1 कुरिन्थियों 3 - गददीकलीसिया मन्ज गुटबन्दी री भर्त्सना 1 हे विस्वासी भाईओ, अऊँ ऐस तरीकै सितै गल्ला ना करी सकू जियां आत्मिक मणु सोगी करी गान्दी हिन, तूसु सोगी मेरी गल्ला संसारिक मणु सांईयै ही थी, जैड़ै मसीह मन्ज हालि बच्चै हिन। 2 मैंई तुसिओ दुध पिआऊ, अन्न ना खुआऊ; क्ओकि तुहै तैतिओ खाई ना सकदै थियै बल्कि हालि तक भी ना खाई सकदै हिन, अर्थात कि मैंई तुसिओ बचन री गहराई री गल्ला ना पर साधारण गल्ला ही सखाई हिन। 3 क्ओकि तुहै हालि तक पापी स्वभाव द्धारा ही जिन्दगी जिन्दै हिन। ठेरैतांये कि जैहणै तूसु मन्ज डाह अतै झगड़ा भोआ, ता कै तुहै पापी स्वभाव रै ना हिन? अतै कै तुहै संसारिक मणु सांईयै जिन्दगी ना वितांदै? 4 ठेरैतांये जैहणै अक्क बलदा, “अऊँ पौलुस रा हा,” अतै दुआ, “अऊँ अपुल्लोस रा हा,” ता कै तुहै संसारिक मणु सांईयै ना हिन? 5 अपुल्लोस अतै अऊँ पौलुस सिर्फ साधारण सेवक ही हिन जिन्यै तुसिओ विस्वास मन्ज ईणै तांयै मदद करू पर प्रमात्मां ही हा जिनी सब कुछ करू। 6 मैंई तून्दै दिला मन्ज प्रमात्मैं रै संदेश रा बी बाऊ, अतै अपुल्लोसे पाणी दिता, पर प्रमात्मां ही हा जिनी ऐतिओ बढ़ाऊरा। 7 ठेरैतांये ना ता बी बाणैवाळै कुछ हा अतै ना सिंचनैवाळा, पर प्रमात्मां ही सब कुछ हा जैडा बढ़ाणैवाळा हा। 8 प्रमात्मैं री नजरा मन्ज बी बाणैवाळै अतै सिंचनैवाळा दूनी री अक्क ही किमत हा, अतै दूनी जो प्रमात्मैं तंयारै कमा अनुसार इनाम दिणा। 9 क्ओकि अहै प्रमात्मैं रै सहकर्मी हिन; तुहै प्रमात्मैं री खेती अतै प्रमात्मैं रा भवन भी हिन। 10 जैडा वरदान प्रमात्मैं मिन्जो दितुरा हा तैत सोगी मैंई अक्क कुशल राजमिस्त्री सांईयै नियूँआ पाई अतै कोई होर मणु तैस कमा जो अगो बढ़ाऊ करदा हा, पर हरेक मणु चौकसी सोगी ऐसा कमा जो करदा गच्छा। 11 क्ओकि प्रमात्मैं पैहलै थऊँ ही यीशु मसीह जो अक्कमात्र नियूँआ सांईयै लगाई दितुरा हा अतै ठेरै बदलै कोई होर नियूँआ ना पाई सकदा। 12 यदि कोई ऐसा नियूँआ पुर सोना या चाँदी या किमती पत्थर या लकड़ी या हरै घा या भू रा रद्दा रखा, 13 ता तंयारै हरेक रै कम्मा री परख अगी सोगी करी गाणीआ क्ओकि न्याय रै दिन तैहा अगी हरेक रा कम परखणा कि किना हा। 14 जैसेरा कम तैसा अगी मन्ज टिकी रैहणा, तैस इनाम पाणा। 15 अगर मसीह ऐह घोषित करदा हा कि कसी मणु रा कम खरा निय्आ ता तैसिओ इनाम ना मुलणा पर तैस प्रमात्मैं द्धारा मिलणै बाळी सदा काल री जिन्दगी जो पाई लैणा। 16 कै तुहै ना जाणदै कि तुहै प्रमात्मैं रा मन्दर हिन, अतै प्रमात्मैं रा आत्मा तूसु मन्ज वास करदा? 17 अगर कोई प्रमात्मैं रै मणु री एकता जो नष्ट करला ता प्रमात्मैं तैसिओ नष्ट करना; क्ओकि प्रमात्मैं रा मन्दर पवित्र हा, अतै सो तुहै हिन। 18 कोई अपणै आपा जो धोखा ना देय्आ। अगर तूसु मन्ज कोई संसार रै विचार रै अनुसार ज्ञानी समझदा हा ता अपणै आपा मूर्ख बणा ताकि तुहै सच मन्ज ज्ञानी बणी सकन। 19 क्ओकि जिन्या गल्ला जो ऐह संसारा ज्ञान समझदा हा जो प्रमात्मैं री नजरा मन्ज मूर्खता हा, जियां पवित्रग्रन्था मन्ज लिखुरा, “प्रमात्मां ज्ञानी जो तंयारी चतुराई मन्ज फसाई दिन्दा हा,” 20 पवित्रग्रन्था मन्ज ऐह भी लिखुरा हा कि, “प्रभु जाणदा हा कि ज्ञानी मणु द्धारा बणाऊरी योजना व्यर्थ हिन।” 21 ठेरैतांये कोई मणु रै करूरै कमा पुर घमण्ड़ ना करा, क्ओकि सब कुछ तून्दा हा 22 पौलुस, अपुल्लोस, अतै पतरस, ऐह संसार, जिन्दगी अतै मौत, वर्तमान अतै भविष्य सब कुछ तून्दा हा, 23 अतै तुहै मसीह रै हिन, अतै मसीह प्रमात्मैं रा हा। |
This work is licensed under Creative Commons Attribution-ShareAlike 4.0 License.