्रेम सितै सदा असु मन्ज भुन्दी रेय्आ। सच्चाई अतै प्रेम 4 अऊँ बड़ा खुश भुआ कि मैंई तेरै बच्चै जो तैसा आज्ञा रै मुताबक जैड़ी कि इन्दै पिता प्रमात्मां री तरफा थऊँ मुळुरी थी, सच्चाई सितै चलदै हेरू। 5 अबै हे जनानी, अऊँ तिजो होर कोई आज्ञा ना दिन्दा पर सो ही जैड़ी कि असु बल्लै शुरू थऊँ थी, अऊँ तिजो लिखु करदा। अऊँ तिजो सितै बिनती करदा कि अहै सब अक्की दुऐ सितै प्रेम करन। 6 प्रमात्मैं री आज्ञा ऐह हा कि अहै अक्की दूये सोगी प्रेम करन। ऐह सो ही आज्ञा हा जैड़ी तैंई शुरू थऊँ हुणुरी हा अतै तिजो ऐसा आज्ञा पुर चलना भी चहिन्दा। 7 अऊँ ऐह ठेरैतांये बलदा हा क्ओकि कई धोखा दिणैबाळै मणु ऐस संसारा मन्ज चली छुरै हिन, ऐह ऐसै मणु हिन जैड़ै ऐह ना मन्दै कि यीशु मसीह मणु रै रूपा मन्ज धरती पुर आ। ऐसै मणु धोखा दिणैबाळै अतै मसीह रै विरोधी हिन। 8 ठेरैतांये तुहै ध्यान देय्आ कि सो मणु तुसिओ धोखा ना दिन ताकि तुन्दी मेहनत जैड़ी प्रमात्मैं री सेवा करनै तांयै हा सो बेकार ना भोआ पर तुहै अपणी सेवा तांयै प्रमात्मैं थऊँ इनाम पान। 9 जैडा कोई मणु ऐसा शिक्षा थऊँ भटकी गान्दा हा तसेरा प्रमात्मैं सोगी कोई सम्बन्ध निय्आ। पर जैड़ा कोई मणु मसीह री शिक्षा मन्ज बणी रैहन्दा हा तसेरा सम्बन्ध पिता अतै पुत्र दोनो सोगी हा। 10 अगर कोई मणु तुन्दी मण्ड़ळी मन्ज अईआ, अतै मसीह री सच्चाई री शिक्षा ना देआ ता तैस जो घरा मन्ज ईणा भी मत देय्आ अतै ना ही तसेरी तरीफ करा। 11 जैडा कोई इन्नै मणु रा तरीफ करदा सो तसेरै बुरै कम्मा रा भी साझी भुन्दा। अन्तिम अभिवादन 12 मिन्जो हल्ली होर भी गल्ला तिजो तांई लिखणी हिन। पर कागजा अतै सियाई सितै ना लिखणा चाहन्दा मिन्जो उम्मीद हा कि मुँ तिजो बल्लै ईणा हा अतै तून्दै सामणै गल-बात करनी हा ताकि अहै किटठै खुश भूच्ची सकन। 13 प्रमात्मैं द्धारा तेरी चुणुरी बैहणी रै बच्चै तिजो नमस्कार करदै हिन। |
This work is licensed under Creative Commons Attribution-ShareAlike 4.0 License.