Yohanna 7 - Bible en Guidar

Milmiŋgiɗin Yesu dətafnən ɓa

¹ Dərɓaga aska, Yesu abbalək a Galile, dəŋgəl əmbat a Yude ɓa, vi mə Yudeɗ tay əkayanən kawbayni.

² Ya əzləra net mə Yudeɗ məs adawyaŋ na əzləra net gizlirkeɗe go'oy.

³ Milmiŋgiɗin aɓsənən na: Asil saŋka, dok a Yude, vi gewleɗ nok dulanəngən wəzeɗe nok kədaɗɗa.

⁴ Vi ɗəf aɗaman na zən an aŋgələk ɗiy dəsənəngən ɓa. Adan is tat əɗɗa wəzeɗe vaŋkəŋ na, arban zuk azet ɗiyi.

⁵ Vi milmiŋgiɗin dayday dətafnən ɓa.

⁶ Yesu aɓsit kan na: Pay naw dəgap tagay ɓa. Ya nokum na, pay awani di pak asləka.

⁷ Ənziya egge azelkum na ɓa, ya naw wazelwa, vi in tat ərban na, wəzeɗe nan mbəreytiŋ.

⁸ Nokum məddoŋ a əzləra vani, naw maw tay aka əmbat ɓa, vi pay naw dəgap tagay ɓa.

⁹ Səza anah vaska, nan asanək a Galile.

Yesu a wəzləra net gizlirkeɗe

¹⁰ Adan milmiŋgiɗin addoŋ a wəzləra, yaŋ nan pak alə məza birre ɓa, va də mahaɗamma.

¹¹ Ndəni mə Yudeɗ akayanənək addəv əzləra dawnəh na: Aŋgay aŋ van kan di?

¹² Əpel agəɗək akan diyɗa a walaŋgit ɗiyi. Ɗiy meɓɓet aɓɗaŋ na: Ɗəf moggoni. Ɗiy meɓɓet tam aɓɗaŋ na: Awwo, ɗiy adawzeti.

¹³ Də as pak ɗəf tay dədawpel wən nan kerekere ɓa, sən geslne net mə Yudeɗi.

¹⁴ Aka ndiŋndiŋ na wəzləra, Yesu atoŋ addəv Gəla na Maŋgəlva, yaŋ adawyeget ɗiyi.

¹⁵ Mə Yudeɗ aggətaŋka, aɓɗaŋ na: Mbari ɗəfəŋ asən Ɗerewel na Maŋgəlva vaŋ ndən məs dəyagan ɓaŋ di?

¹⁶ Yesu azlan sitike aɓsit na: Ya iyak naw səzawi ɓa, səza məs dəslənwi.

¹⁷ An ɗəf aŋgələk əɗɗa əŋgla na Maŋgəlva na, wasən na əyakəŋ səza Maŋgəlva ade awaniɓa na kiyu nədawpele.

¹⁸ Ɗəf məzupel na kiyən na, gagdak nan adawkayani, ya ɗəf məzukayan gagdak na məs dəsləna, nan təstəsi, mambray tay azan ɓa.

¹⁹ Moyis dəpsukum mahenziŋ ɓa sa? Ya ɗəf təttaka səmmbokum tay dərma mahenziŋ ɓa. Vimi kədawkay əbaywən di?

²⁰ Ɗiy azlanənək na: Mətemuk kənani: Naway dədawkay əbayuk di?

²¹ Yesu azlani aɓsit na: Wəza təttaka nəgəɗ kaka'ə, kəggətaŋgək pakgukum.

²² Moyis aɗi sukumək wən na əskəl awra, wən nan səzan ade ɓa, səzet efiŋgiɗmi. Ndəni kədaskəlnin kirin awra pay naffete.

²³ An məskəli ɗəf awra pay naffete vi mahenziŋ na Moyis əray ɓa, ya vimi gəduvkum adawda akaw vi nəmbəlgən ɗəf sokatak pay naffet di?

²⁴ Məpan ətawwən va aza ula. Mətawwən təstəsə.

Yesu yi Kristu sa?

²⁵ Yaŋ ɗiy na Yerusalem meɓɓet aɓɗaŋ na: Ndəni məs adawkayanən nawbay nak ɓa sa?

²⁶ Yaŋ əpel kerekere, tay an adawpeleŋ sənən ɓa. Mbərən ɓa na, ɗiy gugriɗ nam asənnənək gesiŋ na ndəni Kristu soko?

²⁷ Ɗəf aŋka, məsənək təki ade, ya pay Kristu adazzani, ɗəf tay nawsən təki adazzan ɓa.

²⁸ Yesu tay əyeget ɗiy addəv Gəla na Maŋgəlva, aslanək wəlan dayadaya, amna: Kəsənwənka, kəsənənək səŋga nan di, nəde na kiyu ɓa. Ya məs dəslənwa, nan gesiŋgi, nokum kəsənən ɓa.

²⁹ Naw nəsənəka, vi səzan nəde, ndən dəslənwa.

³⁰ Yaŋ akayaŋ ərmani, ya ɗəf tay dərəŋgən ɓa vi pay nan dəgap tagay ɓa.

³¹ Ɗiy diyɗa səddəv vanday atafənka, yaŋ aɓɗaŋ na: An Kristu adek na wagəɗ sekeneɗ day ki en ɗəfəŋ agəɗəŋ sa?

Məsləni məgaɗe karma Yesu

³² Farisaɗe aprəmənək məs ɗiy adawseske'eŋ aka wən na Yesu, yaŋ deyeɗe net məsdəlveŋge dit Farisaɗe aslənaŋ məgaɗe karmani.

³³ Yesu Amna: in tat də mənokum pay siɗikke tagay, asna wanəmbat aza məs dəslənwa.

³⁴ Wakəkayawəni, ya kərəhwən na ɓa, vi a təki nəsawa, kəɓapən na ədda ɓa.

³⁵ Mə Yudeɗ anahaŋgək a walaŋ ziti: Aŋga adawmbat məɓap na ərəhən ɓaŋ di? Wambat azet ɗiy en dətərayaŋ a weleŋgit Grekɗe vi karban sit wən sa?

³⁶ Əpeləŋ mbar aŋgəl ənah məs anah na: Wakəkayawəni, ya kərəhwən na ɓa, vi a təki nəsawa, kəɓapən na ədda ɓaŋ di?

Məlpeŋge net iŋkile medereti

³⁷ Pay əgrak wəzləra, ndəni pay an na paya. Pay nani Yesu le' ziw apel dayadaya dawnəh na: Ɗəf məs meme adaŋ pak dəde azawa, dəsəgəni,

³⁸ Ɗəf dətaf pak Ɗerewel Salala amna, məlpeŋge net iŋkile mederet waymaŋ səddəvni.

³⁹ Apel vasna aka wən na Əmpəs məs ɗiy en dətafən adawrəhaŋgə, vi Əmpəs van tay tagay ɓa. Məgagdakani Yesu tagay ɓa.

Vanday agohuk aka wən na Yesu

⁴⁰ Ɗiy meɓɓet səddəv vanday net ɗiy məs dəprəmən əpeliska, aɓɗaŋ na: Gesiŋ, ɗəfəŋ məs kəleŋgi.

⁴¹ Meɓɓet aɓɗaŋ na: Ndəni Kristu. Meɓɓet əmpa aɓɗaŋ na: Kristu sə Galile adazzan sa?

⁴² Ɗerewel dənah na səddəv mahəlfa na Davit gəm sə Bet-Lehem walaŋgəla sə təki Davit asan Kristu adazzan ɓa sa?

⁴³ Uɗak agəɗək a walaŋ vanday aka wən nani.

⁴⁴ Ɗiy meɓɓet sə walaŋgit aŋgəl ərmanəni, ya ɗəf tay dərəŋgən ɓa.

Ki ɓəɓəl net ɗiy gugriɗ net mə Yudeɗi

⁴⁵ Yaŋ məzugaŋ net amndoŋ azet, deyeɗe net məsdəlveŋge dit Farisaɗe, yaŋ net aɓsitin na: Vimi kəkinən ɓa di?

⁴⁶ Məzugaŋ nek azlanənka: Ɗəf tay dəpel ɗah vas ɓa.

⁴⁷ Farisaɗe azlan sitin na: Nokum pak məzokumi sa?

⁴⁸ Ɗəf tay səmmbet ɗiy gugriɗe, awaniɓa sə walaŋgit Farisaɗe məs dətaf sa?

⁴⁹ Ya vanday əŋka, dəsən mahenziŋ ɓa, ɗiy məraygitiŋ.

⁵⁰ Nikodem taka naret məs dəl ɗah azan lahəŋ aɓsit na:

⁵¹ Mahenziŋ nam apələk tive nawtaw wən aka ɗəf məza əprəmən daabəŋ gəm də əsən an məs agəɗ ɓa sa?

⁵² Azlanənka, aɓsənən na: Nok pak sə Galile kənan sa? Akayan lewlewi, wakula na məskəleŋ tay məs dəgil sə Galile ɓa. [

Yesu gəm guluk məku a gizbe

⁵³ Naway pak alək eŋgil ananda.