Yosuwa 23 - Bible en Guidar

Əzga' an bayma faɗ na Yosuwa ( 23:1-16 )

¹ Avoŋguk diyɗa, səza Yawe apsit əffet sit mə Israyelɗe səvet meseŋgiɗit en kiyit tərwəsl pakə, ya Yosuwa agalək sawɓa, azəmək wəzveɗe;

² yaŋ Yosuwa aye mə Israyelɗe beymeti: ɗiy məsɓeti, ɗiy gugriɗe, mətawaŋwəna gəm məzuvereŋgi, aɓsit na: «Naw nəgalək sawɓa, pay naw agapka,

³ mənokum sən kikum kulanənək an Yawe Maŋgəlva nokum agəɗ sit ɗiy naka dəlvəŋ ambokum. Vi Yawe Maŋgəlva nokum dəlpə vikum.

⁴ Mula, dəlvəŋge net ɗiy məs nəska wəletiŋ na, nuɗek sukumək də vẽpəlwa ka nokum ezet mahəlfaɗe nokum təhə, gəm dəlveŋge en dəmmbraŋ a walaŋ Yurden dəmmba pay nampum də pehe naddak təki dəmmba pay na moskoyo.

⁵ Yawe Maŋgəlva nokum sən kiyən warɓih səbokum, wagəm megebbeti, wakətafnən dələv net va Yawe Maŋgəlva nokum anah sukum.

⁶ Məsok zukum aza əzlga sləma gəm əɗɗa wəza də wən məverin addəv ɗerewel na mahenziŋ na Moyisəŋ bayman, kədamzləhaŋ səkan dəka dəzəŋ may dəka zlaɓay ɓa.

⁷ Kədawslahaŋ dit ɗiy en dəmmbraŋ awalaŋkuməŋ ɓa; kədawyanən sləmet meŋgilveɗ net ɓa, kədaswayaŋ dindit ɓa, kədaɗɗaŋ sitin wəza ɓa, kədappu'oŋ ebet ɓa.

⁸ Vi aza Yawe Maŋgəlva nokum kaka' kədawbayən zukum va kəbayəŋ zukum azan hã gap pay dəpaŋkəŋka.

⁹ Yawe arɓehetik ɗiy gambereɗ diyɗa səbokum, hã gap pay dəpaŋka ɗəf tay təttaka dəziw ama horokum ɓa.

¹⁰ Ɗəf taka sərokum, wagəm gebbet ɗiy gabal, vi Yawe Maŋgəlva nokum tay əlpa vikum va anah sukum.

¹¹ Ya vasna, məɗəŋgəran maɗɗulokum moggoni, məŋglu Yawe Maŋgəlva nokum.

¹² An kəmzlahaŋgək səmmbani, an kəbayənək zukum ezet ɗiy en dəmmbraŋ awalaŋkuməŋki, an kəɗɗaŋgək dəha dənɗaŋ, an kəslahaŋgək ereti, ndəɗaŋ tam orokum,

¹³ asna məsən lewlewi, Yawe Maŋgəlva azban na ərɓehet ɗiyiŋ səbokum ɓa. Wakkpaŋgaŋ azokum va Zəva awaniɓa pew̃eŋ, va azlawar aka təkzləmkum, va degirgeɗ orokum, hã mənokum kəkãh səka dələv moggon məs Yawe Maŋgəlva nokum apsukum naka.

¹⁴ Naw na, in yakəŋ pay dəpaŋ əddaw dəka tive an məver sit ɗiy pakə. Kəsənənək a mokrokum də megenegenekum pak na, əpel nenek məs Yawe Maŋgəlva nokum apel temtem akokuməŋ pak tay məza dərbə ɓa ɓa, bayman pak agəɗək akokum: təttaka tay dəbət afuŋ səran ɓa.

¹⁵ Ya kan na, va əpel an nenek məs Yawe Maŋgəlva nokum apel sukum agəɗ akokum gesiŋ əŋka, vaska'e Yawe adaknahan əpel an mbərayən akokum gesiŋ hã bay əbaykum, mbo' əzokum səka dələv moggon məs Yawe Maŋgəlva nokum apsukum naka.

¹⁶ An kəmzlahaŋgək səka wənmiyna məs Yawe Maŋgəlva nokum aɗi vikum, an kəɓe'eŋ sitinik meŋgilveɗ meɓɓeti, kəppu'oŋguk abeti, ədagədəv na Yawe wasan akokum. Asna wakəzaŋ də kakara səka dələv moggon məs apsukum naka.»