2 कुरिन्थियों 12 - गददी

पौलुस रा दिव्य दर्शन अतै कमजोरी

¹ फिरी भी घमण्ड़ करना मिन्जो तांयें ठीक निय्आ तांभी करना पैन्दा; ठेरैतांये मुँ प्रभु रै दितुरै दर्शना अतै प्रकाशना री चर्चा करनिआ।

² अऊँ मसीह मन्ज अक्क मणु जो जाणदा; चौदह साल भुएै कि ना जाणै शरीरा सोगी, ना जाणै बिना शरीरा रै प्रमात्मां ही जाणदा; ऐसा मणु स्वर्गा जो चूकी लैऊ जैड़ी प्रमात्मां रैहन्दा।

³ अऊँ फिरी बलदा अऊँ अक्क ऐसै मणु जो जाणदा ना जाणै शरीरा सोगी, ना जाणै बिना शरीरा रै प्रमात्मां ही जाणदा हा,

⁴ कि स्वर्गलोका मन्ज चुकी लैऊरा हा, अतै ऐसी गल्ला हुणी जैड़ी कणैणै री ना हिन; अतै तियां गल्ला रै बारै मन्ज मणु जो दसणै री इजाजत निय्आ।

⁵ ऐसै मणु पुर ता मुँ घमण्ड़ करना, पर अपणै पुर अपणी कमजोरी जो छड़ी, अपणै बारै मन्ज घमण्ड़ ना करना।

⁶ क्ओकि अगर अऊँ घमण्ड़ करना चाऊ भी ता मूर्ख ना बनणा, क्ओकि मुँ सच बलणा। तांभी अऊँ ऐस तरह रा घमण्ड़ करनै थऊँ अपणै आपा जो रोकदा हा, ऐसा ना भोआ कि जियां कोई मिन्जो हेरदा या मिन्जो थऊँ हुणदा, मिन्जो तैस थऊँ बढ़ीकरी समझा।

⁷ ठेरैतांये कि सो अदभुत चिजा जैड़ी प्रमात्मैं मिन्जो दस्सी तैत थऊँ अऊँ घमण्‍ड़ी ना भूच्ची गच्छू ठेरैतांये प्रमात्मैं मेरै शरीरा मन्ज अक्क ऐसा दुख दिता जैतिओ सहन करना मुसकल थू, अर्थात अक्क शैतान रा दूत कि मिन्जो घूसै मारा ताकि अऊँ घमण्ड़ ना करूं।

⁸ ठेरै बारै मन्ज मैंई प्रभु सोगी त्राई बरी बिनती करी कि मिन्जो थऊँ ऐह दूर भूच्ची गच्छा।

⁹ पर तिनी मिन्जो सोगी बल्लू, “मेरा अनुग्रह तिजो तांयें काफी हा; क्ओकि मेरी सामर्थ कमजोरी मन्ज सिद्ध भून्दिआ।” ठेरैतांये मुँ बड़ी खुशी सोगी अपणी कमजोरी पुर घमण्ड़ करना कि मसीह री सामर्थ मेरी जिन्दगी द्धारा कम करू करा।

¹⁰ ठेरी वजह थऊँ अऊँ मसीह तांयें कमजोरी मन्ज, अतै निन्दा मन्ज, अतै दरिद्रता मन्ज, अतै उपद्रव मन्ज, अतै संकटा मन्ज खुश हा; क्ओकि जैहणै अऊँ कमजोर भुन्दा, तांभी मसीह रै सामर्थ री वजह थऊँ बलवन्त भुन्दा।

कुरिन्थियों तांयें पौलुस री चिन्ता

¹¹ तुहै मिन्जो मूर्ख सांईयै व्यवहार करनै जो मजबुर करू कि ऐस तरीकै घमण्ड़ करैं। तुसिओ ता मेरी तारीफ करना चहिन्दी थी, क्ओकि अगर अऊँ कुछ भी निय्आ, तांभी तियां बड़ै थऊँ बड़ै प्रेरिता मन्ज कसी गल्ला मन्ज घट निय्आ।

¹² जैहणै अऊँ तून्दै सोगी थू मैंई ऐह सवूत दिता कि अऊँ प्रेरिता हा। क्ओकि मैंई धीरज सोगी कई चमत्कार अतै हैरानी भरै कम, अतै सामर्थ भरै कम्मा तून्दै मन्जै करै हिन।

¹³ तुहै कसा जिनी गल्ला मन्ज दूई कलीसिया मन्ज घट थियै, सिर्फ ऐत मन्ज कि मैंई तूसु पुर अपणा भार ना पाऊ। मेरा ऐह अन्याय माफ करा।

¹⁴ हेरा, अऊँ त्रीं बरी तूसु बलै ईणै जो तैयार हा, अतै मुँ तूसु पुर कोई भार ना रखणा, क्ओकि मैंई तुन्दी दौलत ना बल्कि, तुसिओ ही चाहन्दा। क्ओकि बच्चै जो माँ-पिता तांयें धन ना कठेरना चहिन्दा, पर माँ-पिता जो बच्चै तांयें कठेरना चहिन्दा।

¹⁵ मुँ तूसु तांयें बड़ी खुशी सोगी अपणा सब खर्च करना, बल्कि अपणा जीवन भी तूसु तांई समर्पित करनै जो तैयार हा। अऊँ तूसु सोगी बड़ा ज्यादा प्‍यार करदा हा पर तुहै इन्या लगदा कि तुहै मिन्जो सोगी बड़ा घट प्रेम रखदै हिन।

¹⁶ पर होर मणु सोचदै हिन कि मैंई तूसु पुर बोझ ना पाऊ, पर चतुराई सोगी तुसिओ धोखा दिकरी फसाई लैऊ।

¹⁷ भला, जियां जो मैंई तूसु बलै भैजू, कै तियां मन्ज कसी रै द्धारा मैंई छल करीके तूसु थऊँ कुछ लेई लैऊ?

¹⁸ मैंई तीतुस जो समझाई करी तैस सोगी विस्वासी भाई जो भैजु, ता कै तीतुसै छल करीके तूसु थऊँ कुछ लैऊ? कै अहै अक्क ही इरादै सितै ना चलै अतै अक्क ही तरह रा व्यवहार ना करू?

¹⁹ तुहै हालि तक समझू करदै भूणै कि अहै तून्दै सामणै प्रत्युतर दिच्छु करदै हिन। अहै ता प्रमात्मैं जो मौजुद जाणी करी मसीह मन्ज बलदै हिन, अतै हे प्यारेओ, सब गल्ला तून्दै विस्वास जो मजबुत करनै तांयें बलदै हिन।

²⁰ क्ओकि मिन्जो ड़र हा, करखी ऐसा ना भोआ कि अऊँ ईच्ची करी जियां चाहन्दा हा, तियां ही तुसिओ ना पाऊ; अतै मिन्जो भी जियां तुहै ना चाहन्दै तियां ही पान। मिन्जो ड़र हा जैहणै मुँ ईणा ता करखी ऐसा ना भोआ कि तूसु मन्ज लड़ाई, डाह, क्रोध, विरोध, ईर्ष्या, चुगली, अभिमान अतै बखेड़ै भून।

²¹ मिन्जो ड़र हा जैहणै मुँ दोबारा तूसु बलै ईणा ता प्रमात्मां मिन्जो तून्दै सामणै नम्र करा। मिन्जो ऐसा गल्ला रा दुख भूणा कि कईये अपणा पुराणा पाप ना छडुरा हा। तुहै अपणै गन्दै कम अतै व्यभिचार अतै लुचपन थऊँ, जैडा तुहै करदै थियै तैत थऊँ अपणा मन ना फिराऊरा हा।