Zakarya 8 - Bible en Guidar

Iynama nassa fendeŋ də wəba

¹ Əpel na Yawe Məzuɓappak ade suka, amna:

² Vaŋ Yawe Məzuɓappak anahə: Sələh na wəŋgla na Siyon tay a makraw diyɗa, in tat əttəman wəŋgla nan tay əzlu a makrawa.

³ Vaŋ Yawe anahə: Nəmndawək a Siyon, in tat də gəla a Yerusalem. Kawyani Yerusalem na «walaŋgəla gegesiŋ», mossorgo metiŋ na Yawe Məzuɓappak na, «mossorgo metiŋ Salala».

⁴ Vaŋ Yawe Məzuɓappak apeli: Mezzeɗ mezeŋgleket dit muguluŋgit wassoŋ a Yerusalem əmpa, naway pak də mikke nan avan sən əzva neti.

⁵ Təki na walaŋgəla-metiŋ waknah dit kirni, mezeŋgleket dit muguluŋgiti, wasmayaŋ a təki nani.

⁶ Vaŋ Yawe Məzuɓappak anahə: An madembirgit ɗiy awlanənək va gərəŋ aka pay nan na, ama haraw tam wagəɗ gərəŋ sa? Yawe Məzuɓappak aɗiymani.

⁷ Vaŋ Yawe Məzuɓappak anahə: In yakəŋ əkõhgit ɗiy naw səka dələv nammba pay nampum gəm na moskoyo.

⁸ Wanəmilgiti, wassoŋ də gəla a Yerusalem. Wassoŋ ɗiy nawa, wanəsaw Maŋgəlva net də gegesiŋ gəm də təstəsə.

⁹ Vaŋ Yawe Məzuɓappak anahə: Məsok zukum, mənokum məzəprəmən əpel an məskəleŋɗe apeleŋ pay məɗi gabba Gəla na Yawe, gəm narkan Gəla na Maŋgəlva.

¹⁰ Vi tak pay nani, əfaɗ iya na ɗəf tay ɓa, wərəh tay aket zəgeɗ memeyẽɗ ɓa. Ɗəf tay məzugilyen may məzutoŋ zay aba məzuzel ɓa, vi nəppanək ɗəf pak əsilyen aka galani.

¹¹ Ya kakaŋ na, nəsaw na va lahəŋ də madembirgit ɗiyiŋ ɓa, Yawe Məzuɓappak aɗiymani.

¹² Vi wanəzlga zazaya, megezlembirke wawə, dəlvafuŋ wazaɓ zəga, disiŋ wazi minɗe nani, zəgeɗis pak wanipsit madembirgit ɗiy naw ka neti.

¹³ Mə Yudeɗ dit mə Israyelɗe, kəssoŋguk va ɗiy məreygit a weleŋgit ɗiy-ɗarə, vaski nədawkõhgukum, wakəssoŋ ka ɗiy məzeɓti. Kəgeslne'eŋ ɓa, məsok zukum.

¹⁴ Vi vaski Yawe Məzuɓappak apeli: «Va nərma wən nawgəɗ sukum mbərayən vi efiŋgiɗkum adansuwən gədəvwa, Yawe Məzuɓappak aɗiymani, nəddəɗan wən naw ɓa.

¹⁵ Vasna, makraw affetke, addəv pay kakaŋ na, nərmak wən nan nawgəɗ sukum moggon a Yerusalem gəm sit ɗiy na Yuda. Kəgeslne'eŋ ɓa.

¹⁶ Wən an kədaɗɗaŋ yaŋka: ɗəf pak dəpel wən gesiŋ sən galani; addəvit gəleɗe nawtawwən nokum, a memeŋgleɗe net walaŋgəleɗe gugriɗ nokum, mətawwən təstəs nawki zazaya;

¹⁷ ɗəf adaɗɗum mbərayən aka galan ɓa; kədasway ɗar ɓa; nəzelik zəgeɗis pakə, Yawe aɗiymani.»

Pay naɗɗa meme wakkpaŋ pay na wəzləra

¹⁸ Əpel na Yawe Məzuɓappak ade suka, amna:

¹⁹ Vaŋ an Yawe Məzuɓappak anahə, amna: Wəɗɗa meme na təla mapoɗoni, na təla masle'eni, na təla mabuhuloni gəm na təla makəlawan wassoŋ ka pay na hĩyã hĩyã də nanneke gəm wəzləra nannek viyit ɗiy na Yuda. Məŋglu gegesiŋ də zazaya.

²⁰ Vaŋ an Yawe Məzuɓappak anahə: Ɗiy naket dəlveŋge temtem, dit en na walaŋgəleɗe gugriɗ wazzoŋ ɗakɗak əmpa.

²¹ Ɗiy na walaŋgəla-metiŋ maɓɓan waddoŋ ənahaŋ sitin ɗiy naddəv maɓɓan na: «Məmbatgən əzzayan makra Yawe, kawkayan Yawe Məzuɓappakə. Naw pak wanəmbat tamə.»

²² Ɗiy diyɗa wazzoŋgu, gəm dəlveŋge gbogboŋɗe wazzoŋ a Yerusalem kawkayan Yawe Məzuɓappakə, gəm kazzayan makra Yawe.

²³ An Yawe Məzuɓappak anah yaŋka: Addəv pay nan na, ɗiy kəlaw naddəvit maɗe en ɗiy adawpeleŋ aket dəlveŋge warmanən gabba lukut na mə Yuda, dawnəh na: «Mam aka wəmbat də mənokum, vi məprəmək na: Maŋgəlva tay də mənokum.»