Zuda 1 - Bible en Guidar

Ətoŋ addəvən ( 1-2 ) Əsɗa

¹ Yuda maslən na Yesu Kristu məlmən Yakob, sit ɗiy en Maŋgəlva Afən aŋgələ, məs Yesu Kristu adawtaɗa.

² Ulasahã, zazay gəm əŋgla dənzləraŋ sukum.

Maɗɗula, əyaka gəm əgrak net mərbaŋ wən mbərayən ( 3-16 ) Mərbaŋ tepelke

³ Bayneŋgiɗwa, nəgayək də wən na əver sukum ɗerewel aka wən na əkõh məs məsap akani, nulaka ətər wəray nawver sukum, vi kasɓokum addəv əgay ammba ətaf mərban sit ɗiy salala təl taka kaka'ə.

⁴ Vi ɗiy meɓɓet tahəŋ dətoŋgoŋ a walaŋkum, məs məver wən nawtaw aket farə, ɗiy mbəreyit məs dədakkpaŋganən mbəlembəle na Maŋgəlva nam azet ka zəga ɗarə, dəppanən mərbəzəga an taka ana Daya nam Yesu Kristu.

⁵ Maw aka əɗɗumon sukum, də kəsənnən wən van pakə, səza Daya akõhgit ɗiy nan sə Eziptə, sə dərɓagani, azetik en məs dətafaŋ ɓa.

⁶ Maslayɗe məs dətoŋgoŋ ki meŋge na gagdak məs məpsiti, dəppanən təki nassa neti. Maŋgəlva aynetik dit ngiyamɗe faɗ ara guzli afuŋ əga pay metiŋ nawtaw wəna.

⁷ Va mãy Sodom də Gomorra gəm walaŋgəleɗe gugriɗ en tuwəɗ kiyit akuhwaŋ a gizbe, azbetinik maslayɗe, assoŋguk va zəga narban əzga də offo məs amta ɓa.

⁸ Vaski yi'e, ɗiy vetis adazbanən əssine net ərnokonən gəɓa ziti, əzelenin əzəm məlĩ na Maŋgəlva, əranən gagdak nani.

⁹ Mika maslay an daya dayday dəgəɗ vas pay adawgay də Satan aka gəbay na Moyis ɓa, dəda kiyən ətawwən əran ɓa abbər anah na: (Kəta Daya dəzga' suko).

¹⁰ Ya ɗiy vetiski, tahəŋ ərahnən zəga məs dəsənən ɓa. An məs asənaŋ na gəɓa zit va zəga mamayã ndən dədawzeti.

¹¹ Əray aketi, vi azbanənək tive na Kaynu, addoŋguk addəv əza na Balam ammba zəga nawrəha. Aɓoŋgoŋguk va Kore, azaŋka.

¹² Neti tahəŋ əziyaŋ hoyoŋko ara way kədawzəmaŋ na məlma nokum, tahəŋ əsapaŋ əzəm məza geslne ɓa, tahəŋ va slaybuwən ndiɗimndiɗim məza iŋkile ɓa məs səmyã adawka. Tahəŋ va wəleŋɗe məs də əgrak na dabya dayday na tahəŋ də uwa ɓa. Təɓələn sula amtaŋgə, məptiwti.

¹³ Tahəŋ va vovolumɗe metiŋgit a pehe də maslsla na wil net aketi. Tahəŋ va ngərzleɗ məzəbbalaŋgə məs məzeɓet faɗ addəv titir na guzliyo.

¹⁴ Enok dəhən Adamu məkuturkutur mabuhulon agəɗək kəleŋ aket dawnəh na: Yaŋ na Daya adek dit maslayɗe salala nan gabal kaklawɗe,

¹⁵ Vi kawtawwən aket ɗiy pakə. Karbə sit wil sit ɗiy mbəreyit aka wəza mambray net pakə, gəm aka əpel mbərayən məs mambrayɗe gəm ɗiy mbəreyit adawpeleŋ akan pakə.

¹⁶ Ɗiy veti, tahəŋ əpeleŋ wərwər əɓuhnən meti, əzbanən əsim zəga neti. Tahəŋ əgagdakanən ziti, tahəŋ əɗinən kiziti, vi dərəhaŋgən an məs aŋglaŋ.

Əzga narma ətafa ( 17-23 ) Əzga'a gəm əɗi wəna

¹⁷ Nokum na, bayneŋgiɗwa, məɗɗumon əpel məs maslənɗe na Daya nam Yesu Kristu apeleŋ sukumən lahəŋka.

¹⁸ Vi anah sukumənək na: Aba əgrak na dələv na: Ɗiy wamasaŋ akokum, wazbanən əsim zəga mbərayən neti.

¹⁹ Ndəɗaŋgəŋ muɗeketin ɗiyi, wən na gəɓa zit azəmək məlĩ aketi, tahəŋ də Əmpəs na Maŋgəlva ɓa.

²⁰ Ya nokum, bayneŋgiɗwa, məziwgin zengilokum aka ətaf nokum salala, də əkkam də Zeŋgile Salala.

²¹ Məga zukum addəv əŋgla na Maŋgəlva də əga ulasahã na Daya nam Yesu Kristu vi zeŋgile an faɗə.

²² Mərma vet ɗiy məs kiyit gərətgərətə.

²³ Məkõhgiti, migilgit səddəv offo. Mussoŋ də ulasahã gəm də geslne', məsla zukum, məzel lukut net məs gəɓa zit arnokon daydayə.

Əzaɓa ( 24-25 ) Əɗi kiya an bayma faɗə

²⁴ Sən Maŋgəlva nawɓap əgukum məza ətaŋgbãy ɓa, gəm nawziwgukum aba gagdak nan məza də heslepe ɓa də ənneke,

²⁵ sən Maŋgəlva taka, məs dəkõhgəm də Yesu Kristu Daya namə, səni Gagdaka, memetiŋge, əɓapa gəm əzəm məlĩ farfarə, kakaŋka gəm hã faɗə. Amin.