Yohanna 4 - Bible en Guidar

Yesu dət guluk sə Samari

¹ Adan Yesu asən na Farisaɗe aprəmən na Yesu tay ərəh gewleɗi gəm tay əɗɗa baptem day ki Yohanna,

² gesiŋ nan na, Yesu sən kiyən aɗɗa baptem ɓa, gewleɗ nanəngə,

³ ndən zar sə Yude amndan a Galile,

⁴ ya toŋsa də Samari yi.

⁵ Agapək a walaŋgəla-metiŋ na Samari məs adawyaŋ na Sikar, go'o də təki məs Yakob apsən Yosef wətəni.

⁶ Vov net iŋkile na Yakob tay adaka. Yesu ayək də ədaw malaka, ndən ɗew ama vov net iŋkile vani. Wagəɗ aza tataŋ paya.

⁷ Guluk sə Samari pay əmbaɗ iŋkile, Yesu aɓsət na: Avay iŋkile nawsa.

⁸ Vi gewleɗ nan ambataŋgək a walaŋgəla-metiŋ kalbəh zəga nawzəma.

⁹ Guluk mə Samariyək vat təɓsən na: Mbari is mə Yuda kədaŋgla iŋkile nawsa avaw in guluk mə Samariyək di? Vi mə Yudeɗ dəŋglaŋ zəga an nawsepet dit mə Samariɗe ɓa.

¹⁰ Yesu azlani, aɓsət na: Va kəsənək əvəl na Maŋgəlva, gəm ɗəf məzunah suk na avay iŋkile nawsaŋ na, istə dərəŋ kədaŋgla, kəta wapsuk iŋkile na zeŋgile.

¹¹ Guluk nak təɓsən na: Daya, zəga nawmbaɗ iŋkile tay avok ɓa, vov net iŋkile van fətəkfətəki; səŋga kan kədawrəh iŋkile na zeŋgile vetis di?

¹² Hara nok akəsok day ki afəm Yakob məs dəpsəm vov net iŋkile, məs ndən sən kiyən asə səddəvən kirtini gəm zəgeɗ memeyẽɗ nanəŋ sa?

¹³ Yesu azlani, aɓsət na: Ɗəf dəsə iŋkile eŋkiŋki, meme wadannə'e.

¹⁴ Ya ɗəf dədawsa iŋkile məs nədapsəni meme adanən na kpa' ɓa hã faɗə. Iŋkile məs nədapsəniŋki, wakkpaŋgaŋ heret iŋkile miyma na zeŋgile an faɗ nzõhõ.

¹⁵ Guluk nak təɓsən na: Daya avay iŋkile vetiski, vi meme adawduwən ɗah əmpa gəm nədazzaw aŋ əmbaɗ iŋkile ɓa.

¹⁶ Yesu aɓsət na: Dok aya zəlko, Kədegən aŋka.

¹⁷ Guluk nak təzlanəka, təɓsən na: Zəlu tay ɓa. Yesu aɓsət na: Gesiŋ kənah na zəlu tay ɓaŋka.

¹⁸ Vi kəgəmək zel sle, an məs kəsok ammban kakaŋkəŋka zəlkuy ɓa. Eske na gesiŋ kənahə.

¹⁹ Yaŋ guluk nak təɓsən na: Daya, in ulan na məskəleŋ kənani.

²⁰ Efiŋgiɗim aka mossorgo metiŋgiŋki agagdakanən Maŋgəlva, ya nokum munokum ənəh na a Yerusalem iyi təki nawgagdakan Maŋgəlva asani.

²¹ Yesu aɓsət na: Ɗakə, arma an nədawnah suko: Pay wade, an məs kəgagdakanən na Maŋgəlva aka mossorgo metiŋgiŋ ɓa, a Yerusalem ɓa.

²² Nokum, munokum tat əgagdakan an məs kəsənnən ɓa, ya namə, mənam tat əgagdakan an məs məsənə, vi əkõh səzet mə Yudeɗ ade.

²³ Ya pay tay əzzani, tay kakaŋ səkay, an məs məgagdakanən Maŋgəlva də təstəs adawgagdakanən Afən addəv Əmpəsa gəm də gegesiŋ. Vi zeŋvit məgagdakanən vas Afən adawkeyeti.

²⁴ Maŋgəlva Əmpəsi, ɗiy məgagdakanən dəgagdakanən də Əmpəsa gəm də gegesiŋ.

²⁵ Guluk nak təɓsən na: Nəsənka Mesiya wade an məs adawyaŋ na Kristu. An adeke, warban zəga pakə.

²⁶ Yesu aɓsət na: Intə məzupel sukuŋka.

²⁷ Aka əpeləski gewleɗ nan agapaŋgə. Aggətaŋka vi awlanən əpel dət gulku. Də as pak ɗəf dənah na: Mi kədawkayan di awaniɓa aka mi kədawpel dəndət di ɓa?

²⁸ Guluk nak mbagən hinziw nata, təmbat a walaŋgəla-metiŋ, tənah sit ɗiy na:

²⁹ Məde, mula ɗəf yana məs dənah su zəgeɗ an məs nəgəɗ pakə. Kristu yi soko?

³⁰ Ɗiy agulyoŋguk sə walaŋgəla-metiŋ, ambataŋgək azani.

³¹ Pay nani gewleɗ tay əzəmaŋ sahã ammban dawnah sən na: Mərbəzəga, azəmə.

³² Yaŋ aɓsit na: Naw, in tat də way nawzəm məs nokum kəsənnən ɓa.

³³ Ndəni gewleɗ anahaŋ a walaŋ zit kan na: Ɗəf tay dəki sən əzəm sa?

³⁴ Yesu aɓsit na: Way nawa, ndəni əɗɗa əŋgla na məs dəslənwa gəm əɗɗa wəza nani.

³⁵ Mənokum vat kawnahaŋ na, apələk təla poɗo əmpa əbəl dəgapgəni ɓa sa? Yaŋ na, naw in tat ənah sukum, məslan horokum, mule gulyeŋge barəŋ nawtaw səkay.

³⁶ Məzubəl tay ərəh əfaɗ nani, tay əkkalan zəga na mabardaw na zeŋgile nasa faɗə, vi məzəslga də məzubəla wannekenən zit matakə.

³⁷ Vi an adawnahaŋgən na gesiŋ: Məzəslga temme, məzəkkalan temme.

³⁸ Naw nəslənkumək əbəl an məs dəyokum ɓa, ɗiy mbirit dəyaŋgə ya nokum addəv iya net nak kədawndəreheŋgi.

³⁹ Mə Samari na walaŋgəla-metiŋ van diyɗa atafənək Yesu. Vi əpel nat guluk nak məs tənah na: Anah suwək an məs nəgəɗ farfar pakə.

⁴⁰ Adan mə Samari vet azzoŋ aza Yesu, assohõnənək dəsangən dənɗaŋ. Yaŋ asan adak pay sula.

⁴¹ Ɗiy vadaysa əmpa atafənək Yesu vi əpel nani.

⁴² Aɓsətən guluk nak na: Sən əpel noki kaka mətaf ɓa, vi məprəmək əpel nan mənam sən kiymə, məsənək na, ndəni məkõhgən dələv gesiŋ.

Yesu tay əmbəlgən wətən ɗəf gagdaka

⁴³ Dərɓaga əvoŋ sula na, Yesu vit sədak al a Galile.

⁴⁴ Yesu sən kiyən anahək na: Məskəleŋ awrah gagdak aka dələv nan ɓa.

⁴⁵ Adan agap a Galile, ɗiy nadak atafənək moggoni, vi awlanənək an məs agəɗ a Yerusalem pay wəzləra, vi net pak addoŋguk a wəzləra vani.

⁴⁶ Yaŋ Yesu amil a Kana na Galile, a təki akkpaŋget iŋkile ka mbazla. Ɗəf gagdak na məlĩ tay adak məs wətən gbəgba' a Kafarnahum.

⁴⁷ Adan aprəm na Yesu adek sə Yude a Galile, ndən tek azani, akkaman dəprikgin əmbəlgən wətən məs ama əmta.

⁴⁸ Yesu aɓsən na: An kulaŋ zəga naggət akan gəm sekene kpak ɓa na, kawtafaŋ ɓa.

⁴⁹ Ɗəf gagdak nak aɓsən na: Daya aprik tak wətu dəmtə ɓa.

⁵⁰ Yesu aɓsən na: Doko, wətuk madarani. Ɗəf nak atafək əpel məs Yesu anah səni, ndən tive gəmə.

⁵¹ Aka adawpirken əmilyeni, belemɗe nan pay ələm sən dawnah sən na wətən madarani.

⁵² Yaŋ assohẽt pay an məs arah dəɗah akani, aɓsənən kan na: Nafɗaŋga də pay vuroki gamba appani.

⁵³ Yaŋ afən aɗɗumon na, aka pay vanəski Yesu anah sən na: Wətuk madarani naka. Ndəni ataf Yesu də gəla nan pakə.

⁵⁴ Ndəni sekene masula'ən məs Yesu agəɗ səza agil sə Yude hã gap a Galile.