1 तीमुथियुस 5 - गददी

विस्वासी रै प्रति जिम्मेवारी

¹ अपणै थऊँ बड़ी उम्रा रै मर्दा जो अपमान रै भाव सितै मत झिड़क पर तैस जो पिता जाणी करी समझाई दे अतै अपणै थऊँ हल्की उम्रा रै मणु जो भाई जाणी करी समझा।

² अपणी उम्रा थऊँ बड़ी जनानी जो माता जाणी करी समंझा अतै अपणी उम्रा थऊँ हल्की जनानी जो पूरी पवित्रता सितै बैहण जाणी करी समझाई दे।

³ अगर कोई विधवा हा जसारा कोई निय्आ तसारा आदर अतै देखभाल करा।

⁴ अतै अगर कसकि विधवा रै बच्चै अतै पोत्रु-धयोत्रु भून ता सो अपणै ही घरानै सितै भक्ति रा वर्ताव करन अतै अपणै माता-पिता री देखभाल करन जिन्या तसारै बचपना मन्ज माता-पिता करूरा थू, क्ओकि ऐह ही प्रमात्मैं जो खरा लगदा।

⁵ जैड़ी विधवा हिन अतै जयांरा कोई ना भोआ सो प्रमात्मैं पुर उम्मीद रखदी हिन अतै रात-दिन बिनती अतै प्रार्थना मन्ज लौलीन रैहन्‍दी हिन।

⁶ जैड़ी विधवा सिर्फ भोग-विलास तांयै जिन्दी हा सो आत्मिक रूपा थऊँ मरूरी हा।

⁷ इआं गल्ला री आज्ञा कलीसिया जो दिच्छु कर ताकि सो निर्दोष ठैहरन।

⁸ पर अगर कोई अपणै रिस्तेदार री, खास करीके अपणै घरानै री देखभाल ना करा ता सो विस्‍वासा थऊँ मुकरी गो अतै अविस्वासी थऊँ भी बुरा बणी गो हा।

⁹ तैसा विधवा रा ही नां विधवा री गिणती मन्ज ईणा चहिन्दा जैड़ी कि सठा साला थऊँ ज्यादा भोआ अतै अक्की ही घरवाळै री घरावाळी रैई भोआ।

¹⁰ खरै कम करनै मन्ज तसारा नां भोआ, जिन्यै बच्चै रा लालण-पालन करूरा भोआ, परौणै री सेवा करूरी भोआ, पवित्र मणु रै पैर धोऊरै भून, दुखी मणु री मदद करूरी भोआ अतै हरेक भल्‍लै कमां मन्ज मन लगऊरा भोआ।

¹¹ पर जवान विधवा रै नां तैहा गिणती मन्ज मत लिखदा, क्ओकि जैहणै तंयारी शरीरिक इच्छा तिन्या जो बैह करनै तांयै मजबुर करदी हिन ता सो मसीह यीशु थऊँ दूर भूच्ची गान्दी हिन,

¹² अतै ऐस तरीकै जैड़ै वायदै तिन्यै यीशु मसीह सोगी करूरै थियै कि, “तिन्या दोबारा बैह ना करनै पर मसीह री सेवा करनी हा,” तैतिओ त्रोड़ी करी सो दोषी ठैहरदी हिन।

¹³ ठेरै अलावा सो घर-घर घुमी करी अपणा टैमं बर्बाद करदी हिन अतै होरी रै कमां मन्ज हथ पान्दी हिन। ऐत थऊँ भी बुरा ऐह करदी हिन कि सो बक-बक करदी अतै ईन्नी गल्ला बल्‍दी हिन जैड़ी कि ना बलणा चैहिन्‍दी।

¹⁴ ठेरैतांये अऊँ ऐह सलाह दिन्दा कि जवान विधवा बैह करन अतै बच्चै पैदा करन अतै घर वार सम्‍भालण ताकि शैतान जो जैड़ा बैरी हा बदनाम करनै रा मौका ना मुळा।

¹⁵ क्ओकि कुछ जवान विधवा ता प्रमात्मैं थऊँ मुड़ीकरी शैतान री पिचो भुच्‍ची गछूरी हिन।

¹⁶ अगर कसी विस्वासी रै परिवार मन्ज विधवा भून ता सो ही तसारी मदद करा कि कलीसिया पुर भार ना भोआ अतै कलीसिया तिन्या विधवा री मदद करी सकदी हा जंयारा कोई निय्आ।

¹⁷ जैड़ै स्याणै विस्वासी अपणा कम खरा के करदै हिन तंयारा आदर करया गाणा चहिन्दा अतै तिन्या जो सही तन्खाह दिणा चहिन्दी, खास करीके तिन्या जो जैड़ै बचन हुनाणै अतै सखाणै मन्ज मेहनत करदै हिन।

¹⁸ क्ओकि पवित्रग्रन्थ बल्‍दा कि, “हळा खिन्‍जदै बाल्दा रा मुँह ना बन्‍धना चहिन्दा,” क्ओकि “मजदूर अपणी मजदूरी रा हक्कदार हा।”

¹⁹ अगर कोई दोष स्याणै विस्वासी पुर लगाया गच्छा ता दोई त्राई गवाह बिना ना हुणना।

²⁰ अगर कोई स्याणा लगातार पाप करदा रैहन्दा हा ता तैसिओ कलीसिया रै सामणै समझाई दे ताकि सबी तांयै चेतावनी भोआ।

²¹ प्रमात्मां अतै मसीह यीशु अतै चुणुरै स्वर्गदूता जो सामणै मनी करी अऊँ तिजो आदेश दिन्दा कि तू दिल खोली करी ईयां गल्ला जो मनु कर अतै कोई भी कम पक्षपात सोगी मत करदा।

²² कसी मणु रा चरित्र जाणै बगैर तैसिओ स्याणा विस्वासी बनाणै तांयै तोळै तैस पुर हथ मत रखदा ना ता तुद भी तसेरै पापा मन्ज भागीदार भूच्ची गाणा। अपणा ध्यान रख कि तू ऐस तरीकै रा पाप ना करा।

²³ भविष्‍य मन्ज मात्र पाणी पीणै बाळा मत रैह पर अपणै पेटा री खराबी अतै अपणै घड़ी-घड़ी बमारी थऊँ बचणै तांई थोड़ा-थोड़ा दाखरस भी पिऊ कर।

²⁴ अऊँ तुसिओ आज्ञा दिन्दा हा कि जल्दी मन्ज कसिओ स्याणा विस्वासी नियुक्त मत करा क्ओकि कुछ मणु खुलै तरीकै पाप करदै हिन। तंयारा न्याय भूणै थऊँ पैहलै ही विस्वासी रै सामणै सो दोषी ठहरदै हिन अतै कुछ मणु रै पाप ऐतनै साफ ना हुजदै पर न्याय रै दिन ही पता लगणा हा।

²⁵ तैस तरीकै ही जैड़ै मणु भलै कमा जो करदै हिन ऐह होरी विस्वासी जो साफ तरीकै हुजदा हा। अगर तंयारै भलै कम तोळै ना हुजन फिरी भी सो अक्क ना अक्क दिन प्रकट भूणै हिन।