Yosuwa 11 - Bible en Guidar

Wəlpa na Merom

¹ Adan Yabin, məlĩ na Hasor aprəm wən na əska wəla na Yosuwa na, ndən metiveɗe slən aza Yobab məlĩ na Madon, aza məlĩ na Simron gəm aza məlĩ na Akesaf.

² Gəm ezet milyeŋge naggərəm nadda kəla disiŋ, na təki məpəlayya də dohoŋ na Kinneret, na miktiki, na waleŋgit mossorgoɗe na Dor dəmmba pay na moskoyo;

³ gəm sit mə Kana'anɗe dəmmba pay nampum gəm dəmmba pay na moskoyo, sit mə Amorɗe, sit mə Hittiɗe, sit mə Perziɗe, sit mə Yebusɗe naka mossorgo, gəm sit mə Hivviɗe məs dəssoŋ aba gərəm na Hermon, aka dələv na Mispa.

⁴ Yaŋ kan agulyoŋ ndəɗaŋ dit dibirgidikit beymeti, ɗiy diyɗa va hoyoŋko a ma pehe, gəm pilseŋge dit mawteɗe net pilseŋge diyɗa.

⁵ Milyeŋges pak asapaŋka, azzoŋ azinən dibirgidik net sap a met iŋkile na Merom vi kalpa də Israyel.

⁶ Yawe aɓsən Yosuwa na: «Kəgeslne' sit ɓa, vi pummo, də pay va gəgaŋkəŋ na, wanipsit məbeyit net beymet sit mə Israyelɗe; Kətawgən zləzloŋgboŋ tilit pilseŋge neti, gəm kəɗi sitgin offo sit mawteɗe net pilseŋge neti.»

⁷ Yosuwa dit ɗiy nalpa nan beymet agapaŋ gboŋgboyõ əket mədigirzike a met iŋkile na Merom, aket wop əzbəraŋgə.

⁸ Yawe apsitik ammba vet mə Israyelɗe, askanənək wəleti, arɓehetinik hã gap Sidon metiŋgini, gəm hã Misrefot-Mayim, hã a miktik na Mispe dəmmba pay nampum. Abeynin məza əmbraŋ ɗəf madaran ɓa.

⁹ Yosuwa aɗɗa sitik va Yawe anah səni: Ataw zləzloŋgboŋ tilit pilseŋge neti, aɗi offo sit mawteɗe net pilseŋge neti.

Va məmõh Hassor

¹⁰ Pay dəpaski Yosuwa amili, azəm Hassor; abay məlĩ nadak də masalam. Hasor van lahəŋ na, adaki milyeŋge na kəla disiŋ pak adawzlanəni.

¹¹ Abeyinik ɗiy nadak pak də masalam; azetin kakãhə̃, zəga tay məmbra madaran adak ɓa, yas azlanən Hasor van də offo.

¹² Yosuwa askak wəlet milyeŋge məs dəsapaŋ nek pakə, amõh walaŋgəleɗe neti. Yaŋ abey milyeŋge dit ɗiy naddivit walaŋgəleɗe vet pak də masalam azet kakãhə̃, va Moyis gawla na Yawe aɗi wən nani.

¹³ Də as pak, mbəksa Hasor kaka' məs Yosuwa azləŋ na, mə Israyelɗe dəɗiyaŋ offo sit walaŋgəleɗe naket mossorgoɗe net ɓa.

¹⁴ Mə Israyelɗe andeninik zəgeɗ na sləma gəm zəgeɗ memeyẽɗ na walaŋgəleɗe vet pakə; ya ɗiy naddivit na, net abeyninik pəhə, dəmbraŋ zəga madaran təttaka ɓa.

¹⁵ Va Yawe aver sən məgəɗ wəza nan Moyis aka wənəska, vaski Moyis aver sən Yosuwa, vas vani Yosuwa agəɗə dəmzla səka əpel an Yawe aɗi wən nan sən Moyis ɓa.

Yosuwa abayək ma əska wəlet dəlveŋge

¹⁶ Vaski Yosuwa azəm dələv bayman: ki mossorgoɗe də dələv na dohoŋ, Gosen dəwənnani, miktiki, təki məpəlayya, gəm ki mossorgoɗe na Israyel də miktik nani.

¹⁷ Təŋ səza mossorgo na Halak məs dəsan nadda a Se'ir hã a Ba'al-Gad addəv miktik na Liban, aba gərəm na Hermon, armek milyeŋge nadak pak arbisiti, abeye.

¹⁸ Yosuwa agəɗək əvoŋ diyɗa aka əlpa dit milyeŋge pakə.

¹⁹ Walaŋgəla-metiŋ tay təttaka dəsler dit mə Israyelɗe səbbirit mə Hittiɗe dəssoŋ a Gabawən ɓa; en dəmbraŋ pak də wəlpa məmõhti.

²⁰ Vasna, ɓəɓəl na mekret səza Yawe asil ka dəlmaŋgən əgay də Israyel, vi kawzet kakãhə, ulasahã adawsan aket ɓa va Yawe aɗi wən nawzet sən Moyisi.

²¹ Pay dəpas na, Yosuwa ambatək əbey mə Anakɗe naggərəm na Hebron, na Debir, na Anab, gəm naggərəm na Yuda bayman dit en naggərəm na Israyel bayman. Yosuwa akkẽhik dit walaŋgəleɗe gugriɗ net pakə.

²² Mə Anakɗe tahəŋ dəmbraŋ aka dələv net mə Israyelɗe ɓa. A Gaza, a Gat gəm a Asdod kaka' ambraŋgə.

²³ Yosuwa agəmək dələv bayman va Yawe anah sən Moyisi, apsit mə Israyelɗe ka neti də uɗakan sit aza mahəlfa neti. Siske na, dələv asanək zay məza wəgay ɓa.