2 कुरिन्थियों 10 - गददी

पौलुस रा अधिकार

¹ अऊँ सो ही पौलुस जैडा तून्दै सामणै डरपोका सांईयै लगदा हा पर पिठी पिचो तुन्दी कनारी निड़र हा, तूसु सोगी मसीह री नम्रता अतै कोमलता सोगी बिनती करदा हा।

² कुछ मणु मिन्जो संसारिक मणु रै अनुसार चलनैवाळै समझदै हिन, जैहणै मुँ ईणा ता मिन्जो तियां सोगी कठोरता सोगी गल्ल करना पैणी हा, अऊँ ऐह बिनती करदा हा कि मिन्जो ऐसा व्यवहार करनै तांयै मजबुर मत करा।

³ क्ओकि अगर अहै संसारिक मणु अनुसार चलदै फिरदै हिन, तांभी अहै तियां सांईयै ना लड़दै।

⁴ क्ओकि इन्दी लड़ाई रै हथियार मणु द्धारा ना बणाऊरै हिन पर प्रमात्मैं रै द्धारा सामर्थी हिन जैड़ै झूठै बाद-विवाद जो ढ़ाई दिणैबाळै हिन।

⁵ ठेरैतांये अहै झूठै बाद-विवाद जैड़ा प्रमात्मैं रै विरोधा मन्ज उठदा हा, खत्म करदै हिन अतै हरेक विरोधी भावना जो कैद करीके मसीह रा आज्ञाकारी बणाई दिन्दै हिन,

⁶ अतै जैहणै तूसु पूरै तरीकै आज्ञाकारी बणी गाणा, ता असु हरेक तरह रै आज्ञा ना मनणै बाळै मणु जो दण्डित करना।

⁷ तुहै बाहरी रूपा जो हेरू करदै हिन अगर कसी जो अपणै पुर ऐह भरोसा हा कि “अऊँ मसीह रा हा,” ता सो ऐह भी जाणी लेय्आ कि जियां सो मसीह रा हा तियां ही अहै भी मसीह रै हिन।

⁸ क्ओकि अगर अऊँ तैस अधिकारा रै बारै मन्ज होर घमण्ड़ दसूं, जैडा प्रभुऐ तून्दै विस्वास मन्ज तुसिओ कमजोर करनै जो ना पर विस्वास मन्ज तुसिओ मजबुत करनै जो दितुरा हा, ता असु लज्जित ना भूणा।

⁹ ऐह अऊँ ठेरैतांये बलदा हा कि पत्री रै द्धारा तुसिओ डराणैवाला ना बणु।

¹⁰ क्ओकि सो बलदै हिन, “तसेरी पत्री ता गम्भीर अतै प्रभावशाली हिन; पर जैहणै सो सामणै भुन्दा, ता सो शरीरा रा कमजोर अतै गल्ल बात मन्ज हल्का लगदा।”

¹¹ जैडा ऐसा बलदा हा, सो ऐह समझ रखा कि जियां पिठी पिचो पत्री मन्ज इन्दै बचन हिन, तियां ही तून्दै सामणै इन्दै कम भी भूणै।

¹² क्ओकि असिओ ऐह हिम्मत निय्आ अहै अपणै आपा जो तियां थऊँ कुछ रै सांईयै गिणन या अपणै आपा जो मिलान, जैड़ी अपणी तरीफ अप्पू ही करदै हिन, अतै अपणै आपा जो अप्पू मन्ज ही नापी तोलीकरी अक्की दूये सोगी मिलाई करी मूर्ख ठहरान्दै हिन।

¹³ अहै ता सीमा रै बाहर घमण्ड़ कदी भी ना करलै, पर तैहा सीमा तक जैड़ी प्रमात्मैं असु तांयें ठहराऊरी हा, अतै तैत मन्ज तुहै भी चली आये हिन, अतै तैस सांईयै घमण्ड़ भी करन।

¹⁴ क्ओकि अहै अपणी सीमा थऊँ बाहर अपणै आपा जो बढ़ाणा ना चाऊ, जैड़ा प्रमात्मैं असिओ सौंपुरा थू सो ही करू, बल्कि अहै ही हिन जिन्यैं कुरिन्थियों मन्ज मसीह रा सुसमाचार पैहलै ईच्ची करी तुसिओ ही हुणाऊ हा।

¹⁵ अहै सीमा थऊँ बाहर दूये री मेहनती पुर घमण्ड़ ना करदै; पर असिओ उम्मीद हा कि जियां जियां तून्दा विस्वास बड़दा गाणा तियां तियां असु अपणी सीमा रै अनुसार तून्दै कारण होर भी बढ़दै गाणा,

¹⁶ ताकि अहै अपणी सीमा थऊँ अगो बढ़ीकरी सुसमाचार हुणान, अतै ऐह ना कि अहै दूये री सीमा रै अन्दर बणुरै बणाऊरै कम्मा पुर घमण्ड़ करन।

¹⁷ जियां पवित्रग्रन्था मन्ज लिखुरा हा, “जैडा घमण्ड़ करा, सो प्रभु पुर घमण्ड़ करा।”

¹⁸ क्ओकि जैडा अपणी बड़ाई करदा हा सो ना, पर जसेरी बड़ाई प्रभु करदा हा, सो ही प्रमात्मैं री नजरा मन्ज खरा हा।