1 कुरिन्थियों 14 - गददीभविष्यवाणी अतै अन्य अन्य भाषा 1 अक्क दूये जो प्रेम करनै री पूरी कोशिश करा, अतै आत्मिक वरदाना री भी धूना मन्ज रेय्आ, विशेष करीके भविष्यवाणी करा। 2 क्ओकि जैडा अन्य भाषा मन्ज कणैन्दा हा सो मणु सोगी ना पर प्रमात्मैं सोगी गल्ला करदा हा, ठेरैतांये कि तसेरी गल्ला कोई ना समझदा, क्ओकि सो भेदा री गल्ला पवित्र आत्मा री सामर्थ रै द्धारा बलदा हा। 3 पर जैडा भविष्यवाणी करदा सो मणु जो उत्साहित करनै तांयै अतै तसली दिणै री गल्ला करदा हा। 4 जैड़ै अन्य भाषा मन्ज गल्ला करदा हा, सो अपणै ही विस्वास जो बधान्दा हा, पर जैडा भविष्यवाणी करदा, सो कलीसिया रै विस्वासी रै विस्वास जो बधान्दा हा। 5 अऊँ चाहन्दा कि तुहै सब अन्य भाषा मन्ज गल्ल करन पर ऐत थऊँ ज्यादा ऐह चाहन्दा कि भविष्यवाणी करा; क्ओकि अगर अन्य भाषा वलणैवाळा कलीसिया रै विस्वासी जो विस्वास मन्ज बढ़णै तांयें अनुवाद ना करा ता भविष्यवाणी करनैवाळा तैस थऊँ बदिकरी हा। 6 ठेरैतांये हे विस्वासी भाईओ, अगर अऊँ तूसु बलै ईच्ची करी अन्य भाषा मन्ज गल्ला करू, अतै प्रकाश या ज्ञान या भविष्यवाणी या उपदेश री गल्ला तूसु सोगी ना बल्लू, ता तुसिओ मिन्जो थऊँ कै फायदा भूणा? 7 ऐस ही तरीकै निर्जिव चिजा जियां थऊँ आवाज निकळदिआ, जियां बंसरी या बीण, अगर तंयारै स्वर मन्ज भेद ना भोआ ता जैडा फूक दिकरी या बजाया गान्दा, सो कियां पच्छैणना? 8 अगर लड़ाई मन्ज तुरही रा शब्द साफ ना भोआ ता सैनिक लड़ाई तांयै तैयारी ना करी सकदै। 9 ऐसै ही तुहै भी अगर जीभ थऊँ साफ-साफ गल्ला ना करन, ता जैडा कुछ कणैणा लगुरै कियां समझणा? तुहै ता हवा सितै गल्ला करनैवाळै बणी गाणै। 10 संसार मन्ज मती सारी अलग अलग भाषा हिन अतै हरेक भाषा रा कुछ ना कुछ अर्थ भुन्दा हा। 11 ठेरैतांये अगर अऊँ कसी भाषा रा अर्थ ना समझूँ, ता बलणैवाळै मेरी नजरा मन्ज अतै अऊँ तसेरी नजरा मन्ज परदेसी भूणै। 12 ठेरैतांये जैहणै तुहै भी आत्मिक वरदाना री धुन मन्ज हिन, ता तिन्या वरदान जो पाणै री कोशिश करा जैत सितै कलीसिया मन्ज विस्वासी रै विस्वास री उन्नति भोआ। 13 ठेरी वजह थऊँ जैड़ै अन्य भाषा बलन, सो प्रार्थना करै कि तठेरा अनुवाद भी करी सकन। 14 ठेरैतांये जैहणै अऊँ अन्य भाषा मन्ज प्रार्थना करदा हा ता मेरी आत्मा ता प्रार्थना करदी हा पर अऊँ समझी ना पान्दा कि अऊँ कै बल्लू करदा हा। 15 ता मिन्जो कै करना चहिन्दा? ऐसा अक्क टैमं भुन्दा कि जैहणै मिन्जो आत्मा रै द्धारा प्रार्थना करना चहिन्दी हा अतै ऐसा भी टैमं भुन्दा हा जैहणै मिन्जो अक्ला सोगी प्रार्थना करना चहिन्दी हा। कदी-कदी मिन्जो आत्मा रै द्धारा गाणा चहिन्दा अतै कदी-कदी अक्ला सितै भी गाणा चहिन्दा। 16 अगर कोई अनजाण मणु तुन्दी आराधना मन्ज अईआ जैहणै तुहै आत्मा रै द्धारा प्रमात्मैं री स्तुति करू करदै भून। अगर सो तुन्दी गल्ला जो समझी ना सकदै ता तिन्या जो किन्या पता लगणा कि तुहै कै बल्लू करदै हिन। 17 तू ता भली भाँति प्रमात्मैं रा धन्यवाद करू करदा हा, पर दूये रै विस्वास मन्ज उन्नति ना भुन्दी। 18 अऊँ अपणै प्रमात्मैं रा धन्यवाद करदा, कि अऊँ तूसु सबी मन्ज मती ज्यादा अन्य भाषा मन्ज कणैन्दा हा। 19 पर कलीसिया मन्ज अन्य भाषा मन्ज दस हजार गल्ला करनै थऊँ ऐह मिन्जो होर भी खरा लगदा कि दूये जो सखाणै तांयें अक्ला री पँज ही गल्ला करू। 20 हे विस्वासी भाईओ, तुन्दी समझ बच्चै सांईयै ना भोआ, जैड़ी तक बुराई री गल्ल हा ता ऐत मन्ज तुहै बच्चै सांईयै भोळै रेय्आ, पर अपणी समझ मन्ज स्याणै भूच्ची गच्छा। 21 पवित्रग्रन्था मन्ज लिखुरा हा कि, प्रभु बलदा, “अऊँ अपरिचित भाषा बलणैवाळै मणु रै द्धारा अतै पराऐ मणु रै द्धारा अपणै मणु सितै गल्ला करनी तांभी इन्या मणु मेरी ना हुणनी।” 22 ठेरैतांये अन्य भाषा अविस्वासी तांयें चिन्ह हिन; अतै भविष्यवाणी विस्वासी तांयें चिन्ह हिन। 23 ता अगर कलीसिया अक्क जगह इकट्ठी भोआ, अतै सबी रै सब अन्य भाषा बलन, अतै बाहरा बाळै या अविस्वासी मणु अंदर चली ईन ता कै तियां तुसिओ पागल ना बलणा? 24 पर अगर सब भविष्यवाणी करना लगन, अतै कोई अविस्वासी या बाहरवाळा मणु अंदर चली अईआ, ता तैसिओ महसुस भूणा कि तिनी प्रमात्मैं री विरूद्ध पाप करू हा। 25 प्रमात्मैं रा ऐह संदेश हुणी करी तैसिओ अपणै बुरै कमा रा पता लगणा अतै तैस मुँहा रै भारै पैई करी प्रमात्मैं जो प्रणाम करना, अतै मनी लैणा कि सच मन्ज प्रमात्मां तून्दै मन्जै हा। पूजा मन्ज अनुशासन 26 ठेरैतांये हे विस्वासी भाईओ, कै करना चहिन्दा? जैहणै तुहै आराधना तांयै इकट्ठै भुन्दै हिन, ता हरेक रै दिला मन्ज भजन या उपदेश या अन्य भाषा या प्रकाश या अन्य भाषा रा अर्थ दसणा रैहन्दा। ऐह सब कुछ विस्वासी रै विस्वास जो उन्नति करनै तांयें भूणा चहिन्दा। 27 अगर अन्य भाषा मन्ज गल्ला करनी भून ता दोई दोई या मतै भून ता त्राई जिणै बारी-बारी सितै बलन, अतै अक्क मणु अनुवाद करा 28 पर अगर अनुवाद करनैवाळा ना भोआ ता अन्य भाषा वलणैवाळा कलीसिया मन्ज शान्त रेय्आ, अतै अपणै मना मन्ज प्रमात्मैं सितै गल्ला करा। 29 भविष्यवक्ता मन्ज दोई या त्राई बलन, अतै बाकी मणु तंयारै बचना जो परखन। 30 अगर तैहा कलीसिया मन्ज कोई होर हा जैसिओ प्रमात्मैं थऊँ कुछ प्रकाशन मूळु भोआ ता सो पैहला मणु चुप भूच्ची गच्छा अतै तैसिओ बलणा देय्आ। 31 क्ओकि तुहै सब अक्क अक्क करीके भविष्यवाणी करी सकदै हिन, ताकि सब सिखन अतै सब उत्साहित भून। 32 जैड़ा भविष्यवक्ता प्रमात्मैं रै संदेश जो दस्सु करदा हा सो अपणै आप पुर काबू मन्ज रखा ताकि दुआ मणु भी कुछ बल्ली सका। 33 क्ओकि प्रमात्मां गड़बड़ी रा निय्आ, पर शान्ती रा प्रमात्मां हा। जियां पवित्र मणु री सब कलीसिया मन्ज हा। 34 जनानी कलीसिया मन्ज वाद विवाद ना करन पर चुप रैहन, क्ओकि तियां जो गल्ला करनै रा हूक्म निय्आ, पर अधीन रैहणै री आज्ञा हा, जियां व्यवस्था मन्ज लिखुरा भी हा। 35 अगर सो कुछ पुछणा चाहन, ता घरा मन्ज अपणै अपणै घरवाळै थऊँ पुछन, क्ओकि जनानी रा कलीसिया मन्ज गल्ला करना लज्जा री गल्ल हा। 36 प्रमात्मैं रा बचन तूसु मणु थऊँ ही शुरू ना भच्छुरा अतै ना सिर्फ तूसु तक ही पुजुरा हा। 37 अगर कोई मणु अपणै आपा जो भविष्यवक्ता या आत्मिक जन समझा, ता ऐह जाणी लेय्आ कि जैड़ी गल्ला अऊँ तुसिओ लिखदा, सो प्रभु री आज्ञा हिन। 38 पर अगर सो ऐहा गल्ला पुर ध्यान ना देय्आ ता तुहै भी तैस मणु पुर ध्यान मत देय्आ। 39 ता हे विस्वासी भाईओ, भविष्यवाणी करनै री धूना मन्ज रेय्आ अतै अन्य भाषा बलणै थऊँ मना ना करा, 40 पर जैड़ी गल्ला कलीसिया मन्ज करदै हिन सो सब सही तरीकै अतै अक्क-अक्क करीके करी गान। |
This work is licensed under Creative Commons Attribution-ShareAlike 4.0 License.