Zakarya 1 - Bible en Guidar

Alabaraɗe nassaka gəm əga ( 1:1—8:23 ) Yawe tay iye mə Israyelɗe

¹ Aka təla madodopoɗoni, də əzva masulan na Dariyus aka məlyã, əpel na Yawe agap aza məskəleŋ Zakarya, wətən Berekiya, wətən Iddo dawnəh na:

² «Yawe adək gədəv dərwadərwa aket efiŋgiɗkum.»

³ Kənahgən sit na: «An Yawe Məzuɓappak anah yaŋka: Məmil azawa, Yawe Məzuɓappak aɗiymani, vasna, wanəmil azokum, Yawe Məzuɓappak anahə.

⁴ Kədassoŋ va efiŋgiɗkum en məskəleŋɗe maddaabəŋ adawyetin lahəŋ də wənahaŋ na: “An Yawe Məzuɓappak adawnəh yaŋka: Məmili, məppan tive nokum mbərayən də wəza nokum mbəraynəŋka,” ya dəprəmaŋ ɓa, dəzgaŋ sləma akaw ɓa, Yawe aɗiymani.

⁵ Ŋgahəŋ efiŋgiɗkum di? Məskəleŋɗe wassoŋ mederet faɗ sa?

⁶ Wəpel nawa dit mahenziŋɗe naw en nəɗi sit wən nan sit gewleɗ naw məskəleŋɗe, dəgepnin efiŋgiɗkum ɓa sa? Yaŋ amilyoŋ anahaŋ na: Vaski Yawe Məzuɓappak aziwgin wən nan nawgəɗ səm va tive namə gəm va wəza namə, vas vani agəɗ səmə.»

Ula maddaabəŋ: pilseŋge

⁷ Də əvoŋ kaklaw sula kiyən poɗo na təla makəlaw kiyən taka, təla nan na Sebati, aka əzva masulan na Dariyus aka məlyã, əpel na Yawe ade sən məskəleŋ Zakarya, wətən Berekiya, wətən Iddo, dawnəh na:

⁸ Nəwələk ɗəf aka pələs pepreŋ na dəfɗa: tay ziwwe aret silimɗe, hã addivit adaka, dərɓagan na, pilseŋge pepreŋɗe, hoyoŋko-hoyoŋko gəm babarɗe.

⁹ Yaŋ nəmna: «Məŋgə en di Daya nawa?» Maslən məzupel də in nak aɓsu na: «Naw wanərban suk na məŋgə di.»

¹⁰ Ɗəf dəziw aret silimɗe nak azlani amna: «En məs Yawe aslən əbbalan dəlvafuŋ əŋgə.»

¹¹ Azlan sənən maslən na Yawe məs ziwwe aret silimɗe naka, aɓɗaŋ na: «Məbbalanək dəlvafuŋ, dəlvafuŋ dit ɗiy nakan, dəwənnan tay kiyən foŋgo əffete.»

¹² Yaŋ maslay na Yawe azlani amna: «Yawe Məzuɓappak, hã gap dewɗe kula na sasãh Yerusalem ɓa dit walaŋgəleɗe gugriɗ na Yuda en məs kədəgədəv aket əzva kaklaw buhuləŋ di?»

¹³ Yawe azlan sən maslay dədawpel də in nak də əpel moggoni, əpel nazzayan makra ɗəfa.

Yawe tay əmnda əwel Yerusalem

¹⁴ Maslay dədawpel də in nak aɓsu na: «Aslan wəloko, anah na: Vaŋ Yawe Məzuɓappak anahə: Sələh tay əɗɗəm ammba Yerusalem də Siyon. Sələh an dərwadərwa.

¹⁵ Makraw fiyõh fiyõhĩ aket dəlveŋge məs dərəhən kiyti; vi naw gədəvu siɗikke adə, ya net abbahaŋ sənənək əraya.

¹⁶ Vini Yawe anah na: Wanəmndaw aza Yerusalem də ula sasãhni, Karkani Gəla naw adak əmpa, Yawe Məzuɓappak aɗiymani. Kawpakni helege aka Yerusalem.»

¹⁷ Atəlma əmpa dawnəh na: An Yawe Məzuɓappak anah yaŋka: «Walaŋgəleɗe gugriɗ naw waknəhaŋ dit aryeɗ əmpa. Yawe waffeten makra Siyon əmpa, gəm wawel Yerusalem əmpa.»