Yonas 2 - Bible en Guidar

Wəɗi marava na Yonas gəm əkõh nani ( 2:1-11 ) Əkkam na Yonas

¹ Yawe aslən kilif metiŋgin asɗək Yonas. Yonas asanək wəsɓəta hoku də əvoŋ hoku, addəv kilifi.

² Səddəv kilfi, Yonas akkamanək Yawe Maŋgəlva nan na:

³ Addəv tatwãh nawa, nəɓuh sukuk mawa, Yawe, kəzlan suwəka; Sə təki nassa net ɗiy mimtiti nəkkamokuk nabbah suwa ya kəprəmwəka.

⁴ Kəzgawək a pehe, addekit iŋkile kpukpumɗe. Helege net atəpguwəka, vovolumɗe nok gaŋgaŋ adappaɗaŋ dəkawa.

⁵ Naw nənahək na: «Mərɓəwi səma horoko, ya wanəzban əzi haraw aka gəla salala noko.»

⁶ Iŋkile agulwənək də wəlawa. Vov kpukpum atərwəzlwəka, mẽmẽteɗ aslerneheŋ aka kiwa.

⁷ Nəprikik ŋgbu' afuŋ ammbet mossorgoɗe gugriɗe, dələv amsanək maddamba nan akawa faɗə, nok na, Yawe Maŋgəlva nawa, kəgilgəwək madarawa.

⁸ Aka əmpəs naw adarsla, nəɗɗumokuko Yawe, Əkkam naw agapək hã azok, addəv Gəla salala noko.

⁹ Məzəgagdaketin zəgeɗ ɗarə, dəppanən əɓe' siti.

¹⁰ Ya naw na, wanəfet akok dəlvok də gəlya, wanəzaɓ suk Maŋgəlva, Wanəɗɗa an maw aynə nagəɗ suko. Əkõh ava Yawe yi.

¹¹ Yawe apel sənək kilfi yas aptek Yonas appaka aka dəlvafuŋ.