Zakarya 7 - Bible en Guidar

Wəɗɗa meme naɗɗumon əza na Yerusalem

¹ Aka əzva mapoɗon na Dariyus aka məlyã, Yawe apel sən Zakarya, də əvoŋ mapoɗon na təla mavaytakani, təla na Kislew.

² Ɗiy na Betel aslənənək Sareser daya naba məlyã gəm ɗiy nan kakkaman Yawe,

³ kassohẽt məsdəlveŋge məɗɗaŋ wəza addəv Gəla na Yawe Məzuɓappak gəm məskəleŋɗe na: «Nəhəmgən aka təla masle'en də əppet zəget nawzəm va nəɗɗa əzva gbaŋkəŋ sa?»

⁴ Yawe Məzuɓappak apel suka, amna:

⁵ Anah sit ɗiy naka dələv pakə, gəm məsdəlveŋge dawnəh na: «Gala kəɗɗaŋ meme, kəɓuhnən mokum aka təla masle'en də mabuhuloni, əzva kaklaw buhul kəɗɗaŋ meme, suwi kəɗɗaŋ meme van gesiŋ sa?

⁶ Ya pay kədawzəmaŋ də kədawsaŋ na, sən kiykum kədawzəmaŋ də kədawsaŋ ɓa sa?»

⁷ Aski əpel an Yawe anah də met məskəleŋɗe far pay Yerusalem asan fendeŋ, walaŋgəleɗe gugriɗ nan kiyən tərwəslə, Negev də dələv na Bagərəm məknihit dit ɗiy addəvit ɓa sa?

⁸ Əpel na Yawe ade sənək Zakarya, dawnəh na:

⁹ An Yawe Məzuɓappak apel yaŋka, amna: «Mətawwən aket ɗiy gesiŋ də moggoni, ɗəf pak dula sasãh məlməni.

¹⁰ Kədawsərnən met may gagəbaya, mitiwe molhõyõ gəm məssahã ɓa; kədaɗɗumoŋ naɗɗa mbərayən a mokrokum aka məlmukum ɓa.»

¹¹ Ya aɓoŋgoŋko, dəzgaŋ sləma ɓa; ndəɗaŋ kiyvet zloŋgoŋgu, sləmet dəsldəsl vi adaprəmnən ɓa.

¹² Akkpaŋganənək mekret va təbəz ɓəɓəla, vi adaprəmnən mahenziŋ də əpel an Yawe Məzuɓappak aslən sit də Əmpəs nan də met məskəleŋɗe en far ɓa. Makra Yawe Məzuɓappak affyõhək diyɗa.

¹³ Vaski «va nəye lahəŋ dəprəmnən ɓa, wayuwəni, ya nəprəm sit na ɓa, Yawe Məzuɓappak anahə.

¹⁴ Nətəraygitik aket dəlveŋge məs dəsinin ɗah ɓa temtemi. Dələv arayək dərɓegeti, əgilye tay ɓa, ətoŋ tay ɓa. Akkpaŋganənək dələv moggon ka muyã ɗarə.»