1 कुरिन्थियों 16 - गददीविस्वासी तांयें दान 1 अबै सो सवाल जैड़ा तुहै तैस पैसै रै बारै मन्ज पुछुरा थू जैड़ा तुहै यरूशलेम शहर रै पवित्र मणु तांयें इकट्ठा करूरा थू। तुसिओ सो ही तरीका अपनाणा चहिन्दा जैडा मैंई गलातिया परदेस री कलीसिया जो दसुरा थू। 2 हर इतवारा जो तूसु मन्ज हरेक अपणी कमाई रै अनुसार कुछ अप्पू बलै रखी छडु करा कि मेरै ईणै पुर तुसिओ पैसै कठेरना ना पैय्आ। 3 अतै मेरै ईणै रै बाद मुँ तिन्या मणु तांयै सिफारिश री चिट्ठी लिखणी हा जिन्या जो तुहै चुणुरा हा ताकि सो गिच्ची करी तून्दा दान यरूशलेम पुजाई सकन। 4 अगर तुहै सोचदै हिन कि मेरा भी गाणा जरूरी भोला, ता मुँ तिन्या सोगी गाणा। पौलुस री यात्रा रा कार्यक्रम 5 मुँ मकिदुनिया परदेस गाणै थऊँ बाद तूसु सोगी मिलणै तांयै ईणा। 6 पर सम्भव हा कि मुँ तूसु बलै कुछ टैमां तक रूकणा, भूच्ची सकदा हा पूरी सर्दी रै टैमैं फिरी तुहै मेरी मदद करी सकदै हिन मेरै सफर मन्ज अगो गाणै तांयै जैस तरफ भी अऊँ गाला। 7 क्ओकि अऊँ अबै अऊँ तूसु सोगी ज्यादा देर मिलणा चाहन्दा अतै मिन्जो उम्मीद हा कि प्रभुऐ चाऊ ता मुँ कुछ टैमां तक तूसु सोगी रैहणा। 8 पर मुँ पिन्तेकुस्त रै त्यौहार तक इफिसुस शहर मन्ज रैहणा, 9 क्ओकि मिन्जो तांयें तैठी अक्क बडा अतै उपयोगी कम करनै तांयै मौका हा, हालांकि वरोधी मतै सारै हिन। 10 अगर तीमुथियुस तूसु बलै आ, ता तैसिओ तैड़ी अपणै घरा सांईयै महसुस भोआ क्ओकि सो मिन्जो सांईयै प्रभु तांयै कम करदा हा। 11 ठेरैतांये तैसिओ कोई तुच्छ ना जाणा, पर तैसिओ कुशलता सोगी ऐस कनारी मिन्जो बलै पुजाई दिन्यै, क्ओकि अऊँ तसेरी भाळ करू करदा कि सो विस्वासी भाई सोगी अईआ। 12 भाई अपुल्लोस सोगी मैंई वडी बिनती करी हा कि तूसु बलै होर विस्वासी भाई सोगी गच्छा; पर तिनी ऐस टैमैं गाणै री कुछ भी इच्छा ना करी, पर जैहणै मौका पाला तैहणै चली ईणा। अन्तिम आदेश अतै अभिवादन 13 जागदै रेय्आ, विस्वास मन्ज दृढ़ रेय्आ अतै बलवन्त बणी गच्छा। 14 जैडा कुछ करदै हिन प्रेम सितै करा। 15 हे विस्वासी भाईओ, तुहै स्तिफनास रै घरानै जो जाणदै हिन कि सो अखया परदेस मन्ज पैहलै विस्वासी हिन, अतै पवित्र मणु री सेवा तांयें तैयार रैहन्दै हिन। 16 ठेरैतांये अऊँ तूसु सोगी बिनती करदा कि ऐसै अगुवै रै अधीन रेय्आ, बल्कि हरेक रै जैडा ऐस कम्मा मन्ज मेहनती अतै सहकर्मी हा। 17 अऊँ स्तिफनास अतै फूरतूनातुस अतै अखइकुस रै ईणै थऊँ खुश भुआ, क्ओकि तुहै ऐड़ी ना हिन ठेरैतांये इन्यै मेरी सो मदद करी हा जैड़ी तुहै ना करी सकदै थियै। 18 ऐह मणु मिन्जो तांयै अदभुत प्रोत्साहन री वजह बणै, जिन्या सो मणु तूसु तांयै भी बणै थियै। ऐसै मणु जैड़ै खरी सेवा करदै हिन तिन्या जो आदर मिलणा चहिन्दा। आखरी नमस्ते 19 आसिया परदेस री सब कलीसिया रै विस्वासी री तरफा थऊँ तूसु सबी जो नमस्कार, अक्विला अतै तसेरी घरावाळी प्रिस्का रा अतै तंयारै घरा री कलीसिया रै विस्वासी भी तूसु जो प्रभु मन्ज बडा बडा नमस्कार! 20 सबी विस्वासी भाई रा तुसिओ नमस्कार! अक्की दूये जो प्यार सोगी नमस्कार करा 21 मैंई तुसिओ अपणै हत्था सितै नमस्कार लिखदा। 22 अगर कोई प्रभु सोगी प्रेम ना रखा ता सो हरापित हा। हे इन्दै प्रभु अई! 23 इन्दै प्रभु यीशु री कृपा तूसु पुर भुन्दी रेय्आ 24 मेरा प्रेम मसीह यीशु मन्ज तूसु सबी सोगी रेय्आ। आमीन। |
This work is licensed under Creative Commons Attribution-ShareAlike 4.0 License.