Yosuwa 24 - Bible en Guidar

Israyel aynanək naɗɗa wəza sən Yawe ( 24:1-33 )

¹ Yosuwa akkeletik mahəlfaɗe na Israyel beymet a Sikem. Ayek ɗiy məsɓet na Israyel, deyeɗe, mətawaŋwəna gəm məzuverɗe nani, azzoŋ əziw aba Maŋgəlva.

² Yosuwa aɓsən ŋgboŋ net ɗiy vet na: «Əpel na Yawe, Maŋgəlva na Israyel yaŋka: Far lahəŋ na, əfiŋgiɗkum Terah afit may Abraham də Nahor, dəgar ki Yurden assoŋ də gəla, meŋgilveɗ temme adappu'oŋ sitini.

³ Yaŋ nəgəm afukum Abraham sə dəgar ki məlpa, nəbbalan aka dələv na Kana'an gərakə, nuwan sən kini, nəpsən Isak.

⁴ Nipsin may Yakob də Esaw sən Isak, yaŋ nəpsən dələv məs mossorgoɗe na Se'ir sən Esaw ka nani, yaŋ Yakob dit kirtin apurkoŋ a Eziptə.

⁵ Sə dərɓagan nəslin may Moyis də Aron, nəzəmgən sahã na Eziptə. Siske nəgilgukum.

⁶ Nəgilgit efiŋgiɗkum sə Eziptə, kəgapaŋ hã pehe net vəlarɗe, yaŋ mə Eziptiɗ azbetin efiŋgiɗkum dit mawteŋɗe net pilseŋge nawgaya, gəm məŋkoroŋ pilseŋge veti.

⁷ Yaŋ efiŋgiɗkum vet ahəmaŋ ammba təl Yawe, aɗɗa guzli awalaŋkum dit mə Eziptiɗi, aki pehe aketi, asulupe. Horokum awlak an nəgəɗ sən Eziptə. Kəɗɗaŋgək əvoŋ diyɗa a Kapta-muyã.

⁸ Siske nəkukum aka dələv net mə Amorɗe dəssoŋ də gəla dəgar ki Yurden. Akayokumənək də wəgaya, ya nipsukumik ammba vokum, kəmõhunək dələv net ka nokum, nəzetik kəkãh sə bokum.

⁹ Balak wət Sippor məlĩ na Mo'ab asilik vi kaɗɗa əgay də Israyel. Yaŋ aslən iya Balam wətən Be'or vi dəraygukumgən dit mefɗeke.

¹⁰ Ya nəŋger əprəm ma Balam ɓa, əzaɓ azaɓokum dərəŋ, nəkõhgukum səvani.

¹¹ Yas kəggaraŋ ki Yurden, kəgapaŋ a Yeriko. Migil Yeriko asilyoŋguk əgay də mənokum. Ndəɗaŋgə mə Amorɗe, mə Perziɗe, mə Kana'anɗe, mə Hittiɗe, mə Girgasɗe, mə Hivviɗe gəm mə Yebusɗe, ya nəpsukumik ammba vokum.

¹² Nəslənək apapray na bekne abokum, arɓehet milyeŋge net mə Amorɗe sula neki, məza dit masalam nokum ɓa, məza dit bəleɗe nokum ɓa!

¹³ Nəpsukumək dələv məs kəyanən zukum insen ɓa, walaŋgəleɗe gugriɗ məs vokum dərke ɓa, məs kəssoŋ addivit də gəla, megezlembirke də hereme məs mənokum kəmpenin ɓa, ya mənokum tat əzəm uwa neti!

¹⁴ Gəgaŋ na, məgeslne' sən Yawe, məgəɗ sən wəza də təstəs-gərakə. Məzergit meŋgilveɗ məs efiŋgiɗkum aɗɗaŋ sitin wəza a dəgar ki məlpa metiŋ gəm a Eziptə iŋki, məgəɗ wəza sən Yawe.

¹⁵ Ya an əɗɗa wəza sən Yawe tay law azokum ɓa na, dəpaŋ məwel an kədaɗɗaŋ sənən wəza, an meŋgilveɗ məs efiŋgiɗkum aɗɗaŋ sitin wəza gala assoŋ dəgar ki məlpa metiŋgəŋ, an meŋgilveɗ net mə Amorɗe məs kəssoŋ də gəla aka dələv netiŋkəŋgə. Ya naw də gəla naw na, sən Yawe mədawgəɗ sən wəza.»

¹⁶ Yaŋ ɗiy azlan sənəni, aɓɗaŋ na: «Ula gəbayi azamə an məppanək Yawe vi kawgəɗ sit wəza sit meŋgilveɗ meɓɓeti!

¹⁷ Vi Yawe yi Maŋgəlva namə, məs dəgilgəm mənam dit efiŋgiɗəm səka dələv na Eziptə səddəv gəla na balam. Ama haram aɗɗe Sekeneɗ metiŋgit yeŋkiŋki: Ataɗmək aka tive məs mədaw gbaŋkəŋka gəm səret ɗiy məs mətoŋ dəweleŋgit pakə.

¹⁸ Yawe arɓehetik ɗiy sə bam beymeti, mə Amorɗe məs dəssoŋ də gəla aka dələv vani. Nam van pak waməgəɗ sən wəza sən Yawe, vi ndəni yi Maŋgəlva namə.»

¹⁹ Yosuwa aɓsit ɗiy kan na: «Wakəɓapən əɗɗa wəza sən Yawe ɓa. Maŋgəlva an salala yi, Maŋgəlva məskotoroki yi, məs aɓəs na kiɓəɓəl nokum dit mambrayɗe nokum ɓa.

²⁰ Paysən kəppanən Yawe kəɗɗaŋ wəza sit meŋgilveɗ net ɗiy meɓɓet na, wasil də mənokum kawgəɗ sukum zəga mbərayən. Waggrakkum səɓɓa moggon an agəɗ sukum.»

²¹ Ɗiy aɓsənən Yosuwa na: «Vaski ɓa, sən Yawe mədawgəɗ sən wəza kpakə.»

²² Yosuwa aɓsit ɗiy na: «Asna mənokum tussotə miziwe na kizukum, mənokum dəvokumtə kəwelnən Yawe kawgəɗ sən wəza.» Yaŋ azlanən na: «Vaski, mənamtə miziwe nakizəmə.»

²³ Yosuwa aɓsit kan na: «Gəgaŋ na, məzergit meŋgilveɗ net ɗiy məɓɓetiŋ sə walaŋkum kana, məppan mokrokum sən Yawe, Maŋgəlva na Israyel.»

²⁴ Ɗiy aɓsənən Yosuwa na: «Yawe Maŋgəlva nam mədawgəɗ sən wəza, man mədaprəma.»

²⁵ Pay dəpaski Yosuwa aziwgin wənmiyna dit ɗiy a Sikem, aɗi sit mahenziŋɗe dit əsərəkɗe.

²⁶ Yosuwa aver əpeləŋ addəv ɗerewel na mahenziŋ na Maŋgəlva, agəm gərəm metiŋgini, ampa adak ammba wəlaŋga metiŋ, adawyaŋ na Sen, a maŋgava gəlamatuya na Yawe.

²⁷ Yaŋ Yosuwa aɓsit ɗiy pak na: «Gərəm yaŋkəŋka, wakkpaŋ ka kikum, vi nan aprəmək əpel na Yawe bayman gala apel də mənamə; wasan ka kikum, vi kədawzelenən Maŋgəlva nokum ɓa.»

²⁸ Siske Yosuwa appan tive sit ɗiyi, naway pak ambat aka dələv nawray vani.

Əmta na Yosuwa

²⁹ Dərɓaga an dəgəɗəs pak na, Yosuwa, wətən Nun, gawla na Yawe tay də wəzva səkat də kəlaw amtə.

³⁰ Məndəkni aka dələv an məpsən haran nan a Timnat-Sera, aggərəm na Efrayim, də disiŋ na mossorgo na Ga'as.

³¹ Mə Israyelɗe aɗɗaŋgək wəza sən Yawe, hã ənziya egge na Yosuwa gərakə, gəm ənziya net ɗiy gugriɗe məs dəssoŋ dərɓaga Yosuwa, məs dulanən bayma wəza an Yawe agəɗ vi Israyel grakə.

³² Sleŋsleŋɗe na Yosef məs mə Israyelɗe akiyaŋ avet sə Eziptə na, məndikti a Sikem aka təki na guli məs Yakob albah suley səkat səvet kirtin Hamor afən Sikem naka; assoŋguk addəv dələv net kirtin Yosef.

³³ Ele'azar, wətən Aron zam əmta, andəknən akat mossorguk na Pinhas wətəni; mossorguk vat səza mossorgo na Efrayim məpsənta.