1 यूहन्ना 2 - गददीमसीह इन्दा सहायक 1 मेरै प्यारेओ, अऊँ ऐह गल्ला तूसु जो ऐत तांऐ लिखु करदा कि तुसै पाप मत करा। अगर कोई पाप करा ता पिता प्रमात्मां बल्लै असु तांई अक्क इन्दा पक्ष लैणै बाळा हा मेरा कणैणै रा मतलब यीशु मसीह जैड़ा धर्मी हा। 2 अतै सो इन्दै पापा रै प्रायश्चित तांयै बलि भूआ अतै सिर्फ इन्दै ही ना पर पूरै संसारा रै पापा तांयै भी। 3 अगर अहै तसेरी आज्ञा जो मनलै ता ऐत थऊँ असु जाणी लैणा कि अहै तैस जो जाणदै हिन। 4 जैडा कोई ऐह बलदा कि, अऊँ तैस जो जाणी गोआ अतै तसेरी आज्ञा जो ना मन्दा ता सो झूठा अतै तैस मन्ज कोई सच्चाई निआ। 5 पर जैडा कोई प्रमात्मैं रै बचना जो मन्दा, तैस मन्ज सचमुच ही प्रमात्मैं रा प्रेम सिद्व भछुरा असु जो ऐत थऊँ ही पता लगदा कि अहै तैस मन्ज हिन। 6 जैडा कोई ऐह बलदा कि, अऊँ यीशु मन्ज बणी रैहन्दा ता तैस जो चहिन्दा कि सो अप्पू भी तिन्ही ही जिन्दगी जियां जिन्या यीशुऐ जी थी। नोई आज्ञा 7 मेरै प्यारेओ, अऊँ तूसु जो कोई नोई आज्ञा ना लिखदा, पर सो ही पुराणी आज्ञा जैड़ी कि तूसु जो शुरू थऊँ मुळुरीआ, ऐह पुराणी आज्ञा सो ही बचन हा जैडा कि तुसै हुणुरा, जैहणै थऊँ तुहै यीशु पुर विस्वास करूरा। 8 फिरी भी अऊँ तूसु जो नोई आज्ञा लिखदा हा, ऐह आज्ञा यीशु मन्ज अतै तूसु मन्ज सच्ची ठहरी क्ओकि नैहरा हटदा गाहन्दा अतै सच्चाई री ज्योती अबै चमकणा लगीआ। 9 जैडा कोई ऐह बलदा कि, अऊँ ता ज्योती मन्ज रैहन्दा हा पर अपणै विस्वासी भाई सितै बैर रखदा ता सो हल्ली तिकर भी नैहरै मन्ज ही हा। 10 जैडा कोई अपणै विस्वासी भाई सितै प्यार रखदा सो ज्योती मन्ज रैहन्दा अतै सो पाप करनै रा कारण ना ठहरदा। 11 पर जैडा कोई अपणै विस्वासी भाई सितै बैर रखदा, सो नैहरै मन्ज रैहन्दा हा अतै नैहरै मन्ज चलदा अतै ना जाणदा कि करा चलूरा क्ओकि नैहरै तसेरी हाख्री अन्धी करी दितुरी हिन। 12 हे प्यारे बच्चेओ, अऊँ तूसु जो ठेरैतांये लिखुआ कि, यीशु रै नां सितै तून्दै पाप माफ भछूरै हिन। 13 हे पितरो, अऊँ तुसिओ ठेरैतांये लिखुआ कि जैडा शुरू थऊँ हा तुसै तैस जो जाणदै हिन। हे जवानों अऊँ तुसिओ ठेरैतांये लिखुआ कि तुसै दुष्ट शैतान पुर जय पाई हा हे प्यारे बच्चेओ मैंई तुसिओ ठेरैतांये लिखुआ कि तुसै पिता प्रमात्मां जो जाणी गै हिन। 14 हे पितरो, मैंई तुसिओ ठेरैतांये लिखुआ कि जैडा शुरू थऊँ हा तैस जो तुसै जाणी गच्छुरै हिन. हे जवानों मैंई तुसिओ ठेरैतांये लिखुआ कि तुसै ताकतवर हिन अतै प्रमात्मैं रा बचन तूसु मन्ज बणी रहन्दा हा, अतै तुसै दुष्ट शैतान पुर जय पाई हा। संसारा सोगी प्रेम मत करा 15 तुसै ना ता संसारा सितै अतै ना ता संसारा री चिजा सितै प्यार करा, जैडा कोई संसारा सितै प्यार रखदा ता तैस मन्ज पिता प्रमात्मां रा प्यार निआं। 16 क्ओकि अगर कुछ संसारा मन्ज हा मतलब शरीरा री अभिलाषा, हाख्री री अभिलाषा अतै कमाई रा घमण्ड़ ऐह सब पिता प्रमात्मां री तरफा थऊँ निआं पर संसारा री तरफा थऊँ हा। 17 संसार अतै ठेरी अभिलाषा दोनों मिटी गान्हदै हिन, पर जैडा कोई प्रमात्मां री ईच्छा अनुसार जिन्दगी बितान्दा सो सदा तिकर बणी रैहणा। मसीह-विरोधी 18 हे प्यारेओ, ऐह आखरी दिन हिन, अतै जिआं कि तुसै हुणुरा कि, यीशु मसीह रा विरोधी ईणैबाळा, तैसा गल्ला रै मुताबक ही मतै सारै मसीह वरोधी उूठी भछूरै हिन, ऐत थऊँ असु जो पता लगदा कि ऐह आखरी दिन हिन। 19 सो वरोधी निकळुरै ता इन्दै गुट थऊँ ही हिन पर असल मन्ज सो इन्दै ना थियै, क्ओकि जे असु थऊँ भुन्दै ता असु मन्ज रैहन्दै, पर निकळी ठेरैतांये गै कि ऐह सावित भूच्ची गो कि सो सच मन्ज इन्दै ना थियै। 20 पर तून्दा ता तैस पवित्र आत्मा सितै यीशु रै द्धारा अभिषेक भछुरा, अतै ऐह सब कुछ तुसै जाणदै हिन। 21 मैंई तूसु जो ऐत तांई ना लिखु कि, तुसै सच्चाई जो ना जाणदै, पर ऐत तांई लिखु हा कि, तुहै तैस जो जाणदै हिन अतै कोई भी झूठ सच्चाई री तरफा थऊँ निआं। 22 झूठा कुण हा? सिर्फ सो ही, जैडा यीशु मसीह रा विस्वासी भूणै जो इन्कार करदा, अतै मसीह विरोधी भी सो ही हा जैडा पिता प्रमात्मां अतै पुत्र यीशु मसीह रा इन्कार करदा। 23 जैडा कोई पुत्र यीशु मसीह रा इन्कार करदा तैस बल्लै पिता प्रमात्मां भी निआ जैडा कोई पुत्र यीशु मसीह जो मन्नी लैन्दा, तैस बल्लै पिता प्रमात्मां भी हा। 24 सचा संदेश जैडा तुसै मसीह रै बारै मन्ज हुणुरा सो तूसु मन्ज बणी रेय्आ अतै तुहै तैत मन्ज बणी रैहन ता तूसु पुत्र अतै पिता प्रमात्मां मन्ज बणी रैहणा। 25 अतै जैडा अनन्त जिन्दगी रा वायदा तिनी असु सितै करूरा सो तैस दिणी हा। 26 मैंई ऐह गल्ला तियां मणु रै बारै मन्ज तुसिओ लिखी हिन जैड़ै कि तूसु जो गलत शिक्षा सितै भ्रमान्दै हिन। 27 अतै तून्दा सो पवित्र आत्मा सितै अभिषेक जैडा कि मसीह री तरफा थऊँ भच्छुरा, तूसु मन्ज बणी रेय्आ। तुसिओ कसी थऊँ सच सिखणै री जरूरत निय्आ पर पवित्र आत्मा सितै अभिषेक जैडा मसीह री तरफा थऊँ भछुरा सो सब गल्ला सखांदा हा। ऐह सचा हा झूठा निआ अतै जिंआं पवित्र आत्मा तूसु जो सखाऊरा तियां ही तुसै तैस मन्ज बणी रेय्आ। प्रमात्मैं री सन्तान 28 हे प्यारेओ, मसीह मन्ज बणी रेय्आ, कि जैहणै सो दोबारा प्रकट भोआ, ता असु जो हिम्मत भोआ अतै अहै तसेरै दोबारा ईणै पुर तसेरै सामणै लज्जित ना भून। 29 अगर तुसै जाणदै हिन कि, मसीह धर्मी हा ता ऐह भी जाणदै कि जैडा कोई धार्मिक कम करदा तसेरा जन्म प्रमात्मैं थऊँ ही भच्छुरा। |
This work is licensed under Creative Commons Attribution-ShareAlike 4.0 License.