Yonas 4 - Bible en Guidar

Maŋgəlva awələk sãhã aka Niniwe ( 4:1-11 ) Maŋgəlva awlak səsãh Niniwe

¹ Wənəs assanək Yonas diyɗa sawɓa, gədəvən adəka.

² Akkamanək Yawe, amna: «Ha'aw! Yawe aski nədawnah pay nəsaw aka dələv naw ɓa sa? Vini nəgəm zu nənzaw a Tarsis. Vi nəsənka Maŋgəlva məs mbəlembəle də moggon kənani, kada gədəv go' go' ɓa, moggon nok diyɗay sawɓa, ya məsla zuk kənan naffeten mokrok səka əɗɗa mbərayən.

³ Yaŋ na Yawe kamə agəm zeŋgilewa; ɗəɗah su əmta ki əsaw madarawa.»

⁴ Yawe aɓsən na: «Moggon kədaɗɗa də wədagədəvəs kan sa?»

⁵ Ya Yonas agilik sə walaŋgəla mettin, asan ammba pay nampum. Agəɗək guɗuku nassa ara zeŋgileni, vi kawla an dədaɗɗa a walaŋgəla-metiŋgi.

⁶ Yaŋ, Yawe Maŋgəlva agilgin bozlo, aɓayka, vi Yonas dəsangən ara zeŋgileni, kawkõhgən səddəv tatwãh nani; Yonas annekenək zən diyɗa aka wən na bozlo vani.

⁷ Vit pummo nani, də mompumo pum, Maŋgəlva aslənək doŋgoyoŋ, adek agul addəv bozlo naka, yas amtə.

⁸ Adan pay agili, Maŋgəlva aslənək səmyã kəkãh səmmba pay nampum. Pay azlak ki Yonas, aŋgəl əɓirzliwe. Yonas attokək ka dəmtəgəni, amna: «Ɗəɗah su əmta ki əsaw madarawa.»

⁹ Yaŋ Maŋgəlva anah sən Yonas na: «Moggoni kədəgən gədəv aka wən na bozlo kan sa?» Yonas, azlan sənəka: «Ha'aw, də tiveni nədəgədəv hã gap əmta.»

¹⁰ Yaŋ Yawe anah na: «Nok is tat ulasasãh bozlo, məs kərah tatwãh ammban ɓa, istə kəɓaygən ɓa. Ɗəfəɗ takay agili, dəfəɗ takay amtə.

¹¹ Ya naw nədawla sasãh Niniwe, walaŋgəla-metiŋgin, məs ɗiy addəvən day ki gabal səkat də kaklaw sula 120 000, məs dəsənən uɗakan moggon də mbərayən ɓa, gəm zəgeɗ memeyẽɗ diyɗaŋ ɓa sa?»