Yosuwa 22 - Bible en Guidar

Mahəlfaɗe nammba pay nampum tay əmndoŋ aka dələv neti ( 22:1-34 ) Mahəlfaɗe na dəmmba pay nampum na Yurden

¹ Yaŋ Yosuwa kan akkelet ɗiy na mahəlfa na Ruben na Gad gəm na wəɗak na mahəlfa na Manase.

² Aɓsit na: «Kə ɓe'eŋ sənənək an Moyis, gawla na Yawe aɗi sukum wən nan bayman, gəm kəprəmənək maw aka an nəɗi sukum wən nan bayman.

³ Əvoŋɗe diyɗa dətoŋgoŋgu, hã gap pay dəpaŋka, kəppetin milmiŋgiɗkum ndol ɓa; kəzlgaŋgək sləma aka əɓe' sən əhãy na Yawe Maŋgəlva nokum.

⁴ Yaŋ na, Yawe Maŋgəlva nokum apsitik əffet sit hilfiŋgiɗkum va anah sit wən nani. Gəgaŋ na, məmdoŋ məddoŋ a gizlirkeɗe nokum aka dələv nawray nokum, məs Moyis gawla na Yawe apsukum dəgar ki Yurden.

⁵ An dəmbər na, məzlgə sləma lewlew aka əɗɗa wəza dit wəsəɓɗe gəm mahenziŋ məs Moyis gawla na Yawe Maŋgəlva nokum aɗi sukum wən nanəŋka; məŋglu Yawe Maŋgəlva nokumə; mədaw aka tive nan gərakə, mərme wəsəɓɗe nani, məbay zukum azani, məgəɗ sən wəza mokrokum taka də megenegenekum pakə.»

⁶ Yosuwa aɓuh sit ma, appet əddoŋgu, amndoŋ a gizlirkeɗe neti.

⁷ Moyis apsənək hara dələv na wəɗak na mahəlfa na Manase addəv Basan; sən wəɗak məs dəmbər səza mahəlfa van na, Yosuwa apsənək hara dələv nan sap dit milmiŋgiɗin na dəgar ki Yurden, dəmmba pay na moskoyo. Gala Yosuwa appet əmbat a gizlirke net na, ndən ma ɓuhɓuh siti.

⁸ Aɓsit na: «Məmndoŋ a gizlirkeɗe nokum də arya gəddakə, dit gazlaŋɗe diyɗa, dit koɓeɗi, təbəz pepreŋge, təbəz babara, lukutɗe miynet bepbepi. Ərəh na ma wəgay səvet meseŋgiɗkuməŋ na, muɗakan dit milmiŋgiɗkum.»

Gəla na matuya mərkan a ma Yurden

⁹ Yas, Zev Ruben də zev Gad, gəm wəɗak na zev Manase məs dəssoŋ dəmmba pay nampum, net amndoŋ engili. Appetinik mə Israyelɗe a Silo, aka dələv na Kana'an, addoŋ aka dələv na Galad, hara dələv net an mipsit dəka əpel na Yawe də ma Moyisi.

¹⁰ Adan agapaŋ a Gelilot a Yurden, aka dələv na Kana'an ba' tagay na, kirtin Ruben, kirtin Gad gəm wəɗak na mahəlfa na Manase arkaŋ gəlamatuya adak go'o aza Yurden, gəlamatuya metiŋgin na sləma diyɗa.

¹¹ Mə Israyelɗe aprəmənək ɗiy ənəhaŋ na: «Mula! Zev Ruben də zev Gad gəm wəɗak na mahəlfa na Manase, arkaŋgək gəlamatuya dəka va na Kana'an a Gelilot a ma Yurden dəzet mə Israyelɗe.»

¹² Səza mə Israyelɗe aprəməni, sap net beymet akkalaŋ a Silo vi kawsilgin əgay dənɗaŋ.

¹³ Yaŋ mə Israyelɗe aslənən Pinhas, wət məsdələv Ele'azar aza mahəlfa na Ruben, aza mahəlfa na Gad gəm aza wəɗak na mahəlfa na Manase, aka dələv na Galad.

¹⁴ Ɗiy gugriɗ kəlaw, taka taka səddəv məlma naddivit mahəlfaɗe net mə Israyelɗe va assoŋ alhãnənək Pinhas vani.

¹⁵ Agapaŋ ezet may kirtin Ruben, kirtin Gad gəm wəɗak na mahəlfa na Manase aka dələv na Galad, apeleŋ sitini, aɓɗaŋ na:

¹⁶ «Sap net ɗiy na Yawe aɓɗaŋ na, zəv zəga nawla gəbay miy aŋ kəɗɗaŋ aka Maŋgəlva na Israyel, kəzaraŋ səza Yawe kərkaŋ gəlamatuya, mənokum kan pay dəpaŋ na aka Yawe teməŋ di?

¹⁷ Mbərayən məgəɗ a Pe'or agəsək azam sa? Də Yawe atehgən gəbay aket ɗiy nan zlaŋgə, hã pay dəpaŋka dəbbur səzam ɓa.

¹⁸ Yaŋ nokum pay dəpaŋ na, kəmulyoŋ səmmba Yawe! Kətemeŋ pay dəpaŋ aka Yawe, pumpum na, ndən dədawda gədəv aka sap net mə Israyelɗe.

¹⁹ An gesiŋ dələv nawray nokum tay də heslepe azani, asna məddoŋ aka dələv na Yawe, məs təki nassa na Yawe asan adaka; mərslə təki haran nokum a walaŋmə, kətemeŋ aka Yawe ɓa, kətemeŋ akam də ərka gəlamatuya mbərən, a maŋgava an na Yawe Maŋgəlva nam ɓa.

²⁰ Gala Akan wətən Zera, araygən matuya dəwəlsən zəga mətakən na, aka sap net mə Israyelɗe yi ədagədəv ateh ɓa sa? Ndən takərgən dəzə sən mbərayən nan ɓa.»

²¹ Yaŋ kirtin Ruben dit kirtin Gad, gəm wəɗak na mahəlfa na Manase azlan sitin deyeɗe na məlma naddəvit mahəlfaɗe na Israyel meɓɓet neki, aɓɗaŋ na:

²² «Daya, Maŋgəlva net meŋgilveɗi yi, Daya, Maŋgəlva net meŋgilveɗ asənək pakə, ya Israyel pak wasəna! An kiɓəɓəl məgəɗə, an əmzlah məmzlah səmmba Yawe na, adawkõhgəm dəppaŋ ɓa!

²³ An mərka gəlamatuya nam vi kamzləh səmmba Yawe yi, may kaɗɗa əvəl nawzla kurmbuɗuku, may kaɗɗa əvəl adaka, may kawzaɓ-Maŋgəlva adak nawrəh zəzay yi na, kəta Yawe sən kiyən dəzga' səmə!

²⁴ Ya vaski ɓa! Nam geslne dədəm məɗɗa vaska, də əɗɗum na kuzuŋ pumpum na kirtukum wanəhaŋ sitin kirtəm na: Awan dəsapokum də Yawe Maŋgəlva na Israyel di?

²⁵ A walaŋgəm də mənokum kirtin Ruben gəm kirtin Gad na, Yawe aɗiyək meŋge, ndəni Yurden. Tay dəsopokum də Yawe ɓa! Vasna, kirtukum wazlzleɓetin en nam ka agagdakanən na Yawe əmpa ɓa.

²⁶ Ndəni kan mənah na: mərkəsəm təki nawzaɓ-Maŋgəlva namə, məza naɗɗa əvəl nawzla kurmbuɗuku may nawzaɓ-Maŋgəlva ɓa,

²⁷ dəsangən ka zəga narban awalaŋgəm də mənokum, gəm a weleŋgit kirtəm dit kirtukum na, nam pak mənam tat əkkaman Yawe də əɗɗa əvəl nawzla kurmbuɗuku, əzaɓ-Maŋgəlva nawslere may əzaɓ-Maŋgəlva nawrəh zazaya, vi pummo na kirtukum adawnahaŋ sit kirtəm na: wən nokum tay də Yawe ɓa ɓa.

²⁸ Yaŋ mətawan kan na, an laha, apeleŋgik əpelis səmə may sit kirtəmə, mənahgən na: Mula təki nawzaɓ-Maŋgəlva va efiŋgiɗəm arkanəni, səɗek va an na Yawe. Ya ammba əvəl nawzla kurmbuɗuki ɓa, ammba əzaɓ-Maŋgəlva yi ɓa, vi dəsangən va zəga narba wən awalaŋgəm də mənokumi yi!

²⁹ Nam dəde səm nawɓoŋ aka Yawe, kamzləh pay dəpaŋ səmmba Yawe, karka təki nawzaɓ-Maŋgəlva sən əvəl nawzla kurmbuɗuku, may kaɗɗa əvəl temtemi, may əzaɓ-Maŋgəlva, məza aka təki nawzaɓ-Maŋgəlva na Yawe Maŋgəlva nam məs dəsan a ma təki nassa nanəŋ ɓa ɓa!»

³⁰ Məsdələv Pinhas, dit ɗiy gugriɗ na dəlva, gəm ɗiy gugriɗ na mahəlfa na Israyel məs dəssoŋ dəndən səza aprəmən əpel an kirtin Ruben dit kirtin Gad gəm kirtin Manase apeleŋ na, annekik ziti.

³¹ Pinhas wətən məsdələv Ele'azar aɓsit kirtin Ruben dit kirtin Gad gəm kirtin Manase na: «Məsənək pay dəpaŋ na, Yawe tay a walaŋmə adan kəraygənən matuya na Yawe ɓaŋka. Mbaraka, kəɗɗaŋ zəga nawki ədagədəv na Yawe aket mə Israyelɗe ɓa.»

³² Siske na, Pinhas wət məsdələv Ele'azar, dit ɗiy gugriɗ zaraŋ səzet kirtin Ruben, kirtin Gad amilyoŋ səka dələv na Galad aka dələv na Kana'an ezet mə Israyelɗe aboton sitin gabbani.

³³ Wən nan annekik zit mə Israyelɗe, asokonənək Maŋgəlva. Appanənək əɗɗum nadda əwak sən may əzla dələv məs ɗiy na Ruben dit ɗiy na Gad assoŋ adak də gəla.

³⁴ Kirtin Ruben dit kirtin Gad alvanənək na: «Gəla na matuya miziwe awalaŋgəm narban na, Yawe yi Maŋgəlva.»