1 कुरिन्थियों 5 - गददीकलीसिया मन्ज अनैतिकता 1 ऐठी तक हुणनै मन्ज आ कि तूसु मन्ज व्यभिचार भुन्दा, बल्कि ऐसा व्यभिचार जैडा गैर यहूदी मन्ज ना भुन्दा कि अक्क मणु अपणी सौतेली माँ सोगी गलत रिश्ता रखदा हा। 2 तुहै ऐसा गल्ला रा दुख ता ना करदै, कि ऐसा करनैवाळा तुन्दी कलीसिया थऊँ कडआ गच्छा, पर तुहै घमण्ड़ करदै हिन। 3 ठेरै बावजूद कि अऊँ ता तूसु थऊँ दूर हा, पर आत्मा रै द्धारा अऊँ तूसु मन्जै हा। ऐसै कम करनैवाळै रा न्याय करी दितुरा हा, प्रभु यीशु मसीह रै नां सितै। 4 तुसिओ कलीसिया मन्ज अक्क सभा करना चहिन्दी, मुँ मेरी आत्मा मन्ज तैड़ी भूणा अतै इन्दै प्रभु यीशु री सामर्थ भी तैड़ी जरूर भुणीआ। 5 तुहै तैस मणु जो बाहर कड़ी देय्आ अतै शैतान रै हत्था मन्ज सौंपी देय्आ ताकि तसेरा पापी स्वभाव नाश भूच्ची सका, अतै न्याय रै दिना मन्ज तसेरै पाप माफ भून अतै सो उद्धार पा। 6 तून्दा घमण्ड़ करना खरा निय्आ; कै तुहै ना जाणदै कि जिन्या थोड़ा करी त्रकैटा पूरै बटूरै आटै जो त्रकैटा ही बणाई दिन्दा। तिन्या ही अगर अक्क मणु जो पाप करनै रा मौका मुळा ता जल्दी ही सबी मणु तैस कमा जो करना। 7 तैस पूराणै त्रकैटै जो दूर करा अर्थात तैस दुष्ट मणु जो अपणै आपा थऊँ दूर करा फिरी तूसु तैस नौआ बटूरा आटै सांईयै भूणा जैत मन्ज कोई त्रकैटा निय्आ, जैडा कि तुहै हिन। मसीह इन्दा फसह रा मेम्ना हा जैडा असु तांयै बलिदान भच्छुरा। 8 ठेरैतांये अईआ अहै फसह रै उत्सव री खुशी सीधाई अतै सच्चाई री अखमीरी रोटी सितै मनान, ना कि पूराणै त्रकैटै सितै बणुरी बुराई अतै दुष्टता री रोटी सितै। 9 मैंई अपणी पैहली पत्री मन्ज तुसिओ लिखुरा हा कि व्यभिचारी री संगति ना करना। 10 ऐह ना कि तुहै बिलकुल ऐस संसार रै व्यभिचारी, लोभी, धोखा दिणैबाळै या मूर्तिपूजक री संगति मत करा; क्ओकि ऐसी दशा मन्ज ता तुसिओ संसार थऊँ निकळी गाणा ही पैन्दा। 11 पर मेरा कणैणा ऐह हा कि अगर कोई विस्वासी भाई बणी करी, व्यभिचारी, लोभी, मूर्तिपूजक, गाळी दिणैबाळा, पियक्कड़ या धोखा दिणैबाळा भोआ, ता तसेरी संगति मत करदै; बल्कि ऐसै मणु सोगी खाणा भी मत खा। 12 क्ओकि ऐह मेरी जिम्मेवारी निय्आ कि अऊँ कलीसिया रै बाहर बाळै मणु रा न्याय करू। मेरी जिम्मेवारी कलीसिया रै अन्दर मणु रा न्याय करनै री हा जैडा पाप करदै हिन। 13 कलीसिया रै बाहरवाळै रा न्याय प्रमात्मां ही करना। जिन्या पवित्रग्रन्था मन्ज लिखुरा हा कि, “तुहै तैस कुकर्मी जो अपणै मन्जै थऊँ कडी देय्आ।” |
This work is licensed under Creative Commons Attribution-ShareAlike 4.0 License.