Yosuwa 2 - Bible en Guidar

Yosuwa tay əslən ɗiy sula əseŋger səmyã Yeriko

¹ Daga sə Sitim Yosuwa wətən Nun aslən zel sula əseŋger səmyã na təki mahaɗama, aɓsit na: «Məddoŋ mula mamba dəlva gəm walaŋgəla na Yeriko.» Addoŋguk adaka, atoŋgoŋ anat guluk məpolkoyokda adawyaŋ na Rahap, avoŋgoŋ adaka.

² Məlĩ na Yeriko aprəmək na: «Ɗiy azzoŋguk aŋ na ma dəfɗəŋ sənet mə Israyelɗe da, vi kawseŋger səmyã dəlva.»

³ Yaŋ məlĩ na Yeriko aslən ənah sət Rahap na: «Agilgit ɗiy dəzzoŋ anokda, dətoŋgoŋ eŋgil anokdeŋki, vi kawseŋger səmyã dələv bayman azzoŋgu.»

⁴ Yaŋ guluk nak təke zel sula neki, təɗemeti, təmna: «Gesiŋ ɗiy azzoŋguk anawda, ya nəsən na səŋgaŋdi ɓa.

⁵ Adan guzli agəɗə, adaŋglaŋ əmsan maddamba na walaŋgəla, ɗiy vet agulyoŋko. Nəsən təki ɗiyis addoŋ ɓa. Məgəm zukum ammbeti, wakə rufnini.»

⁶ Mbaraka na, təpeŋgitik aka gəla məggbo'o, təɗemet addivit ŋgev məs təzeɓet akan adaka.

⁷ Ɗiy na məlĩ ammbet zirif kəla təki nawsereh a Yurden, yaŋ məmsan maddamba ləŋ səza ɗiy məzəzbetin nek agulyoŋgu.

⁸ Tak dəɓlaŋ əvoŋ tagay ɓa, Rahap peŋ ezet aka gəla məggbo'o,

⁹ Təɓsit na: «Nəsənək na, Yawe apsukumək dəlvəŋka, geslne nokum arməmək sawɓa, ɗiy naka dəlvəŋ pak tahəŋ əkker abokum.

¹⁰ Vi məprəmək na, Yawe akkpe'ik iŋkile sə pehe net vəlarɗe səbokum aka pay kəgulyoŋ sə Eziptə, gəm an kəɗɗaŋ sitiŋ milyeŋge net Amorɗe sula, anet may Sihon də Og məs kəzetin dəgar ki Yurden də zəga navet pakəŋki.

¹¹ Məprəmək wən vani, makram aɓohko; ɗəf təttaka tay məs makran nawsilyan abokum əmpa ɓa, vi Yawe Maŋgəlva nokum na, Maŋgəlva yi a disiŋ gəm aka dəlvafuŋ aŋka.

¹² Gəgaŋ na, adan Nəgəɗ sukumək moggoni, məsway su aba Yawe kan na, wakəɗɗaŋ moggon sən gəla na əbba tamə. Məvay zəga narban su na,

¹³ wakəppetin may əbba, əmma, milmiŋgiɗu mezeŋgleket dit muguluŋgit medereti də zəga net pakə, wakəkõh gəmən səma əmta.»

¹⁴ Ɗiy nek aɓsətən na: «Suway məmtə a gəlokum, an kəppasanən wən naməŋ ɓa hara. Asna pay Yawe adapsəm dəlvəŋ na, wamədaw aka əsler namə waməgəɗ suk moggoni.»

¹⁵ Siske na, ndət prikgit ɗiy nek də helege kəla təkifoŋgo məppa aza gəla, vi gəla nat təsat van na sler də zlava məs dətərwəsl ki walaŋgəla vani yi.

¹⁶ Təɓsit na: «Məddoŋ aggərma, vi məzəzbokumən adarmukumən ɓa; məɗam adak pay hoku, hã gap məzəzbokumən buryoku; dərɓagan na, kəddoŋgən zəga nokum.»

¹⁷ Ɗiy vet aɓsətən na: «Vaŋ mədawpəl kiyəm səddəv əsway məs kəswaygəməŋka.

¹⁸ Pay mədawtoŋ aka dələv van na, kətoktəgən halagak papraŋgək watwat kəŋ ama təkifoŋgo məppa aza gəla, məs kəprikgəm kəla dak naka; kəkkeletgin may afuk dət moko, may milmiŋgiɗko, dit ɗiy na daŋgla na afuk pak, eŋgil azoko.

¹⁹ An dəggar ki metive na gəla nok əgilyen appaka pak, mbel nan ka kinəŋgə, nam wən nam tay ɓa; ya an dəsan də is eŋgili, an va ɗəf ane'ik azani, asna mbel nan ka kiyməŋgə.

²⁰ Ya an kəppasanək wən naməŋka, asna əsway məs kəswaygəməŋ apparək səzamə.»

²¹ Yas təmna: «Kəta dəgəɗ va mokuməska!» Ndət tive taw siti, ndəɗaŋ mbataŋgə. Ndət kan halagak papraŋgək watwat nak a ma təkifoŋgo məppa aza gəla nak tok ətokta.

²² Məseŋgereŋ səmyã dələv nek mbataŋ aggərma, aɗamaŋ adak pay hoku, hã ɗiy məzəzbetin məle'i. Məzəzbetin vet akeyetinik tive tive pakə, ya dərihinin ɓa.

²³ Ɗiy sula nek kan aprikeŋ səggərma; ndəɗaŋ dəgaraŋ, payaŋ aza Yosuwa wətən Nun, aboton sənən zəga an dərih gərakə.

²⁴ Aɓsənən Yosuwa na: «Gesiŋ, Yawe apsəmək dələv bayman ammba vamə. Ɗiy nadak vet kpak beymet geslne armek səmə.»