Zakarya 3 - Bible en Guidar

Ula mapoɗoni: Yosuwa daya net məsdəlveŋge

¹ Yaŋ arban su Yosuwa, daya net məsdəlveŋge ziwwe aba maslay na Yawe gəm Məzəmkiya ziwwe aka va dəzəŋ nan kawzəm kini.

² Maslay aɓsən Məzəmkiya na: «Yawe dəslaŋguko Məzəmkiya; kəta Yawe məs dəwel Yerusalem dəslaŋguko. Ɗəf aŋ van motoffo məgdəhən səkoffo yi ɓa sa?»

³ Yosuwa tay ziwwe aba maslay dit lukutɗe mərgẽ'it azani.

⁴ Maslay aɓsit ɗiy en ziwziw nabani, amna: «Məggbuk sin lukutɗe mərgẽ'it nazani.» Sissiŋ anah sən Yosuwa na: «Awle, nəzargənək heslepe nok səzoko, in tat əgul suk lukutɗe kukuɗɗe.»

⁵ Yaŋ nəmna: Dətər sənən mətərkiya an salala aka kini, yaŋ atər sənən mətərkiya an salala aka kini, agul sənən lukutɗe. Maslay na Yawe tay ziwwe.

⁶ Sissiŋ maslay na Yawe apel sən Yosuwa aɓsən na:

⁷ An Yawe Məzuɓappak anah yaŋka: «An is tat ədaw aka tive nawa, an is tat ərma wəsəɓɗe nawa, wakəsok daya aka gəla nawa, gəm wakəga daŋglaɗe nawa, wanəpsuk tive nawtoŋ aweleŋgit en ziwziwiŋki.»

Maŋgəlva waɗɗa məgəɗ wəza nan dədegini

⁸ Aprəm ɗa Yosuwa, daya net məsdəlveŋge, is dit geleŋgiɗuk en dəssoŋ ɗewɗew aboko, vi ndəɗaŋgə ɗiy dədawlaŋ an nabe: Vi in yakəŋ əɗɗa ka məgəɗ wəza naw dədegini, iya nan na, Maməŋkənzeŋve.

⁹ Vi gərəm yaŋ nəɗi aba Yosuwa. Gərəm məs haran buhulu, in yakəŋ əver an nawver akani, Yawe Məzuɓappak aɗiyman na, wanəzan heslepe naka dəlvəŋ addəv pay taka.

¹⁰ Yawe Məzuɓappak aɗiyman na, pay dəpaska, ɗəf pak waya galan wassoŋ də maɗɗulet ammbet megezlembirkeɗ gəm ammbet sokoyeɗi.