Zakarya 6 - Bible en Guidar

Ula madodopoɗoni: mawteɗ nawgay poɗo

¹ In həmsak le'gən harawa, in təm mawteɗ nawgay yeŋ poɗo əgilyoŋ sə weleŋgit mossorgoɗe gugriɗ sula, mossorgoɗe gugriɗ na təbəz pepreŋge.

² Mawta maddaabəŋ mətokən ammbet pilseŋge pepreŋɗe; masulan ammbet pilseŋge tuturɗe;

³ mawta mahoketi, mətokən ammbet pilseŋge babarɗe, gəm mapoɗeti, ammbet pilseŋge borzlozlo də pepreŋ gbogboŋɗe.

⁴ Yaŋ nəzlan nəssohõn maslay dədawpel də in naka: «Daya nawa, miy adarbaŋ kandi?»

⁵ Maslay nak azlan anah suwa: «Eŋ səmyẽŋge poɗo na disiŋ dəgilyoŋ səza aziweŋ aba Afən dələv gboŋgu.»

⁶ Wətok net pilseŋge tuturɗe ambatək dəka dələv na kəla disiŋ. Babarɗe azbetini, en borzlozlo də pepreŋ azet tam adawmbataŋ dəka dələv na kəla dohoŋ.

⁷ En gbogboŋɗe agilyoŋko, met aka əmbat əbbalan dəlvafuŋ. Yawe aɓsit na: «Məddoŋ məbbalan dəlvafuŋ.» Abbalanənək dəlvafuŋ.

⁸ Ndən dah iyuwa, amna: «Awle en dəgilyoŋ səka dələv na kəla disiŋ, aprikgininək Əmpəs naw aka dələv na kəla disiŋ.»

Mətərkiya na meleŋge aka Yosuwa

⁹ Əpel na Yawe adek azaw dawnəh na:

¹⁰ Ataf əvəl səvet ɗiy misimgiti, may Helday, Tobiya də Yedaya akiyaŋgə. Atoŋ is sən kiyuk dəpaŋka, atoŋ eŋgil ana Yosiya wətən Sefanya da, əgap net yaŋ kakaŋ sə Babilon adaka.

¹¹ Kəgəmgən təbəz babar də an na meleŋge, kəɗɗaŋgən mətərkiya dənditi, kəɗup səngən aka Yosuwa, wətən Yosadak, daya net məsdəlveŋge.

¹² Kənah səngəni, is na: An Yawe Məzuɓappak anah yaŋka, amna: Ɗəf yaŋ iya nan na Maməŋkənzeŋve, sə gəla tələn zeŋgile adawgilyeni, warka Gəla na Yawe.

¹³ Ndəni narka Gəla na Yawe. Ndəni nawgul lukut na məlyã, wasan aka mazaŋga nan kawzəm məlyã. Məsdələv wasan aka mazaŋga nan tamə, wəsler na zazay wasan gərak a weleŋgit sulegiti.

¹⁴ Mətərkiya wassan addəv Gəla na Yawe, kaɗɗumet may Helday, Tobiya, Yedaya gəm Hen wətən Sefanya.

¹⁵ En məs faraɗa wazzoŋ karka Gəla na Yawe, wakəsənnən na, Yawe Məzuɓappak dəslənu azokum. Wagəɗə, an mənokum tat əprəm ma Yawe Maŋgəlva nokum lewlewi.