Yosuwa 8 - Bible en Guidar

Va məzla Ay

¹ Yawe aɓsən Yosuwa na: «Geslne aduk ɓa, kəppan zuk ɓa. Asili, ande ɗiy nalpa nok beymeti apeŋ dok əwak sən Ay. Awla, nəpsukuk məlĩ na Ay dit ɗiy nan pakə, də walaŋgəla-metiŋ nani, də dələv nan pakə.

² Kəgəɗ səngən Ay də məlĩ nan va kəgəɗ sən Yeriko də məlĩ nani. Ya aka aŋ na, wakəɓapənən ənda arya nani dit zəgeɗ memeyẽɗ nan ka nokum. Kəvoŋ sənəgən walaŋgəla-metiŋ van sə kəla dərɓagani.»

³ Yosuwa dit ɗiy nalpa nan pak le' vi kawpeŋ əwak sən Ay. Awelik zel gabal kaklaw hoku guromɗe nalpa aslin də dəfɗa.

⁴ Apel sitike amna: «Mula, kəla dərɓaga walaŋgəla-metiŋ vanəŋ kədawvoŋgoŋ səni; kədaddoŋ farafara səzan ɓa, məssoŋ baymokum pak məsla zukum.

⁵ In tam dit ɗiy en dəssoŋ dəndu na, məddergən aza walaŋgəla-metiŋgin vani. Pay ɗiy adawgulyoŋ ələmsəm na, mənzamgən abet va maddaabəŋ naka,

⁶ wagulyoŋ ammbam hã mənam kagdehet faraɗa səza walaŋgəla-metiŋ, vi wanəhaŋ a mekret na: “Tay ənzoŋ səmən va maddaabəŋ naka,” ya wamənzam abeti.

⁷ Asna, kəgulyoŋgən pissim sə təki kəɗamaŋgə, kətakəngən walaŋgəla-metiŋ van kana; Yawe Maŋgəlva nokum wapsukum ammba vokum.

⁸ An kətakənək walaŋgəla-metiŋ van na, mənokum offo ta' səni; va əpel na Yawe kədaɗɗanəni. Wən an nəɗi sukum yaska.»

⁹ Yosuwa aslinike, addoŋguk a təki nawsoro; ateheŋ a walaŋ Betel də Ay, dəmmba pay na moskoy na Ay. Dəfəɗ dəpas na, Yosuwa kim a weleŋgit ɗiyi.

¹⁰ Yosuwa asilik də pummo nan pumə, asəŋgləket ɗiyi, siske apeŋ əwak sən Ay, ndən dit ɗiy məsɓet na Israyel abet ɗiyi.

¹¹ Ɗiy nalpaŋ beymet məs dəssoŋ dəndən apeŋgeŋke, adawaŋka, agapaŋgək ama hara walaŋgəla-metiŋ, ateheŋ də disiŋ ki Ay, walaŋ məzzoro duɗeket də Ay vani.

¹² Yosuwa andək zel gap gabal sle' azi a təki nawsor a walaŋ Betel də Ay dəmmba pay na moskoy na walaŋgəla-metiŋ vani.

¹³ Ɗiy averinik dibirgidik net disiŋ ki walaŋgəla-metiŋ, məgaɗe na dirɓe tam assoŋguk dəmmba pay na moskoy na walaŋgəla-metiŋ vani; dəfəɗ dəpas na, Yosuwa mbat a təki məpəlayya.

¹⁴ Adan məlĩ na Ay awla vasna, ndən dit ɗiy nan sə walaŋgəla-metiŋ zit gəm əgulyoŋ, vi kawmbat ələmsit mə Israyelɗe kalpa dənɗaŋ ama hara təki adawyaŋ Araba, ya dəsən na məvoŋ səni sə kəla dərɓaga walaŋgəla-metiŋ ɓa.

¹⁵ Yosuwa dit mə Israyelɗe beymet mbagən ziti, ənzoŋ kəla kapta-muyã.

¹⁶ Məkkeleti ɗiy na Ay beymet vi kazbeti. Azbetin may Yosuwa yaŋ agdehet faraɗa səza walaŋgəla-metiŋ.

¹⁷ Ɗəf mizilin tay dəmbər təttaka a Ay gəm a Betel məs dəzbet mə Israyelɗe ɓa ɓa. Appanənək memeŋgle na walaŋgəla-metiŋ viŋŋge aka adarɓehetin mə Israyelɗe.

¹⁸ Yaŋ Yawe aɓsən Yosuwa na: «Atəl tulhõ navokəŋ dəka Ay, vi nəpsukuk avoko.» Yosuwa atəl tulhõ navan nak dəka walaŋgəla-metiŋ vani.

¹⁹ Ɗiy en dəvoŋ sənən walaŋgəla-metiŋ nek arɗiyaŋ də kakara sə gəleti, adan atəl van ləŋgə, anzoŋ agulnən walaŋgəla-metiŋ naka; agəmnən zit əɗi sən offo.

²⁰ Ɗiy na Ay heret kpaŋgən dirɓe, dulaŋ na enene serweɗ serweɗ a disiŋ aka walaŋgəla-metiŋ. Kuket net tay nanza dəŋgadi dayday ɓa, vi mə Israyelɗe məs dədanzoŋ kəla muyã nek pirvik ələmsit ɗiy en məzərɓehetini.

²¹ Yosuwa dit mə Israyelɗe beymet awlanənək na, ɗiy en dəvoŋgoŋ sənən walaŋgəla-metiŋ nek amõhnənka, enene tahəŋ akan serweɗ serweɗi; amulyoŋ abeyetin ɗiy na Ay.

²² Mə Israyelɗe meɓɓet sə walaŋgəla-metiŋ nek viteŋ ələmsiti; ɗiy na Ay arəhən zit addakit mə Israyelɗe eŋ dahã eŋ dahã, mə Israyelɗe abeyetin ɗiy na Ay məza mbəksa madaran ɓa məza an dəkõh ɓa,

²³ armanən məlĩ na Ay vani, akinən madaran sən Yosuwa.

²⁴ Adan mə Israyelɗe agrakin əbey ɗiy na Ay awra a kapta-muyã a təki məs ezbetin adak nak də əmbokit də masalam hã ndəɗaŋ zamaŋ kakãhə, mə Israyelɗe beymet kan pirvik aza Ay, amboknin ɗiy nadak beymet də masalam.

²⁵ Ɗiy en məbay pay dəpas pak aɗɗaŋgək zel dit gil sap gabal kəlaw kiyit sula, pak ɗiy na Ay.

²⁶ Yosuwa dəvoŋgən van məs dətəl tulhõ nak ɓa hã ɗiy na Ay beymet kəkãhə.

²⁷ Yaŋ mə Israyelɗe andanən zəga nawrəh na ma wəgay va zəgeɗ memeyẽɗi may arya na walaŋgəla-metiŋ van ka neti, əzban əpel na Yawe aɗi sən Yosuwa.

²⁸ Yosuwa azlak Ay kpaŋgən va kiməski məɓzluwən hã pay dəpaŋka.

²⁹ Ndən ana məlĩ na Ay aka wəlaŋga law əlawən, tondoroŋgo hã moskoyo. Də pay priŋpriŋ kan, Yosuwa anah sit ɗiy dəprikgənəngən kigəbay nan səka wəlaŋga. Yaŋ məzgan go'o də mahara walaŋgəla-metiŋ, məkkelet gərmeŋge akan kpew, tahəŋ hã dəpaŋka.

Əŋɗan ɗerewel na mahenziŋ aka gərəm na Ebal

³⁰ Yosuwa arkək gəlamatuya aka mossorgo na Ebal sən Yawe, Maŋgəlva na Israyel,

³¹ va an Moyis, gawla na Yawe appan wən nan sit mə Israyelɗe, əpel məverin addəv ɗerewel na mahenziŋ na Moyis na: gəlamatuya mərkan dit gərmeŋge ŋgbuɓo ŋgbuɓo məs təbəz dəne' ezet ɓa. Yaŋ adaŋ əvəl nawzla kurmbuɗuk adak sən Yawe, gəm azaɓaŋ-Maŋgəlva nawki zazaya.

³² Aket gərmeŋge adaki kan Yosuwa aver mahenziŋ məs Moyis aver a maheret mə Israyelɗe naka.

³³ Mə Israyelɗe beymet dit ɗiy gugriɗ neti, dit məzuvereŋ neti, mətawaŋwən neti, assoŋguk ziwziw dahãdahã, heret sek aket məsdəlveŋge mə leviɗe məs dəslanən akoti na wənmiyna na Yawe, sap dit molhõyẽɗi məstaka dit kirtindəlva. Wəɗak net aba mossorgo na Garizim, wəɗak net maɓɓan aba mossorgo na Ebal, va Moyis gawla na Yawe aɗi wən nan vi kawɗi əzaɓ aket mə Israyelɗe daabəŋ.

³⁴ Dərɓaga asna, Yosuwa aŋɗan əpel naddəv mahenziŋ gərakə: na əzaɓa may net mefɗeke, va məverin gərak addəv ɗerewel na mahenziŋ.

³⁵ Əpel tay təttaka səra an Moyis aver məza Yosuwa dəŋɗan ama hara əsap net mə Israyelɗe gərak ɓa ɓa, dit gil net ereti, kirtiti may molhõyẽɗ məs dəssoŋ a weleŋgiti.