Zakarya 12 - Bible en Guidar

Əsərŋgəsl na Yerusalem gəm əbit nani

¹ Wətəlma. Əpel na Yawe aka Israyel. Yawe məs dəppar disiŋ gəm dəɗi dəlvafuŋ aɗiymani, məs dəzəməɗ əmpəs na ɗəf titir addəvni:

² In yakəŋ əkkpaŋgan Yerusalem ka huloŋguk na mbazla nakkpaŋgan kiyit ɗiy en dətərwəslnən pakə. Na Yuda pak wasan məstaka'e va pay məsərŋgəsl Yerusalem.

³ Dəpas na, wanəɗi Yerusalem va gərəm beppe məza awsla ɓa abet ɗiyi. Ɗiy en dəŋglaŋ əslanən pak waplote. Ɗiy naka dəlvafuŋ baymet wasapaŋ akani.

⁴ Yawe aɗiyman na, dəpas wanətemgit pilseŋge gəm məpeŋgeŋ aket ka məs taggbelemɗe, haraw wasan sekke aket ɗiy na Yuda, ya pilsəŋge naket dəlveŋge meɓɓet pak wanətip daŋgar.

⁵ Deyeɗe na Yuda wanahaŋ a mekret na: «Ɗiy na Yerusalem əŋ gbogboŋ nam dəka iya na Yawe Məzuɓappak Maŋgəlva neti.»

⁶ Pay nan dəpas na, wanəkkpeŋget ɗiy na Yuda va kasli noffo məsɗan addəvit wəleŋɗe ŋgərəɓə, vit va offo mətalən addəvit maŋgavɗe. Wazimnin ɗiy dətərwəslaŋ kiyiti, dəka dəzəŋ gəm dəka zlaɓay pakə. Ɗiy wassoŋ a Yerusalem əmpa a gəlet va lahəŋka.

⁷ Yawe wakõhgit gizlirkeɗe na Yuda daabəŋ, vi zev Davit adawɗi kiyzəni, may ɗiy dəssoŋ a Yerusalem adawɗiynən kiyzit na, adayaŋgək kiyit ɗiy na Yuda ɓa.

⁸ Pay nan dəpas Yawe wazeŋ aret ɗiy na Yerusalem: ɗəf məhuyukhuyuk naret dəpas na, wasan va Davit, gəla na Davit tam va Maŋgəlva, va maslay na Yawe abeti.

Əhəm na gəlabay addəv dələv pakə

⁹ Dəpas na, wanəkay tive nawzet dəlveŋge məs dəzzoŋ aka Yerusalem pakə.

¹⁰ Wanəknəh zev Davit gəm ɗiy na Yerusalem də əmpəs moggon gəm nakkama. Wawlaŋ azawa, in ɗəf məs ambokoŋ naka. Waɓuhnən met ammban va adawɓuhoŋ ma ammba wiyən karmalay. Waskaŋ morkoyo ammban va adaskaŋ morkoyo ammba uwa maddaabəŋ.

¹¹ Pay nan na, əhəm a Yerusalem wasan diyɗa va əhəm ki Hadad-Rimmon a walaŋ na Megiddo.

¹² Dələv wahəmə, mahəlfa pak takərgəni: zev Davit temme, gil net tam temme; mahəlfa na Natan temme, gil net tam temme,

¹³ mahəlfa na gəla na Levi temme, gil net tam temme; mahəlfa na Simey temme, gil net tam temme;

¹⁴ mahəlfaɗe meɓɓet pak tem temi, gil net pak tem temi.