Yosuwa 5 - Bible en Guidar

¹ Milyeŋge net mə Amorɗe beymet məs dəssoŋ dəgar ki Yurden dəmmba pay na moskoy nani, dit milyeŋge net mə Kana'anɗe, məs dəssoŋ də gəla a ma pehe naddak təki aprəmənək na, Yawe akkpe'ik iŋkile na Yurden səbet mə Israyel hã ndəɗaŋ dəgarə; ageslne'eŋke, mekret aɓohuk sit mə Israyelɗe.

Əskəl awra net mə Israyelɗe a Gilgal

² Dasək na, Yawe aɓsən Yosuwa na: «Azaɓ slohoŋɗe na ɗoro, eskil kirtit mə Israyelɗe awra əmpa.»

³ Yaŋ Yosuwa azaɓ slohoŋɗe na ɗoro, eskil mə Israyelɗe awra aggərəm məs adawyaŋ na, gərəm naskəlawra.

⁴ Məs Yosuwa askilgit awra viyən yaŋka: zeli may ɗiy en nalpa pak amtaŋgək tive tive a kapta-muyã gala agulyoŋ sə Eziptə.

⁵ Vi ɗiy məs dəgulyoŋ sə Eziptə, net askəlaŋgək awra beymeti; ya ɗiy en muwet tive tive a kapta-muyã, gala agulyoŋ sə Eziptə na, net dəskəlaŋ awra ɓa.

⁶ Vi mə Israyel aɗɗaŋgək wəzva kaklaw poɗo aka ədaw a kapta-muyã, hã ɗiy nalpa məs dəgulyoŋ sə Eziptə amtaŋ kəkãhə, vi dəprəmnən ma Yawe ɓa; Yawe asway sit na, awlanən na dələv an Yawe asway sit efiŋgiɗit məs anah napsəməŋ ɓa, dələv məs moŋvo də amama adanzoŋ akan loklokəŋka.

⁷ Enet kirtit atoŋgit a gəleti; ndəɗaŋ vetiŋgə Yosuwa askəlgit awraŋka, vi gãyẽɗiŋgə adan məskəlgiti yi awra aka tive na malaka ɓaŋka.

⁸ Adan məskəlgit ɗiy awra tutu'u, assoŋguk a dibirgidik hã ndəɗaŋ hənzaɗə.

⁹ Yaŋ Yawe aɓsən Yosuwa na: «Dəpaŋ na nətor sukumək wil məs kəkiyaŋ sə Eziptəŋ sərokum.» Vini kan məya təki van na Gilgal hã pay dəpaŋka.

Wəzləra na Pak maddaabəŋ a Kana'an

¹⁰ Mə Israyel averinik dibirgidik net a Gilgal, yaŋ aɗɗanən wəzləra na Pak də wəvoŋ makəlaw kiyən poɗo'o na təla, də moskoyo, a təki məpəlayya na Yeriko.

¹¹ Vit pummo nani, azəmaŋ zəgeɗ naka dələv nadaka: peŋ mədan məza wuɗo ɓa gəm ki hay məpsani pay dəpaska.

¹² Yaŋ, manhu arslə ɗe' də iyo' dəpas səza azəmaŋ zəgeɗ naka dələv nadaka. Manhu tay sit kirtin Israyel əmpa ɓa, wəzva nan na, zəga na mabardaw naka dələv na Kana'an azəmaŋgə.

Daya na dula nalpa na Yawe

¹³ Aka Yosuwa asan go'o aza Yeriko na, ndən kiyən legəni, dəwəl na: ɗəf yaŋ ama haran ziwwe də masalam nan məgdəhən səddəv gəlan avan kawwã. Yosuwa nak tek azani, aɓsən na: «Nam kənan sa net meseŋgiɗmə?»

¹⁴ Ɗəf nak amna: «Awwo, naw daya na dula nalpa na Yawe nani, gəgaŋ nəde.» Yosuwa aban də takpran gbuduk ɓe' əppu' abani, aɓsən na: «Miy daya naw adawnah sən gawla nan di?»

¹⁵ Daya na dula nalpa na Yawe aɓsən Yosuwa na: «Aggbuk hensek nok səka təlko, vi təki məs kəziwəŋ na, salalayi.» Yosuwa aɗɗak vaska.