1 पतरस 5 - गददीस्याणै अतै नौजवाना जो संदेश 1 अऊँ तूसु सांईयै अक्क तजुर्वै मन्ज स्याणा भूणै रै नातै तूसु स्याणै सितै कुछ बलणा चाहन्दा हा। मैंई अप्पू तिन्या दुखा जो हेरूरा हा जैड़ै मसीह असु तांयै सहू थू। जैहणै तैस दोबारा ईणा मुँ भी तसेरी महिमा मन्ज सहभागी भूणा। अऊँ अक्क तून्दा साथी तजुर्वै मन्ज स्याणा भूणै रै नातै तूसु सोगी बिनती करदा 2 कि प्रमात्मां कलीसिया रै विस्वासी री, जैडा तूसु मन्ज हा रखवाली करा; अतै ऐह दबाव थऊँ ना पर प्रमात्मैं री मर्जी रै अनुसार खुशी सोगी, अतै नीच कमाई तांयें ना पर मन लगाई करी। 3 जैड़ै मणु तुसिओ सौंपै गच्छुरै हिन, तियां पुर हक्क मत जता, बल्कि झुण्ड़ तांयें अक्क आदर्श बणा। 4 जैहणै यीशु मसीह जैड़ा इन्दा प्रधान पाहल हा तैस प्रकट भूणा, ता तुसिओ महिमा रा मुकुट दितआ गाणा जैडा मुरझाणा निय्आ। 5 ऐस तरीकै हे नौजवानों तुहै भी स्याणै रै अधीन रेय्आ, बल्कि तुहै सबी रै सब अक्की दूये री दीनता सोगी सेवा करा क्ओकि “प्रमात्मां अभिमानी रा वरोध करदा हा, पर दीना पुर अनुग्रह करदा हा।” 6 ठेरैतांये प्रमात्मैं री सामर्थ रै अधीन दीनता सोगी रेय्आ ता तूसु जो तैस ठीक टैमां पुर आदर सोगी उठाणा। 7 अपणी सब चिन्ता प्रमात्मैं जो दी देय्आ, क्ओकि तैसिओ तून्दा ध्यान हा। 8 चौकनै रेय्आ अतै जागदै रेय्आ; क्ओकि तून्दा वरोधी शैतान गर्जनेवाळै शेरा सांईयै ऐसा खोज मन्ज रैहन्दा कि कस जो फाड़ी खा। 9 विस्वासा मन्ज दृढ़ भूच्ची करी, अतै ऐह जाणी करी तसेरा सामना करा कि तून्दै साथी विस्वासी जैड़ै संसारा मन्ज हिन ऐसै ही दुख सहू करदै हिन। 10 अबै प्रमात्मां जैडा सब अनुग्रह रा दाता हा, जिनी तुसिओ मसीह यीशु मन्ज अपणी सदा काल री महिमा तांयें हैदुरा हा, तून्दै थोड़ी देरा तक दुख सैहणै थऊँ बाद अप्पू ही तुसिओ सिद्ध, स्थिर अतै बलवन्त करना। 11 प्रमात्मैं रा साम्राज्य युगायुग रेय्आ। आमीन। अन्तिम अभिवादन 12 मैंई ऐह पत्री लिखीकरी सिलवानुस रै हत्थै जैड़ा कि अक्क विस्वासयोग्य भाई हा भैजी हा। मेरा लिखणै रा मकसद ऐह हा कि तुसिओ अऊँ उत्साहित करी सकू अतै ऐह भरोसा दुआई सकू कि जैड़ा कुछ तुहै अबै अनुभव करू करदै हिन सो प्रमात्मैं रा अनुग्रह हा जैड़ा तूसु पुर हा अतै तुहै ऐस अनुग्रह मन्ज दृढ़ता सोगी बणी रेय्आ। 13 सो विस्वासी जैड़ै बाबेल शहर मन्ज रैहन्दै हिन, जिन्या जो प्रमात्मैं चुणुरा जिन्या तुसिओ चुणुरा सो तुसिओ नमस्कार बलदै हिन। मरकुस जैड़ा मिन्जो तांयै भी अक्क पुत्रा सांईयै हा सो भी तुसिओ नमस्कार बलदा हा। 14 अप्पू मन्ज प्यार सितै नमस्कार करा। तूसु सबीओ, जैड़ै मसीह मन्ज हिन, शान्ती मुळदी रेय्आ। |
This work is licensed under Creative Commons Attribution-ShareAlike 4.0 License.