1 यूहन्ना 4 - गददीआत्मा जो परखा 1 मेरै प्यारेओ, हरेक मणु रा विस्वास मत करा जैड़ा बलदा कि सो पवित्र आत्मा रै द्धारा गल्ला करदा हा, पर आत्मा री परख करा, कि सो प्रमात्मैं री तरफा थऊँ हा कि ना। क्ओकि बड़ै भारी झूठै भविष्यवक्ता संसारा मन्ज पैदा भूच्ची गच्छुरै हिन। 2 प्रमात्मां री आत्मा जो तुसै इन्नी साहबै पछैणी सकदै हिन, कि जैड़ी कोई आत्मा मन्नी लैन्दी हा कि यीशु मसीह शरीर लेई करी आ ता सो प्रमात्मां री कनारी थऊँ हा। 3 अतै जैड़ी कोई आत्मा यीशु री ऐसा सच्चाई जो ना मन्दी सो प्रमात्मैं री कनारी थऊँ निआं अतै सो ही ता यीशु मसीह रै विरोधी री आत्मा जठेरी चर्चा तुसै हुणी चुकुरै हिन कि सो ईणैबाळा अतै सो पैहलै थऊँ ही संसारा मन्ज हा। 4 हे प्यारे बच्चेओ तुसै प्रमात्मैं रै मणु हिन अतै तुसै तियां झूठै नबी पुर जय पाई हा, क्ओकि जैड़ी पवित्र आत्मा री शक्ति तून्दै अन्दर हा सो शैतान री शक्ति थऊँ भी बदिकरी हा जैड़ा संसारा मन्ज हा। 5 सो झूठै नबी संसारा रै हिन, ठेरी व्जहा थऊँ सो संसारिक गल्ला बल्दै हिन अतै संसार तिआंरी गल्ला हुणदा। 6 अहै प्रमात्मैं रै हिन अतै जैड़ै प्रमात्मैं जो जाणदै हिन सो इन्दी हुणदै हिन अतै जैड़ै प्रमात्मैं जो ना जाणदै सो इन्दी ना हुणदै, इन्नी साहबै अहै सच्चाई जो प्रकट करनै री आत्मा अतै झूठ री आत्मा जो पछैणी सकदै हिन। प्रमात्मां प्रेम हा 7 मेरै प्यारेओ, अहै अप्पू मन्ज प्यार रखन क्ओकि प्यार प्रमात्मैं थऊँ हा अतै जैडा कोई होरी सोगी प्यार करदा सो प्रमात्मैं थऊँ पैदा भच्छुरा अतै प्रमात्मैं जो जाणदा। 8 जैडा होरी सोगी प्यार ना करदा सो प्रमात्मैं जो ना जाणदा क्ओकि प्रमात्मां प्यार हा। 9 जैडा प्यार प्रमात्मां असु सितै रखदा ठेरा पता ऐत थऊँ लगदा कि प्रमात्मैं अपणा अक्को ही अक्क पुत्र ऐस संसारा मन्ज भेज्जू कि अहै तसेरै कारण अनन्त जिन्दगी पान। 10 सचा प्यार ऐह निय्आ कि अहै प्रमात्मैं सितै प्यार करू पर ऐत मन्ज कि तिनी असु सितै प्यार करू अतै इन्दै पापा जो मटाणै तांई अपणै पुत्रा जो बलिदान भूणै तांयें भैजु। 11 मेरै प्यारेओ, जैहणै प्रमात्मैं असु सितै इन्ना प्यार रखू हा ता असु जो भी अप्पू मन्ज प्यार रखणा चहिन्दा। 12 प्रमात्मां कदी भी कुणी ना हेरू, जे अहै अप्पू मन्ज प्यार रखन ता प्रमात्मां असु मन्ज बणी रहन्दा अतै तसेरा प्यार असु मन्ज सिद्व भुच्ची गछूरा। 13 ऐत थऊँ ही सावित भूच्ची गान्दा कि अहै मसीह मन्ज बणी रैहन्दै हिन अतै मसीह असु मन्ज क्ओकि तिनी अपणी आत्मा मन्ज असु जो दितुरा। 14 अतै अहै पुत्र जो हेरी भी लैऊआ अतै गवाई भी दिन्दै हिन कि पिता प्रमात्मैं पुत्र यीशु जो संसारा मन्ज उद्धारकर्ता करीके भैजुरा हा। 15 जैडा कोई ऐह मनी लैन्दा कि यीशु प्रमात्मैं रा पुत्र हा ता प्रमात्मां मसीह मन्ज बणी रहन्दा अतै सो प्रमात्मैं मन्ज। 16 अतै जैडा प्यार प्रमात्मां असु सितै रखदा तैस जो अहै जाणी गै हिन अतै असिओ प्रमात्मैं पुर विस्वास हा। प्रमात्मां प्यार हा जैडा प्यारा मन्ज बणी रहन्दा सो प्रमात्मैं मन्ज बणी रहन्दा अतै प्रमात्मां तैस मन्ज बणी रहन्दा। 17 ऐत थऊँ ही प्यार असु मन्ज सिद्व भुआ कि न्याय बाळै दिन असु जो हिम्मत भोआ, कि प्रमात्मैं असिओ सजा ना दीणी, क्ओकि जिन्ना यीशु हा तियां ही संसारा मन्ज असिओ भी रैहणा हा। 18 प्यारा मन्ज कोई डरा बाळी गप्प ना भुन्दीआ बल्कि सिद्व प्यार डरा जो दूर करी दिन्दा कजो कि डरा रा सम्बन्ध सजा सोगी भुन्दा अतै जैडा कोई डर करदा सो प्यारा मन्ज सिद्व ना भुच्ची सकदा। 19 अहै ठेरैतांये प्रमात्मैं अतै अक्की दूये सोगी प्यार करदै हिन कि पैहलै प्रमात्मैं असु सितै प्यार करू। 20 अगर कोई बल्ला कि अऊँ प्रमात्मैं सितै प्यार रखदा पर अपणै विस्वासी भाई सितै बैर रखा ता सो झूठा क्ओकि जैडा अपणै विस्वासी भाई सितै जैडा कि तिनी हेरूरा प्यार ना रखदा ता सो प्रमात्मैं सितै भी जैस जो तिनी हेरूरा निआं प्यार ना रखी सकदा। 21 अतै प्रमात्मैं थऊँ असु जो ऐह आज्ञा मुळुरी हा कि जैडा कोई प्रमात्मैं सितै प्यार रखदा सो अपणै विस्वासी भाई सितै भी प्यार रखदा। |
This work is licensed under Creative Commons Attribution-ShareAlike 4.0 License.