Zakarya 10 - Bible en Guidar

Əssõh a ma Yawe, məza a met tuyeŋge ɓa

¹ Məssõh buwən na mawala a ma Maŋgəlva. Yawe yi məzuki buwən də səmyã gəm an maŋgalaw; gəm zəga na mabardaw sən ɗəf pakə.

² Vi terafimɗe wən ɗar apeleŋgi, məskaŋ helig tepelke awlaŋgə, dit issineɗ ɗar adazzayanən mekreti. Vini ɗiy adaddoŋ də met va gilew tiŋgbirtiŋgbir məza məzutaɗa ɓa.

Wənmiyna na əbite

³ Aket məzuteɗeŋɗe gədəvu adə, aket porsokɗe nədawsilyewa. Vi Yawe Məzuɓappak azgək sləma aka gazlaŋ nani, gəla na Yuda. Akkpeŋgetik va pələs narban gagdak nan a ma əlpa.

⁴ Səzan gərəm naka ədoɗ na gəla, məpyoko nampa gizlirke, bəle nawgaya, səzani deyeɗe adawgilyoŋ aka mataka.

⁵ Wassoŋ va gambereɗi, məndapanən ndərɓa aket tiveɗ də əlpa. Walpaŋgə, vi Yawe tay dənɗaŋ, ɗiy dəpeŋgeŋ aket pilseŋge warbaŋ wili.

⁶ Wanəɓɓəlet ɗiy na Yuda, wanəkõhgən gəla na Yosef. Wanəzi də gəla, vi wanula sasẽhti, wassoŋ va nəzget ɗah ɓa, vi Yawe Maŋgəlva net nani, wanəzlan a meti.

⁷ Ɗiy na Efrayim wassoŋ va gambereɗi, mekret wannek va asaŋ mbazla. Kirtit wannekeŋ də uleti, makret wagəɗ haɗak vi Yawe.

⁸ Wanəffon sit mohõ, wanəkkeleti, vi nəbitike, wawanən kiyit diyɗa gba lahəŋka.

⁹ Wanətreyet aweleŋgit ɗiy nammba dəlva, ya sə faraɗa dayday waɗɗumowəni, wassoŋ dit kirtiti, ya wamilyoŋgu.

¹⁰ Wanəmilgit səka dələv na Eziptə gəm wanəkkelet sə Asiri. Wanətoŋgit aka dələv na Galad gəm a Liban, də as pak təki wagəs siti.

¹¹ Waggaraŋ ki pehe nawzəm sahã, Yawe warge vovolumɗe na pehe. Kpukpum na Nil pak waŋkələ. Wəkaɓ na Asiri wavoŋgu gəm zleŋge na məlĩ na Eziptə wazarə.

¹² Wanəkkpeŋget məs mekret də iya na Yawe, aka iya nan adawdawaŋgə, Yawe aɗiymani.