Yosuwa 6 - Bible en Guidar

Mə Israyelɗe amõhənək Yeriko

¹ Məmseti yi maddambeɗe na Yeriko slakat slakat viyit mə Israyelɗe: ɗəf tay nawtoŋ ɓa, ɗəf tay nawgilyan ɓa.

² Yawe aɓsən Yosuwa na: «Awla, nəpsukuk Yeriko də məlĩ nani, dit məzəlpaŋ nan gəromɗeŋ ammba voko.

³ Wəsɓəta pak, mənokum ɗiy nalpa baymokum kəsuləkaŋgən ki walaŋgəla-metiŋ van təl taka; kəɗɗagən pay sləre vaska.

⁴ Məsdəlveŋge buhul dəssoŋgən aba akoti salala dit mõhoŋɗe na ndargayã aveti. Aka pay mabuhulon na, kəsuləkaŋgən ki walaŋgəla-metiŋ van təl buhul, məsdəlveŋge tam dəffotingin mõhoŋɗe neki.

⁵ An məffoni mohõ ndargayã, kəprəmənək ɓaɓəlma mohõ vani, ɗiy pak dəŋzlaŋgən vaŋvəl nawgay dayadaya; vasna, zlava məs dətərwəsl ki walaŋgəla-metiŋ van waɓəzlə. Asna, ɗiy dəpeŋgeŋgən, nawaydi pak haran aban seki.»

⁶ Yosuwa, wətən Nun dah iye məsdəlveŋge, aɓsit na: «Məslan akoti na wənmiyna, məsdəlveŋge buhul dəssoŋ aba akoti na Yawe, nawaydi pak də mohõ ndargayã avani.»

⁷ Siske aɓsit ɗiy pak na: «Məddoŋ Məsulək ki walaŋgəla-metiŋ, vanday net məzəlpaŋ nabe dətoŋ aba akoti na Yawe.»

⁸ Zəga pak agəɗək va Yosuwa anah sit ɗiyi: Məsdəlveŋge buhul dit mõhoŋɗe na ndargayã avet nek toŋgoŋ aba Yawe də əffet mõhoŋɗe. Akoti na wənmiyna na Yawe kan əzbeti.

⁹ Məzəlpaŋ en nabe adawaŋgək abet məsdəlveŋge məzəffotin mõhoŋɗe neki, məzəlpaŋ en na dirɓe azbanən akoti na wənmiyna; ɗiy tahəŋ ədawaŋgə mõhoŋɗe tahəŋ əffoŋgu.

¹⁰ Yosuwa ahẽyẽtik ɗiyi, amna: Kədaŋzlaŋ vaŋvəl nawgay ɓa, ɗef adaprəm wəlokum ɓa, əpel adawgilyen sə mokum ɓa hã gap pay nədawnah sukum na: «Məŋgəzl vaŋvəl nawgaya; asna, kəŋzlaŋgən vaŋvəl nawgay kana.»

¹¹ Akoti na Yawe mbat sulək ki walaŋgəla-metiŋ təl taka, siske na, ndəɗaŋ toŋ a dibirgidiki, addaŋgən təki adaka.

¹² Yosuwa asilik pumə, məsdəlveŋge tam aslanən akoti na Yawe;

¹³ Məsdəlveŋge buhul naba akoti na Yawe, məs mõhoŋɗe na ndargayã avet takataka nek təŋ ədawaŋ əmpa də iyafon mohõ. Məzəlpaŋ nabe taheŋ ədaw abeti, en nadirɓe tam əzban akoti na Yawe: ɗiy tay ədawaŋgə, mõhoŋɗe tay əffoŋgu.

¹⁴ Aka pay masula'ən na, ndəɗaŋ sulək ki walaŋgəla-metiŋ nak təl taka əmpa, yaŋ amndoŋ a dibirgidiki. Aɗɗaŋgək pay sləre aka vaska.

¹⁵ Aka pay mabuhulon na, asilyoŋ də bapummo, asuləkaŋ ki walaŋgəla-metiŋ təl buhul, də mahenziŋ məstaka vanəska; pay aski kaka' asuləkaŋ ki walaŋgəla-metiŋ təl buhulu.

¹⁶ Təl mabuhulon na, məsdəlveŋge affotin mõhoŋɗe yaŋ Yosuwa aɓsit ɗiy na: «Məŋgəzl vaŋvəl nawgaya, Yawe apsukumək walaŋgəla-metiŋ vani.

¹⁷ Kawzani walaŋgəla-metiŋ van də zəga naddəvən pakə, vi na Yawe yi. Məpolkoyok Rahap tə kaka' gəm ɗiy en dəssoŋ dəndət eŋgil anadda gərak nassoŋ medereti, vi təɗemetik maslənɗe məs məslənə.

¹⁸ Ya nokum na, məsla zukum səza zəga an mətakən, vi kədawsimeŋ zəga ka mənokum kawgəm an mətakən ka kawki əray aka dibirgidik na Israyel gəm kawki mambray akan ɓa.

¹⁹ Təbəz babar bayman də meleŋge may zəgeɗ na təbəz pepreŋge may na təbəz titire, pak salalaŋgə sən Yawe, nawzi addəv ərəh na Yawe.»

²⁰ Yaŋ kan ɗiy aŋzlaŋ vaŋvəl nawgaya, muffet mõhoŋɗe. Adan ɗiy aprəmən ɓaɓəlma mohõ na, aŋzlaŋgək vaŋvəl nawgay dayadaya, yaŋ zlava aɓəslə; ɗiy apeŋgeŋ ləŋ nawaydi pak haran aban təstəs seki, amõhnən walaŋgəla-metiŋ vani.

²¹ Azanən zəga dəsan a walaŋgəla-metiŋ van baymani, iya na ɗəf mizilin may gulku, gawla də mazza, may Wasliya, time, koro, beymet masalam ambokuke.

Yosuwa dəbayət Rahap ɓa

²² Yosuwa aɓsit ɗiy sula məs dəseŋgerin səmyã na Yeriko nek na: «Mətoŋ anat guluk məpolkoyokda nakə, məgilgət guluk vat də zəgeɗ nat pak sədak va kəswayaŋ sətəni.»

²³ Yaŋ gewleɗ məs dəseŋgerin səmyã na təki nek atoŋgoŋ adaka, agilgətən Rahapə, afəta, mata, milmiŋgiɗta dit zəgeɗ nawray nat pakə; agilgitinik ɗiy na məlma nat pakə, aversitin gəla net a baŋgla na dibirgidik na Israyel.

²⁴ Dəwəlsən walaŋgəla-metiŋ na, aɗisənənək offo də zəga naddəvən pakə, mbəksa təbəz babara, meleŋge, zəgeɗ na təbəz pepreŋge may təbəz titire, məs akaŋ addəv ərəh na Yawe.

²⁵ Yosuwa appatək məpolkoyok Rahap madarat də məlma nata, dit zəgeɗ nawray nat pakə; təsatək də gəla a weleŋgit mə Israyelɗe hã pay dəpaŋka, vi təɗemet maslənɗe məs Yosuwa aslən əseŋger səmyã Yeriko.

²⁶ Dəpas na, Yosuwa aswayək də ənah na: «Ɗəf nawsilyan kamsak əsilgin walaŋgəla-metiŋ na Yerikoŋ na, məs mefɗekeyi aba Yawe. Ka tizi nani; adawɗi gabbani; ka wətən an tabuwa adampe maddambeɗe nani.»

²⁷ Yawe asanək də Yosuwa, sləman abbalək aka dələv pakə.