Yosuwa 9 - Bible en Guidar

Əsler dit ɗiy na Gabawən

¹ Səza milyeŋge na dəgar ki Yurden beymet aprəmən wən nani, vasna: En naket gərmeŋge, a təki məpəlayya, may ama məlpa, təŋ sə ma pehe naddak təki hã gap a Liban. Ndəɗaŋgə kan mə Hittiɗe, mə Amorɗe, mə Kana'anɗe, mə Perziɗe, mə Hivviɗe dit mə Yebusɗe

² aynanən met kawgay də Yosuwa gəm dit mə Israyelɗe.

³ Ɗiy na Gabawən aprəmənək an Yosuwa agəɗ sən Yeriko də Ay;

⁴ Yaŋ net tam aɗɗaŋ kukete: Akiyaknin gabalɗe mizvet aket korɗe neti, gəm kwenekweneɗ na mbazla mbəreyti, məŋgerti, məŋgboheti;

⁵ Akkpa'aŋ hensek mbəreyit mətoketi, aguloŋ lukutɗe mə gizigizi, yaŋ agəmaŋ peŋ meklakan məmmusən.

⁶ Addoŋ ərəh Yosuwa a dibirgidik a Gilgal, yaŋ aɓsənən Yosuwa dit mə Israyelɗe na: «Səka dəlev faraɗa məde, yaŋkəŋ na, mam aka kəɗɗaŋgən wənmiyna də mənamə.»

⁷ Yaŋ mə Israyelɗe azlan sitin mə Hittiɗe na: «Kuzuŋ azam aŋ kənanaŋ go'o soko? Vasna mbarmbar mədaɗɗa wənmiyna də mənokum di?»

⁸ Yaŋ aɓsənən Yosuwa na: «Gawleɗ nok mənani.» Yosuwa assohẽtke: «May nawa kənanaŋ di? Gəm səŋga kəzzoŋ di?»

⁹ Aɓsənən na: «Mənam gawleɗ nok hã səka dələv faraɗa diyɗa məde, aka wən na iya na Yawe Maŋgəlva noko. Vi məprəmək an agəɗ a Eziptə

¹⁰ may an agəɗ sit milyeŋge sula net mə Amorɗe, məs dəssoŋ dəgar ki Yurden, anet may Sihon məlĩ na Hesbon, gəm Og məlĩ na Basan, məs dəsan də gəla a Astarot.

¹¹ Ɗiy gugriɗ namə, dit ɗiy naka dələv nam pak, dəsəɓaŋ səmən də wənah na, məndə zəga nawzəm aka tive, məddoŋ ələmsiti, kənahaŋ sitingin na, nam gewleɗ nok mənani. Kakaŋ na məgəɗ səm wənmiyna.

¹² Awla peŋ naməŋka: gala məgul a gabal anamda pay misil əzzam anokumda na, offo azan kãhi; yaŋ na, aŋkəlka gəm ammusko.

¹³ Kwenekweneɗ na mbazla yeŋkiŋ, aka miknih na, meleketetiŋ, ewle, aŋgaraŋka; lukutɗe nam dit hensekɗe nam yeŋ mərayit, sən miydi na, tive zezek day.»

¹⁴ Yaŋ atafən zəga nawzəm səvet ɗiy net məza əssõhõn səsõhsa Yawe ɓa.

¹⁵ Yosuwa arəmək bayna dənɗaŋ, agəɗ sitik wənmiyna na abey na ɓa; ɗiy gugriɗ net mə Israyelɗe aswayaŋ sitinke.

¹⁶ Yas kan, əvoŋ hoku səza aynan wənmiyna aweleŋgit na, mə Israyelɗe aprəmnən na, mbaraka ɗiy vet meggetiŋgə, a waleŋtiŋ də gəla.

¹⁷ Mə Israyelɗe asilyoŋ addoŋ, atoŋgoŋ aka pay mohoko'ən a walaŋgəleɗe gugriɗ net a Gabawən, Kefira, Berot gəm Kiryat-Ye'arim.

¹⁸ Mə Israyelɗe dəbeynin ɓa, vi ɗiy gugriɗ net aswayaŋ sitinik də iya na Yawe, Maŋgəlva na Israyel. Ɗiy aɗɗaŋgək gburgbur aket ɗiy gugriɗ vet diyɗa.

¹⁹ Ndəni ɗiy gugriɗ anəhaŋ sit ɗiy na: «Məsway sitik də iya na Yawe, Maŋgəlva na Israyel na; kakaŋ na mərəŋgit na ɓa.

²⁰ An mədawgəɗ sit yaŋka: mədaw beyit ka ədagədəv na Yawe dədegən akam ɓa, vi əsway an məsway siti.»

²¹ Ɗiy gugriɗ apeleŋ aket na: «Məppet səm medereti!» Yaŋ akkpaŋgaŋ məkayaŋ seseme gəm məmbaɗaŋ iŋkile sit ɗiy pakə, va ɗiy gugriɗ anahaŋgə.

²² Yaŋ Yosuwa kan aye mə Gabawənɗe, aɓsit na: «Mi dəray kəmbəɗamən dərwa, kənəhaŋ na sə faraɗa kəzzoŋgu, ya mbaraka gəla nokum go'oy də mənam di?

²³ Gəgaŋ na, məraygukum kənanaŋ, baymokum, kəffeteŋ na dasso belemɗe ɓa. Nokum seseme kədawkayaŋ, gəm əmbaɗ iŋkile sən gəla na Maŋgəlva nawa.»

²⁴ Azlan sənən Yosuwa, aɓɗaŋ na: «Məprəmək na, Yawe Maŋgəlva nok, anah sənək gawla nan Moyis na, wapsukum dəlvəŋ baymani, vasna kəbeyningin ɗiy nakan pakə. Geslne adəmək diyɗa sukum, vini məɗɗa vaska.

²⁵ Yaŋ na, ammba vok mənani, agəɗ an mokrok aŋgəl də mənamə.»

²⁶ An Yosuwa agəɗ sit yaŋka: Atekik mə Israyelɗe dawbeyti,

²⁷ Təŋ dəpaski Yosuwa akkpeŋget ka məkayaŋ seseme, gəm məmbaɗaŋ iŋkile sit ɗiyi, may sən gəlamatuya na Yawe, a təki an awel hã gap dəpaŋka.