1 यूहन्ना 3 - गददी1 सोचा, पिता प्रमात्मैं असु सितै किना प्यार करू कि अहै तसेरै बच्चै कहलान, अतै सच मन्ज अहै तसेरै बच्चै हिन भी, पर ऐह संसार रै मणु असु जो ना जाणदै, क्ओकि तियैं प्रमात्मैं जो भी ना जाणु। 2 हे प्यारेओ, हल्ली तिकर अहै प्रमात्मैं री सन्तान हिन अतै हल्ली तिकर ऐह प्रकट ना भुआ कि असु कै कुछ भूणा! तूणा जाणदै हिन कि जैहणै तैस प्रकट भूणा ता असु भी तैस सांईयै ही भूणा, क्ओकि असु सो तिनां ही हेरना जिन्ना कि सो हा। 3 अतै जैडा कोई मसीह पुर उम्मीद रखदा, सो अपणै आपा जो तियां ही पवित्र करदा जिन्ना कि मसीह हा। 4 जैडा कोई लगातार पाप करदा रैहन्दा, सो व्यवस्था रा विरोधी हा अतै पाप करनै रा अर्थ हा प्रमात्मैं री व्यवस्था जो ना मनणा। 5 अतै तुसै जाणदै हिन कि यीशु मसीह ठेरैतांये प्रकट भुआ कि पापा जो उठाई लेई गच्छा अतै प्रमात्मैं रै स्वभाव मन्ज पाप निआ। 6 जैडा कोई यीशु मन्ज बणी करी रैहन्दा हा सो पाप ना करदा रैहन्दा अतै जैडा कोई पाप करदा तिनी ना ता यीशु जो हेरूरा अतै ना ही जाणुरा। 7 हे प्यारेओ, कसी री भकाई मत लगा, जैडा धार्मिकता रै कम करदा सो ही मसीह सांईयै हा। 8 जैडा कोई पाप करदा रैहन्दा सो शैतान री कनारी थऊँ हा क्ओकि शैतान शुरू थऊँ ही पाप करदा आ पर प्रमात्मैं रा पुत्र ठेरैतांये आ कि, शैतान रै कमां जो नाश करा। 9 जैडा कोई प्रमात्मैं थऊँ पैदा भच्छुरा सो पाप ना करदा रैहन्दा, क्ओकि तैस मन्ज प्रमात्मैं रा बी बणी रैहन्दा हा अतै सो पाप करी ही ना सकदा क्ओकि सो प्रमात्मैं थऊँ पैदा भच्छुरा। 10 ऐत थऊँ ही प्रमात्मैं री अतै शैतान री सन्तान रा पता चलदा, जैडा कोई धार्मिकता रै कम करदा सो प्रमात्मैं री तरफा थऊँ हा अतै सो भी जैडा कि अपणै भाई सितै प्यार रखदा। अक्की दूये सोगी प्रेम करा 11 जैडा समाचार तुसै शुरू थऊँ हुणुरा सो ऐह हा कि अहै अक्की दुऐ सितै प्यार रखन। 12 अतै आदम रै पुत्र कैन सांईं ना बणन जैडा कि तैस शैतान थऊँ थू जिनी अपणै सक्कै भाई जो मारी दिता अतै तिनी कस व्जहा थऊँ मारू? ऐस व्जहा थऊँ कि कैन रै कम बुरै थियै अतै तसेरै भाई रै कम धार्मिक थियै। 13 हे विस्वासी भाईओ अगर संसार तूसु सितै बैर रखा ता हैरानगी मत करदै। 14 अहै जाणदै हिन कि अहै पैहलै आत्मिक रूप थऊँ मरूरै थियै पर अबै अहै आत्मिक रूप थऊँ जिन्दा हिन। अहै ऐह ठेरैतांये जाणदै हिन कि अहै अपणै विस्वासी भाई सितै प्यार करदै हिन, जैडा प्यार ना करदा सो आत्मिक रूप थऊँ मरूरा हा। 15 जैडा कोई अपणै भाई सितै बैर रखदा सो हत्यारा हा अतै तुसै जाणदै हिन कि कसी हत्यारै मन्ज अनन्त जिन्दगी ना रैहन्दी। 16 अहै प्यार ऐसा गल्ला थऊँ ही जाणु हा कि यीशु मसीह असु तांई अपणै प्राण दी दितै ठेरैतांये असु जो भी विस्वासी भाई तांई प्राण दिणा चहिन्दै। 17 पर जैस कसी बल्लै संसारिक धन-दौलत भोआ अतै सो अपणै भाई जो कंगाल हेरा ता तैस पुर तरस ना खाणा चाह ता तैस मन्ज प्रमात्मैं रा प्यार कियां बणी करी रैई सकदा? 18 हे प्यारेओ अहै बचना अतै जीभा सितै ही ना पर कमां अतै सच्चाई सितै भी प्यार जो सावित करन। प्रमात्मैं रै सामणै हिम्मत 19 जैहणै अहै होरी सोगी प्यार करलै तांही असु जो पता लगणा कि अहै सच्चाई रै हिन। जैसा गल्ला मन्ज इन्दा मन असु जो दोष देला, तैस दोष रै बारै मन्ज असु यीशु रै सामणै अपणै मनां जो तस्सली दी सकणा। 20 क्ओकि प्रमात्मां इन्दै मनां थऊँ बड़ा अतै सो सब कुछ जाणदा। 21 हे मेरै प्यारेओ, अगर इन्दा मन असु जो दोष ना देय्आ ता असु जो प्रमात्मैं रै सामणै हिम्मत भुन्दीआ। 22 अतै अगर कुछ अहै मंगदै हिन, सो असु जो तैस थऊँ मुळदा क्ओकि अहै तसेरी आज्ञा जो मन्दै हिन अतै जैडा तैस जो पसन्द हा सो ही करदै हिन। 23 अतै पिता प्रमात्मैं री आज्ञा कि अहै तसेरै पुत्र यीशु मसीह पुर विस्वास करीके जिआं तिनी आज्ञा दितुरी हा तठेरै मुताबक अप्पू मन्ज प्यार रखन। 24 अतै जैडा प्रमात्मैं री आज्ञा जो मन्दा, सो मसीह मन्ज हा अतै सो तियां मन्ज बणी रहन्दा अतै तैस सितै मतलब तैसा पवित्र आत्मा सितै जैड़ी कि तिनी असु जो दितुरी हा, अहै जाणदै हिन कि मसीह असु मन्ज बणी रहन्दा। |
This work is licensed under Creative Commons Attribution-ShareAlike 4.0 License.