Yosuwa 7 - Bible en Guidar

Mbərayən na Akan gəm wən an mətawən akani

¹ Mə Israyelɗe aggaraŋgək ki mahenziŋ dəwəlsən zəga mətakən: Akan wətən Karmi, wətən Zabdi wətən Zera səddəv mahəlfa na Yuda, agəmək zəga an mətakən, yaŋ Yawe ake herɗe nan aket mə Israyelɗe.

² Hã sə Yeriko Yosuwa aslən ɗiy a Ay dəsan a maŋgava Bet-Awen, dəmmba pay nampum na Betel də ənah sit na: Yawe amna məpeŋ məseŋger səmyã na dələv vani. Zel vetis peŋ aseŋgerin səmyã Ay vani,

³ amilyoŋ aza Yosuwa, aɓsənən na: «Ɗiy apeŋgeŋ pak ɓa! Zel gabal sula may gabal hoku dəpeŋgeŋ əzla Ay! Kəɗiwən nan aket ɗiy beymet ɓa, vi ɗiy nadak vet tahəŋ dədaya ɓa.»

⁴ Ndəni zel gap gabal hoku kan apeŋgeŋgi, yaŋ anzoŋ sit zel na Ay neki.

⁵ Zel na Ay abayaŋ gap kaklaw hoku kiyit sləre səmmbeti, erɓehetin təŋ sə mahara walaŋgəla-metiŋ, hã a Sevarim; abeynin aka əsereh sədaka. Mekret mə Israyelɗe aɓohko, kpaŋ va iŋkile.

⁶ Yosuwa dit ɗiy gugriɗ na Israyel lukutɗe səzet ngar ngar əŋgereti, aziyaŋgək burɗuk aketi, agdukoŋ əppu' aba akoti na Yawe hã moskoy gap aket aka vaska.

⁷ Yaŋ Yosuwa kan amna: «Aw! Yawe Maŋgəlva, vimi kəreɗ ɗiyiŋ əggar ki məlpa na Yurden di? Vi kappam ammba vet mə Amorɗe kawzam mbaraka sa? Ɗəɗah va məsamək hara Yurden dədaka!

⁸ Kamə, awan nədawpel yaŋkəŋ adan mə Israyelɗe anzoŋ sitinik meseŋgiɗtiŋ di? Yawe!

⁹ Mə Kana'anɗe dit ɗiy naka dələv beymet waprəməni, wasapaŋ akamə, wazanən iya nam səka dəlvəŋka. Nok mi kədaɗɗa kan sən iya nok metiŋginiŋ di?»

¹⁰ Yawe aɓsən Yosuwa na: «Asili! Mə dəray kəgduk hã mirbizuk ne' afuŋ vaŋ di?

¹¹ Israyel agəɗək zəga mbərayən; gesiŋ, aggaraŋgək ki wənmiyna naw an nəɗi sit wən nani; gesiŋ, andaŋgək zəgeɗ səret en nətak met səketi, gəm ahãlaŋ mbirti, haɗamgiti, may toŋgit eret zəgeɗ na veti;

¹² Mə Israyelɗe aɓapən na əziw abet meseŋgiɗit ɓa, wanzoŋ sitin meseŋgitti, vi aslsləraŋgək də zəga mətakən; an kəzanən zəga mətakən məs dəsan a walaŋkuməŋ ɓa na, wanəppan əsaw də mənokum.

¹³ Asili, abbur heslepe səzet ɗiyi. Kənahgən na: “Məbbur heslepe səzokum sən pummo, vi Yawe Maŋgəlva na Israyel tay ənah na: zəga mətakən tay azok is Israyel; kəɓap na əziw abet meseŋgiɗuk an kəzganən zəga mətakən məs dəsan a walaŋkuməŋ ɓaɓa.”

¹⁴ Kəzzoŋgən pum ərma wəla, naway pak də mahəlfa nani. Mahəlfa məs Yawe adawya pak dərbangən zən aza məlma na zəni, məlma məs Yawe adawya pak dərbangən zən aza daŋgla nani, Daŋgla məs Yawe adawya pak dərbetgin zel naddəvən takataka.

¹⁵ Ɗəf an wəla arəm na ndəni dəɗɗa zəga mətakən, kawzlani akoffo ndən dit zəgeɗ nan pakə, vi aggarək ki wənmiyna na Yawe, akiyək zəbəɗ a Israyel.»

¹⁶ Yosuwa asilik pumə. Atoŋgitik mə Israyelɗe aza mahəlfa net takataka; mahəlfa na Yuda arəmka;

¹⁷ Yaŋ aya mahəlfa na Yuda, məlma net mə Zariɗe arəmə; aye zel na məlma net mə Zariɗe takataka, yaŋ Zabdi arəmə.

¹⁸ Siske atoŋgit zel na daŋgla nan takataka, yaŋ Akan wətən Karmi, wətən Zabdi, wətən Zera na mahəlfa na Yuda arəmə.

¹⁹ Yosuwa aɓsən Akan na: «Kamə, wiyən nawa, aɗɗumon gagdak na Yawe Maŋgəlva na Israyel, aɗi kini; arban su an kəgəɗə, kəɗaman su taka səran ɓa.»

²⁰ Akan azlan sənək Yosuwa, amna: «Vaski, intə nəgəɗ mbərayən aba Yawe, Maŋgəlva na Israyel. An nəgəɗ yaŋka:

²¹ Səddəv zəga an mərah səma wəgay na, nəwələk lukut metiŋgin na sləma, naka dələv na Sine'ar, gəm deleɗ na təbez babar səkat sula, də meleŋge hirzliŋ naɗɗa wəɗak na kilo. Nəsimik sawɓa, yaŋ nəgime. Tahəŋ məndikit addak gizlirke nawa, deleɗ kəlammbet afuŋ.»

²² Yosuwa slən ɗiyi, anzoŋ a gizlirke, adak arəhən zəga məɗaman a gizlirke nan vani, deleɗ kəlammban afuŋ.

²³ Andenin səddəv gizlirke, akisənən Yosuwa gəm mə Israyelɗe pakə, yaŋ məziyit aba Yawe.

²⁴ Yosuwa agəm Akan wətən Zera, dit deleɗ veti, lukutu, gəm hirzliŋ na meleŋge naka, may kirtin mezeŋgleket dit muguluŋgiti, wasli nani, koro nani, gilew nani, gizlirke nani, sap dit zəgeɗ nan beymeti. Mə Israyelɗe beymet ammban zimiɗ, akenin a miktik na Akor.

²⁵ Yosuwa aɓsən Akan na: «Mə dəray kətehgən əray akam di? Ya pay dəpaŋ na, Yawe watehgən əray akoko.» Yaŋ mə Israyelɗe beymet askanən sap dit ɗiy nan dit gərmeŋge, aɗiyaŋ offo sit zəgeɗ nani.

²⁶ Yaŋ akkeletin gərmeŋge akan kpew, hã pay dəpaŋka, kuneŋges tahəŋgə. Vini məya təki van na miktik na Akor hã pay dəpaŋka. Səɓɓan na Yawe appan ədagədəv nani.