Yohanna 6 - Bible en Guidar

Yesu tay əzəmgit ɗiy gabal sle'

¹ Dərɓaga aska Yesu mbat dəgar ki pehe na Galile, məs adawyaŋ əmpa na Tiberiyas.

² Ɗiy diyɗa azbanənka, vi awlanənək sekeneɗ məs agəɗ aket məs gbəgbaɗe.

³ Ndəni Yesu apeŋ aka mossorgo metiŋ asan adak dit gewleɗ nani.

⁴ Pak wəzləra net mə Yudeɗ go'oy.

⁵ Səza Yesu aslan harani, awlek ɗiy diyɗa tay əzzoŋ azani. Aɓsən Filip na: Səŋga mədawrəh way nalbah ɗiyiŋ dəzəmaŋgən di?

⁶ Anah vasna vi kawslani, vi nan asənək an adaɗɗa.

⁷ Filip azlan sənəka: meptekeɗ na səkat sula agapaŋ na ɗəf pak dərahgən siɗikke siɗikke ɓa.

⁸ Taka səmmbet gewleɗ nan adawyaŋ na Andre, məlmən Simoŋ Piyer aɓsən na:

⁹ Wiyən tay aŋ dit meptekeɗ sle gəm kilif sula, ya madawtər azet ɗiy diyɗa gbeŋkiŋ di?

¹⁰ Yaŋ Yesu amna: Mənah sit ɗiy dəssoŋgu. Kevile tay a təki nan diyɗa. Ndəni assoŋgu, əŋɗa net wassan zel gap gabal sle.

¹¹ Yaŋ Yesu agim meptekeɗ neki, asokon Maŋgəlva, awɗek sit ɗiy veti. Vaski agəɗ dit kilfi'e. Ɗiy pak arahaŋ va aŋglaŋgə.

¹² Səza abaŋgə, Yesu aɓsit gewleɗ nan na: Məkkalan an dəmbər səmmba veti, vi adawray ɗar ɓa.

¹³ Akkalanənəka, aknahaŋgək gadagarɗe kəlaw kiyit sula də an dəmbər səzet meptekeɗ na haykəmari pepreŋ sle' səmmba vet ɗiy en dəzəmaŋgə.

¹⁴ Adan ɗiy awlanən sekene məs Yesu agəɗə, aɓɗaŋ na: Ɗəfəŋka məskəleŋ gesiŋ an məs nazan aka dəlvi.

¹⁵ Yesu asənək na wazzoŋ karman na gagay, kawɗiyən ka məlyã. Vini akso'on zən aka mossorgo metiŋ əmpa takərgəni.

Yesu tay ədaw aka pehe

¹⁶ Adan moskoy agəɗə, gewleɗ nan apirkoŋguk ama pehe.

¹⁷ Apeŋgeŋgik addəv bəlay addoŋ dəgar ki pehe a Kafarnahum. Guzli agəɗək səkay ya Yesu dəɓəl əzzan azet tagay ɓa.

¹⁸ Barkataŋ gədak asilke pehe aɓəlka.

¹⁹ Aŋkoroŋguk zəga na kilometər sle' də sləre, awlanənək Yesu tay ədaw aka pehe əzzan əgap aza bəlay, geslne armeke.

²⁰ Yaŋ Yesu aɓsit na: Intə, kədawgeslne'eŋ ɓa.

²¹ Aŋglaŋ əslan addəv bəlay, ya bəlay gap ləŋ a mabuzgum a təki məs adoddoŋgu.

Vanday tay əkayanən Yesu

²² Vit pumpum nani vanday dəmbər dəgar ki pehe dədaka, awlak na bəlay maɓɓan tay adak abbər kiyət taka kəs ɓa, Yesu dəpeŋ addəv bəlay dit gewleɗ nan ɓa, net takərgit addoŋgu.

²³ Ya bəlayɗe memeɗeŋge meɓɓet azzoŋguk sə Tiberiyas, go'o də təki məs azəmaŋ way dərɓaga Daya agəɗ soko akan naka.

²⁴ Adan vanday awla na Yesu tay adak ɓa, gewleɗ nan ɓa na, ndəɗaŋ addivit bəlayɗe nek peŋ azzoŋ a Kafarnahum əkayan Yesu.

Yesu, mepteke na zeŋgile

²⁵ Adan arəhən dəgar ki pehe, aɓsənən na: Mərbəzəga na dewe kəde aŋ di?

²⁶ Yesu azlan siti amna: Gesiŋ gesiŋ nədawnah sukum: Kədawkayawən na vi kulaŋ sekene yi ɓa vi kəzəmaŋ way kəbaŋgi.

²⁷ Kədaɗɗaŋ wəza vi zəga nawzəm məs naŋgənaŋ ɓa, məgəɗ wəza vi zəga nawzəm an na zeŋgile an faɗə məs Wətən Ɗəf adapsukum. Vi anani Maŋgəlva Afən aɗi van akani.

²⁸ Yaŋ anah sənən na: Mi mədaɗɗa ka məɗɗegin wəzeɗe na Maŋgəlva di?

²⁹ Yesu azlani, aɓsit na: Wəza an Maŋgəlva aŋgəl ndən yaŋka: Kətafəngən ɗəf məs aslənə.

³⁰ Ndəni anah sənən na: Sekene awani kədaɗɗa mulagən vi mətafkugən di? Wəza awani kədaɗɗa di?

³¹ Efiŋgiɗim azəmaŋgək manhu a kapta-muyã, va məverin: Mepteke dəde sə disiŋ apsit nawzəma.

³² Yesu azlan sitik na: Gesiŋ gesiŋ nədawnah sukum: Moyis dəpsukum mepteke məs dəde sə disiŋ ɓa, Afu dəpsukum mepteke an gesiŋ məs dəde sə disiŋ dərəŋgə.

³³ Vi mepteke na Maŋgəlva, ndəni məs dəde sə disiŋ, tay əpsən zeŋgile sən dələv pakə.

³⁴ Yaŋ aɓsənən kan na: Daya asna apsəm zev mepteke van pay pakə.

³⁵ Yesu aɓsit na: Intə mepteke na zeŋgile. Ɗəf dəde azaw pak mãy adana ɗah ɓa. Ɗəf dətafu pak meme adanən na ɗah ɓa.

³⁶ Ya in tat ənah sukum əmpa: Kuluwənka də as pak kətafwən ɓa.

³⁷ An məs Afu avay pakə, wade azawa. Ɗəf dəde azaw pak nəzgan na appaka kpak ɓa.

³⁸ Nəprik sə disiŋ ka kaɗɗa an məs nəŋgəl ɓa, vi kaɗɗa əŋgla na ɗəf məs dəslənwi.

³⁹ Aŋki əŋgla na məs dəslənwa: An məs avay pak nədawzan ɓa, ya nəsilgingən səka əmta pay əgrak dələva.

⁴⁰ Vi aŋki əŋgla na Afuwa: Ɗəf dula Wətən Ɗəfa gəm dətaf pak, dərah zeŋgile faɗə, wanəsilgin səka əmta pay əgrak dəlva.

⁴¹ Ndəni mə Yudeɗ aɗɗaŋ wərwər akan vi anah na: Intə mepteke məs dəde sə disiŋ.

⁴² Anahaŋgək na: Namna aŋ van Yesu wətən Yosef məs məsən afəni gəm mani ɓa sa? Mbar kakaŋ adawnəh na sə disiŋ nəpriki di?

⁴³ Yesu azlani aɓsit na: Məppan wərwər awalaŋ zukum.

⁴⁴ Ɗəf tay nawɓap əzzan azaw an Afu məs dəslənu dəki ɓa ɓa. Naw wanəsilgən səka əmta pay əgrak dəlva.

⁴⁵ Məverni addivit məskəleŋɗe na: Maŋgəlva wayeget pakə. Ɗəf dəprəm məs dəde səza Afu gəm dəyak pak, wade azawa.

⁴⁶ Ɗəf tay dula Afən ɓa, abbər məs dəde səza Maŋgəlva yi, ndən dula Afəni.

⁴⁷ Gesiŋ gesiŋ nədawnah sukum: Ɗəf dətaf pak, arahək zeŋgile faɗə.

⁴⁸ Naw, intə mepteke na zeŋgile.

⁴⁹ Efiŋgiɗkum azəmaŋgək manhu a kapta-muyã, də as pak amtaŋka.

⁵⁰ Aŋki mepteke məs dəde sə disiŋ, ɗəf məs dəzəm na amtə ɓa.

⁵¹ Naw intə mepteke madarani, məs dəprik sə disiŋ. An ɗəf azəmək mepteke nani, wasan madaran faɗə. Mepteke məs nədapsən ɗəfa, gəɓa zuwi. Nəpsən na vi dələv dəsangən madaran.

⁵² Əpelis asilgənək wəbay ma aweleŋgit mə Yudeɗ dawnəh na: Mbarmbari ɗəfəŋ adawɓap əpsəm gəɓa zən ka zəga nawzəm di?

⁵³ Yesu azlani, aɓsit na: Gesiŋ gesiŋ nədawnah sukum: An kəzəmən gəɓa zə Wətən Ɗəf ɓa, an kəsaŋ mbel nan ɓa, mənokum tat də zeŋgile addəvkum ɓa.

⁵⁴ Ɗəf məs dəzəm gəɓa zuwa gəm məs dəsə mbel nawa, arahək zeŋgile faɗə, wanəsilgin pay əgrak dəlva.

⁵⁵ Vi gəɓa zuwa ndəni zəga nawzəm an gesiŋ, mbel nawəŋ zəga nawsa an gesiŋgi.

⁵⁶ Ɗəf dəzəm gəɓa zuwa, dəsə mbel nawa wasap addəvwa, in addəvni.

⁵⁷ Va Afən məs dəslənu asan madarani, madaraw nənan vi Əbba. Ya ɗəf dəzəmwa nan pak wasan madaran viwa.

⁵⁸ Aŋki mepteke məs dəprik sə disiŋ. Vaŋki an məs efiŋgiɗkum azəmaŋ ɓa, amtaŋka. Ya ɗəf dəzəm mepteke aŋkəŋka wasan madaran faɗə.

⁵⁹ Apel zəgeɗis na dawyeget ɗiy addəv gəla nakkal net mə Yudeɗ a Kafarnahumi.

Əpel na zeŋgile an faɗə

⁶⁰ Səza aprəmən əpel nani, ɗiy diyɗa sə walaŋgit gewleɗ nan aɓɗaŋ na: Əpeləs ɓəli. Naway naɓap əprəmən di?

⁶¹ Yesu asənək na gewleɗ nan tay əseske'eŋ aka wənəska, aɓsit na: Asanək ka zəga nazbərgukum sa?

⁶² Mbari kan an kulanənək Wətən Ɗəf tay əpeŋ a təki məs asan far di?

⁶³ Əmpəs iyi məpsən zeŋgile sən ɗəfa, gəɓa zə ɗəfa tay an adawtər ɓa. Əpel məs nəpel sukuməŋka, ndəni Əmpəsa gəm zeŋgile.

⁶⁴ Ya ɗiy meɓɓet sə walaŋkum, tahəŋ məs dətafaŋ ɓa. Vi təŋ səka ətəŋ nani Yesu asənək na mədəŋgaŋ atafnən na ɓa di gəm ɗəf an nawzəm kini.

⁶⁵ Anahək əmpa: Vi vaski nədawnah sukum na, ɗəf aɓap na əzzan azaw an Afən dəpsən tive nan ɓa ɓa.

⁶⁶ Təŋ dəpaski ɗiy diyɗa səmmbet gewleɗ nan amndoŋ dirɓe, appanən əzbani.

⁶⁷ Yaŋ Yesu anah sit maslən nan kəlaw kiyit sula: Nokum pak mokum aka əmbat sa?

⁶⁸ Simoŋ Piyer azlan sən na: Daya aza nawa mədaddam di? Istə də əpel na zeŋgile an faɗə.

⁶⁹ Ya namə, mətafəka, məsənək na nok istə Salala məs dəde səza Maŋgəlva.

⁷⁰ Yesu aɓsit na: Intə nəwelkum kəlaw kikum sula ɓa sa? Ya taka sə walaŋkum Satan iyi.

⁷¹ Apel vasna aka Yudas wətən Simoŋ Iskariyot iyi. Vi ndəni nawzəm kini, ndən məs naret kəlaw kiyit sula naka.