1 तीमुथियुस 3 - गददीकलीसिया मन्ज अध्यक्ष (बिशप) 1 ऐह गल्ल सच हा कि जैडा कोई अध्यक्ष बणना चाहन्दा हा, ता सो आदर योग्य कमा री ईच्छा करदा। 2 ता जरूरी हा कि अध्यक्ष निर्दोष भोआ सो अक्की ही घरावाळी रा घरावाळा, संयमी, सुशील, सभ्य, मेहमान नमाजी करनै बाळा अतै सखाणै मन्ज लाईक भोआ, 3 पियक्कड़ या मार-कुटाई करनै बाळै ना भोआ बल्कि नर्म दिल अतै झगड़ालू ना भोआ अतै ना ही लोभी भोआ। 4 सो अपणै परिवार री सही अगुवाई अतै बन्दोबस्त करनै बाळा भोआ अतै सो अपणै बाल-बच्चै जो सखांदा भोआ कि सो आदर सोगी तसेरी आज्ञा रा पालन करन। 5 अगर कोई अपणै परिवार री ही देखभाल सही तरीकै करना ना जाणदा ता सो प्रमात्मैं री कलीसिया री रखवाली किआं करी सकदा हा? 6 सो अक्क नौआ ना पर पक्का समझदार विस्वासी भोआ, करखी इआं ना भोआ कि सो घमण्ड़ी भुच्ची करी शैतान सांईयै सज्जा पा। 7 अतै बाहर मणु मन्ज भी तसेरा खरा नां भोआ ईयां ना भोआ कि बेईज्जत भुच्ची करी शैतान रै जाळा मन्ज फसी गच्छा। कलीसिया मन्ज सेवक (डीकन) 8 तियां ही सेवका जो भी आदर योग्य भूणा चहिन्दा सो दोरंगै, पियक्कड़, अतै नीच कमाई रै लोभी ना भून। 9 तन्यारा विवेक शुद्ध भूणा चहिन्दा अतै जैड़ा प्रमात्मैं विस्वास रै बारै मन्ज असिओ प्रकट करूरा हा तैत मन्ज सो मजबुती सोगी बणी रैहन। 10 तिन्या जो सेवक नियुक्त करनै थऊँ पैहलै तंयारी खरी के परख करना चहिन्दी। अगर सो ऐस परख मन्ज खरै निकळण ता सो सेवक बणी सकदै हिन। 11 इन्नी साहबै जनानी जो भी आदर योग्य भूणा चहिन्दा, सो दोष लाणै बाळी ना भून पर संयमी अतै सबी गल्ला मन्ज विस्वासा योग्य भून। 12 सेवक अक्की घरावाळी रै ही घरवाळै भून अतै बाल बच्चै अतै अपणै परिवार रा खरा प्रबन्ध करना जाणदै भून। 13 क्ओकि जैड़ै सेवक रा कम खरा करी सकदै हिन सो अपणै तांयै मणु थऊँ आदर पाई सकदै हिन। सो हिम्मत सोगी होरी मणु जो यीशु मसीह पुर अपणै विस्वास रै बारै मन्ज दसी सकदै हिन। महान रहस्य 14 अऊँ तिजो बल्लै ईणै री तोळी उम्मीद रखदा पर फिरी भी ऐह गल्ला तिजो ठेरैतांये लिखदा हा, 15 कि मेरै ईणै मन्ज देर भूई ता तू जाणी लै कि प्रमात्मैं रै परिवार रा सदस्य भूणै रै नातै किन्या जिन्दगी जिणी हा। आखिरकार जिन्दै प्रमात्मैं री कलीसिया सच्चाई री मजबुत नींव हा। 16 अतै ऐत मन्ज कोई शक निआं कि जैड़ी शिक्षा प्रमात्मैं प्रकट करूरी हिन सो सच्ची हिन मतलब कि, मसीह मणु रै रूपा मन्ज प्रकट भुआ, पवित्र आत्मा रै द्धारा सावित भुआ कि सो प्रमात्मैं रा पुत्र हा, स्वर्गदूतै तैसिओ हेरू, गैर यहूदी मन्ज तसेरा प्रचार भुआ, संसार रै मणुऐ तैस पुर विस्वास करू अतै प्रमात्मैं तैसिओ स्वर्गा मन्ज ऊपरा जो चुकी लैऊ। |
This work is licensed under Creative Commons Attribution-ShareAlike 4.0 License.