Zakarya 2 - Bible en Guidar

Ula masulani: mohõŋɗe dit məŋzleŋge

¹ In haraw le'gən na, nəwəl na, mohõŋɗe poɗo yeŋki.

² Yaŋ nənah sən maslay məzupel də in naka: «Məŋgə eŋ vet di?» Yaŋ aɓsu na: «Eŋ mohõŋɗe dətrayanən Yuda, Israyel gəm Yerusalem əŋgə.»

³ Yaŋ Yawe arbə su məŋzleŋge poɗo.

⁴ Yaŋ nəmna: «Eŋ miy azzoŋ əɗɗaŋ di?» Azlan suwa amna: «Eŋ Mohõŋɗe dətrayanən Yuda hã gap ɗəf təttaka tay dəslan kiyən a disiŋ ɓa. Məŋzleŋgeŋ azzoŋ na kawgeslne'giti, kanzlu mohẽt dəlveŋge məs dəsilgənən mohẽt aka dələv na Yuda atərayanən naka.»

Ula mohokoni: helege nawsla zəga

⁵ In haraw le'gən na: Yaŋ nuwəl ɗəfa, helege nawsla zəga avan kawwa.

⁶ Nəssõhon na: «Aŋga kədaddok di?» Yaŋ aɓsu na: «Əsla Yerusalem, kawla zezek nan də slosloprok nan gbaŋgbari di?»

⁷ Yaŋ maslay dədawpel də in nak agili, maslay maɓɓan pay ələmsəni.

⁸ Yaŋ aɓsu na: «Anzok anah sən wiyən ndaka, is na: Yerusalem wasan va walaŋgəleɗe gugriɗ məs kiyit viŋŋge, vi ɗiy dit zəgeɗ memeyẽɗ nassoŋ addəvən diyɗaŋka.

⁹ Yawe aɗiyman na: Naw wanəsaw ka zlava na offo kiyən tərwəslə, wanəkkpaŋ ka gagdak addəvni.»

Yawe tay əmnda iye ɗiy məsimgiti

¹⁰ Haya! Haya! Mənzoŋ səka dələv na kəla disiŋ, Yawe aɗiymani, vi də tapaslay pay poɗo nətəraygukum, Yawe aɗiymani.

¹¹ Haya! Siyon, akõhgən kiyko, is məs kəsok də gəla a Babilon əŋka.

¹² Vi an Yawe Məzuɓappak anah yaŋka: aslənu də gagdak azet dəlveŋge məs dəgəmkumən ka ərəh na mawgaya: «Vi ɗəf an dərəŋgukum pak mawyãk haran arəŋgəni.»

¹³ Vi in yakəŋ əslan vaw aketi, wakkpaŋgaŋ ka ərəh na mawgay net belemɗe neti. Wakəsənnən na, Yawe Məzuɓappak dəslənwa.

¹⁴ Aɗɗələ, anneken zuko, waŋ na Siyon, vi in yakəŋ əzzawa, wanəsaw də gəla addəvko, Yawe aɗiymani.

¹⁵ Pay dəpas na, ɗiy diyɗa dədawsapaŋ aza Yawe. Wakkpaŋgaŋ ɗiy nawray vawa, wanəsaw anokda. Ya wakəsən na Yawe Məzuɓappak dəslənu azoko.

¹⁶ Yawe wagəm Yuda ka nawray van səka Dələv Salala gəm wamndan uwel Yerusalem əmpa.

¹⁷ Ɗəf pak dəsan semsem aba Yawe, vi tay əfɗah sə təki nassa nan salala.