Yosuwa 14 - Bible en Guidar

Dələv nammba pay na moskoy na Yurden ( 14:1—19:51 ) Uɗak na dələv na Kana'an

¹ Aŋki təki məs mə Israyelɗe arəhaŋ aka dələv na Kana'an, an may məsdələv Ele'azar, Yosuwa wətən Nun, gəm deyeɗe na mahəlfa net kirtin Israyel awɗakan sitin ka neti.

² Uɗak na hara təki sit mahəlfaɗe vaytak gəm wəɗak na mahəlfa agəɗək də vẽpəlwa va Yawe aɗi wən nan sən Moyisi.

³ Vi hara dələv net mahəlfaɗe sula gəm wəɗak na mahəlfa na, Moyis apsitik dəgar ki Yurden, ya net mə leviɗe na, dəpsit hara dələv net a weleŋgit ɗiy ɓa.

⁴ Kirtin Yosef awɗakaŋgək mahəlfa sula: na Manase gəm na Efrayim, ya haran net mə leviɗe tay məpsit aka dələv van abbər kiyit walaŋgəleɗe gugriɗ nassa gəm təki an kiyit tərwəsl nawtaɗ na arya net dit zəgeɗ net ɓa.

⁵ Mə Israyelɗe aɗɗanənək va Yawe aɗi wən nan sən Moyisi, awɗaknənək dələv vani.

⁶ Kirtin Yuda payaŋ aza Yosuwa a Gilgal, yaŋ Kaleb wətən Yefunne mə Kenaz aɓsən na: «kəsənək an Yawe apel sən Moyis ɗəf na Maŋgəlva aka wən nawa gəm aka wən nok a Kades-Barneya.

⁷ Dəpas na in tat də wəzva kaklaw poɗo gala Moyis, gawla na Yawe aslənəw sə Kades-Barneya əseŋger səmyã dəlvəŋka, nəboton sənək gabban makraw taka;

⁸ milmiŋgiɗu en dəddoŋ də in ageslne' gitinik ɗiyi, naw nəzbanək Yawe Maŋgəlva naw makraw taka.

⁹ Pay dəpas na, Moyis asway vaŋka: suway, dələv məs təluk andap pak wasan faɗ ka noko gəm ka net kirtuko, vi kəzbanək Yawe Maŋgəlva naw mokrok taka.

¹⁰ Yaŋ gəgaŋ na, Yawe appawək ənziya egge va anahə, agəɗək wəzva kaklaw poɗo kiyin sle' səza Yawe apel əpeləs sən Moyis gala mə Israyelɗe adabbalaŋ a kapta-muyã; ya gəgaŋ na, in yakəŋ pay dəpaŋ də wəzva kaklaw dədopoɗo kiyən sle'i.

¹¹ Də as pak in tat gboŋgboŋ va aka pay Moyis aslənwa. Va gbogboŋ nawgay may naɗɗa zəga temtem asan azaw lahəŋka, vaski asan azaw gəgaŋka'e.

¹² Gəgaŋ na, apsu kiyit mossorgoɗe məs Yawe apel wən nan daskəŋka, vi kəprəmək pay dəpas na, mə Anakɗe tahəŋ adak dit walaŋgəleɗe gugriɗ mətərwəsl kiyti. Kuzuŋ Yawe wasan də in nəmõhgən ka naw va Yawe anahə.»

¹³ Yosuwa kan aɗi əzaɓ aka Kaleb wətən Yefunne, apsən walaŋgəla-metiŋ na Hebron ka nani.

¹⁴ Vini yi Kaleb wətən Yefunne zev Kenaz, arəh Hebron ka nan hã pay dəpaŋka, vi azbanək Yawe Maŋgəlva na Israyel makran taka.

¹⁵ Iya na Hebron van lahəŋ na, Kiryat-Arba, Arba van lahəŋ na, ndəni ɗəf məs də sləman day sə weleŋgit mə Anakɗe. Siske na, dələv affetik məza wəgay ɓa.