Yosuwa 4 - Bible en Guidar

Gərməŋge kəlaw kiyit sula naɗɗumon wəna

¹ Səza ɗiy beymet aggaraŋ ki Yurden, Yawe apel sənək Yosuwa amna:

² «Məwel zel kəlaw kiyit sula, takataka səddəv mahəlfa pakə,

³ məɗi sit wən nan na: nokum na, məkə gərmeŋge kəlaw kiyit sula səŋ səddak məlpa na Yurden, sə gəla tilit məsdəlveŋge aziweŋ ziw ɓəlɓələŋka. Kəkeningin avokum, kəkkeletingən a təki kədawvoŋgoŋ dəfəɗ nani.»

⁴ Yaŋ Yosuwa aye ɗiy kəlaw kiyit sula məs awel səret mə Israyelɗe takataka seddəv mahəlfa neki.

⁵ Yosuwa aɓsit na: «Mətoŋ aba akoti na Yawe Maŋgəlva nokum, hã addak Yurden. Ɗəf pak dəslə gərəm taka akan aza əŋɗa net mahəlfaɗe net mə Israyelɗe.

⁶ Vi dəsangən ka zəga narba wən awalaŋkum. Laha pay kirtukum adattokonən mokum də ənah na: Mi girmeŋgəŋ aŋglaŋ ənahaŋ sukumən di na?

⁷ Kənahaŋ sitingən na: Guzlo na məlpa na Yurden dərslə səba akoti na wənmiyna na Yawe, gala akoti van aggar ki Yurden! Vini kan girmeŋges assoŋ ka zəga naɗɗumon akan sit mə Israyelɗe hã faɗə.»

⁸ Mə Israyel aɗɗanənək va Yosuwa aɗi sit wən nani. Agilgitinik gərmeŋge kəlaw kiyit sula səddak Yurden, va Yawe anah sən Yosuwa na dəssoŋgən aza əŋɗa net mahəlfaɗe na Israyel naka. Akenin gərmeŋge vet avet a təki nawtehe, akkeletin adaka.

⁹ Yosuwa ampek gərmeŋge kəlaw kiyit sula'e addak Yurden van agəla təki an məsdəlveŋge dəslanən akoti na wənmiyna azlakən tilti. Tahəŋ adak hã pay dəpaŋka.

¹⁰ Məsdəlveŋge en dəslanən akoti aziweŋgik addak Yurden, hã wən an Yawe aɗi sən Yosuwa dənah sitgin ɗiy agrak səɗek va Moyis aɗi sən wən nan sən Yosuwa. Yaŋ kan ɗiy agəmən zit əggara.

¹¹ Səza ɗiy pak aggaraŋgə, akoti na Yawe kan toŋ dit məsdəlveŋge abet ɗiyi.

¹² Dətoŋgoŋ abet mə Israyel na, ndəɗaŋgə kirtin Ruben, kirtin Gad, gəm wəɗak na mahəlfa na Manase, aɓereŋ va ama wəgaya, əzban va Moyis anah siti.

¹³ Ɗiy məs dinanən dədeket nalpa waɗɗaŋ gabal kaklaw poɗo, dəggaraŋ aba Yawe vi kalpa kəla təki məpəlayya na Yeriko.

¹⁴ Dəpas na, Yawe aɓaygənək Yosuwa a maheret mə Israyelɗe pakə, ageslne'eŋ sənənək hã wəzva na ma way nan gərak va ageslne'eŋ sənən Moyisi.

¹⁵ Yas kan Yawe apel sən Yosuwa amna:

¹⁶ «Aɗi wən nan sit məsdəlveŋge dəslanən akoti na ɗerewel na wənmiyna, dəgulyoŋ sə Yurden.»

¹⁷ Yaŋ Yosuwa anah sit məsdəlveŋge na: Məgil sə Yurden.

¹⁸ Səza məsdəlveŋge en dəslanən akoti na wənmiyna na Yawe agulyoŋ səddak Yurden, adan tilit məsdəlveŋge aslə aɗi a təki məklakani, guzlo na məlpa ləŋ ərɓəzlan a gəlan ədaw va lahəŋ əzbet mabuzgumɗe nani.

¹⁹ Aka pay makəlawən na təla maddaabəŋgi, mə Israyelɗe aggaraŋ ki Yurden, avernən dibirgidik net a Gilgal a mapoho na Yeriko dəmmba pay nampum nani.

²⁰ Dəwəl sit gərmeŋge agəmaŋ kəlaw kiyit sula sə Yurden neki, Yosuwa ampek a Gilgal.

²¹ Yaŋ aɓsit mə Israyel na: «Laha, an kirtukum attokonən met efiŋgiɗit dawnəh na: gərmeŋge məŋ eŋdi na?

²² Kəprəman sitingən kirtukum dawnah sit na: Dəka təki məklakan Israyel aggar ki Yurden əŋka;

²³ Yawe Maŋgəlva nokum akkpe'ik iŋkile na Yurden sə bokum vi kəggaraŋgəni, məstaka va Yawe Maŋgəlva nokum akkpa' pehe net vəlarɗe sə bam hã mənam dəgarə,

²⁴ vi ɗiy nammba dələv pak dəsənnəngən gbogboŋ na Yawe, vi kəgeslne'eŋ sənəngən Yawe Maŋgəlva nokum pay pakə.»