Yohanna 9 - Bible en Guidar

Yesu tay əmbəlgən ɗəf məwan daŋgar

¹ Dawtoŋ na, Yesu awəl ɗəf muwan daŋgarə.

² Gewleɗ nan assohõnənək dawnəh na: Mərbəzəga, naway dəgəɗ mambray di, ndən sa awaniɓa migilin ka muwan daŋgarəŋka?

³ Yesu azlanəka: Ndən dəgəɗ mambray ɓa, migilin ɓa, ya vi wəzeɗe na Maŋgəlva dərbaŋgən azani yi.

⁴ Adan kapay yi tagay, adahək məɗɗegin wəzeɗe na ɗəf dəslənwa. Dəfəɗ tay əzzani, ɗəf tay dədawɓap əɗɗa wəza ɓa.

⁵ Adan In tat aka dəlva, əkeɗeɗe na dələv nənani.

⁶ Dərɓaga Yesu apel wənəska, ndən mefɗe afuŋ tufu, alaɓ dələv də mefɗe veti, yaŋ akip aka hara daŋgar naka.

⁷ Yaŋ anah sən na: Dok əɗɗa horok a bobok na Silowe, va əboton na maslən. Ndən mbat aɗa haran kana, amil na tay ula.

⁸ Adan meggeŋgiɗin dit ɗiy məzulanən lahəŋ daŋgla zəga aba tive awlanəni, aɓɗaŋ na: Ɗəfəŋki dədawsan aba tive əŋgla zəga nak ɓa sa?

⁹ Ɗiy meɓɓet aɓɗaŋ na: Ndəni. Ɗiy meɓɓet aɓɗaŋ na: Awwo, ndəni ɓa, əgil agil va ndəni. Yaŋ anah dəvan na: Intə.

¹⁰ Anah sənən kan na: Ya mbarmbari horok akol di?

¹¹ Azlanəka: Ɗəf məs adawyaŋ na Yesu dəlaɓ dələv akip aka harawa, yaŋ anah su na: Dok əɗɗa horok a Silowe. Səza nəmbat adak nəɗa, haraw akol kana.

¹² Yaŋ aɓsənən na: Aŋgay ɗəf van asan di? Amna: Nəsən ɓa.

Farisaɗe assohõnənək ma daŋgar məs məkol harani

¹³ Akanənək ɗəf dəsan daŋgar lahəŋ nak azet Farisaɗe.

¹⁴ Vi pay naffeti Yesu allaɓ dəlva, akol sən harani.

¹⁵ Yaŋ Farisaɗe tam assohõnən ma daŋgar kan na Mbarmbar amsak ula di. Nan aɓsit na: dələv məllaɓən akip aka harawa, nəɗa, yaŋ nədawla.

¹⁶ Ɗiy meɓɓet səret Farisaɗe aɓɗaŋ kan na: Ɗəfəs səza Maŋgəlva ade ɓa, adan dərma wən na pay naffet ɓa. Meɓɓet aɓɗaŋ na: Mbarmbar ɗəf məs mambray adawɓap əɗɗa sekeneɗ vas di? Uɗak agəɗək a waleŋti.

¹⁷ Anahaŋ sənən daŋgar nak əmpa na: nok mbar kədawnəh akan adan akol suk horokuŋ di? Yaŋ nan amna: Məskəleŋgi yi.

¹⁸ Mə Yudeɗ dətafnən na daŋgari lahəŋka yaŋ haran akolu ɓa hã ndəɗaŋ dah iyenin migil ɗəf məs haran dəkol naka.

¹⁹ Assohẽtin dawnəh na: Ɗəfəŋ na, wətukumi, nokum kədawnahaŋ na muwan daŋgari, ya mbari adawla kakaŋ kan di?

²⁰ Migilin azlanən kana aɓɗaŋ na: Məsənək na aŋ wətəmi, daŋgar məwani.

²¹ Ya mbar kakaŋ adawla di na, məsən ɓa, awaniɓa naway dəkol sən haran di na, nam məsən ɓa. Metiŋgini məssohõn mani, dəpel aka zən ndən dəvani.

²² Migilin anahaŋ vasna vi tay əgeslne'eŋ sit mə Yudeɗi. Vi mə Yudeɗ vet aslereŋgək na, an ɗəf anahək na Yesu yi Kristu na, kawgilgəni səddəv gəla nakkal net Yudeɗi.

²³ Vini migilin anahaŋ na: Metiŋgini məssohõn mani.

²⁴ Farisaɗe ayanənək daŋgar təl ma sula'ən, aɓsənən na, agagdakan Maŋgəlva. Nam məsənka, ɗəfəŋka məs mambrayi.

²⁵ Azlanəka: An məs mambrayi, naw nəsən ɓa, zəga təttaka nəsənə, daŋgar nan lahəŋka, kakaŋ in tat ula.

²⁶ Aɓsənən na: Mi agəɗ suk di? Mbarmbari akol suk horok di?

²⁷ Azlan sitike: Nənah sukumuk səkay ya kəprəmnən ɓa. Vimi kəŋglaŋ əprəmən əmpa'a di? Nokum pak mokum aka əkkpaŋ gewleɗ nan sa?

²⁸ Aranənka: Aɓɗaŋ na: Istə gawla nani, nam gewleɗ na Moyis mənani.

²⁹ Nam məsənək na Maŋgəlva apel sənək Moyis, ya ɗəfəŋka, məsən sə təki ade ɓa.

³⁰ Azlani aɓsit na: As vani nassa sən gərəŋgə, nokum, kəsənən sə təki ade ɓa, ya akol suwək harawa.

³¹ Məsənka Maŋgəlva aprim məs mambrayɗe ɓa, ya an ɗəf tay əgagdakan Maŋgəlva gəm əɗɗa əŋgla nani, waprəm sən ɗəfəska.

³² Məprəmni ɗah na, ɗəf akoluk hara ɗəf məwan daŋgar ɓa.

³³ Va ɗəfəŋ səza Maŋgəlva yi ɓa, kəta zəga tay adawɓap əɗɗa ɓa.

³⁴ Azlanənka, aɓsənən na: Addəv mambray muwuk boku, yaŋ nok kədarbə səm zəga sa? Ndəɗaŋ firik əzgan appaka.

Daŋgar na makra ɗəfa

³⁵ Adan Yesu aprəm na arɓahanək appaka na, ndən pay ərəhəŋ aɓsən na: Nok, kətafək Wətən Ɗəf sa?

³⁶ Azlanəka, amna: Naway di Daya? Vi nətafgəni.

³⁷ Yesu aɓsən na: Kulaka, məzupel də isəŋ na, ndəni yi.

³⁸ Amna: Nətafəka Daya. Yaŋ Appu' abani.

³⁹ Yaŋ Yesu amna: Nəde aka dəlvəŋ na, vi kawtawwəni, vi məs awlaŋ ɓa dulaŋgəni, məzulaŋ tam dətipeŋgini.

⁴⁰ Yaŋ Farisaɗe səret en dəssoŋ dəndən aprəmən wənəska, aɓsənən na: Nam pak daŋgarɗe mənan kan sa?

⁴¹ Yesu aɓsit na: Va daŋgarɗe kənanaŋ na, kəta a kəssoŋ də mambray ɓa, ya kakaŋ na mənokum tat ənəh na: Mənam tat ula. Vini mambray nokum asan slippe.