Yohanna 3 - Bible en Guidar

Yesu də Nikodem

¹ Ɗəf maɓɓan tay səret Farisaɗe, iya nan na Nikodem Daya net mə Yudeɗi.

² Adek aza Yesu də dəfɗa, aɓsən na: Rabbi, məsənək na istə mərbəzəga dəde səza Maŋgəlva, vi ɗəf tay naɗɗa sekeneɗ va kədaɗɗetiŋ an Maŋgəlva tay dəndən ɓa ɓa.

³ Yesu azlanəka, aɓsən na: Gesiŋ gesiŋ nədawnah suko: Ɗəf aɓap na ula məlĩ na Maŋgəlva an muwani masula'ən ɓa ɓa.

⁴ Nikodem aɓsən na: An ɗəf agalək na mbari adamsak uwanən əmpa di? Waɓap əmndan addəvət man, kawan masula'ən sa?

⁵ Yesu azlanəka: Gesiŋ gesiŋ nədawnah suko: An muwani ɗəf dit iŋkile gəm də Əmpəs ɓa, aɓap na ətoŋ məlĩ na Maŋgəlva ɓa.

⁶ An muwan də ɗəfa ɗəfi, an muwan də Əmpəsa əmpəsi.

⁷ Kədaggət vi nənah suk na: Aslək dəwəkungən masula'ən ɓa.

⁸ Səmyã tay əɓla a təki məs aŋgəl pak is tat əpprəm ɓaɓəlmani, ya kawsənən na səŋga ade di awaniɓa aŋga adaddan di ɓa. Vaski an muwan də Əmpəsa.

⁹ Nikodem azlanka, aɓsən na: Mbarmbar zəga vas adaɗɗa di?

¹⁰ Yesu azlanka, aɓsən na: Is mərbəzəga na Israyel na kəsin zəgeɗis ɓa sa?

¹¹ Gesiŋ gesiŋ nədawnah suko, nam mənam tat əpel an məsənə, mənam tat əpel aka an məwələ, ya də as pak kətafən əpel nam ɓa.

¹² An nədawpel sukum wən net zəgeɗ naka dəlvafuŋ ya kətafən ɓa, mbari kədawtafən an nəpel sukumək wən net zəgeɗ na disiŋ di?

¹³ Ɗəf tay dəpeŋ a disiŋ ɓa abbər ki an məs dəprik sə disiŋgi ɓa ɓa, Wətən Ɗəfa.

¹⁴ Va Moyis alaw dohõ na təbəz a kapta-muyã, vaski adalawən Wətən Ɗəfa.

¹⁵ Vi ɗəf an dətaf pak dərahgən zeŋgile an faɗə.

¹⁶ Vi vaski Maŋgəlva aŋgluwək dəlva. Ndəni apsən Wətən an karmalay. Vi ɗəf məs dətaf pak adawza ɓa, dərahgən zeŋgile an faɗə.

¹⁷ Maŋgəlva dəslən Wətən aka dələv ka dətawgən wən aka dələv ɓa, ya vi dələv dərahgən əkõh dəndəni dərəŋgə.

¹⁸ Ɗəf məs dətaf pak wən dərma ɓa. Ya ɗəf məs dətaf ɓa wən armak səkay vi dəɗi ətaf nan aka iya na Wətən Maŋgəlva karmalay ɓa.

¹⁹ Aŋki ətawwən vani: Əkeɗeɗe adek aka dəlva, ya ɗiy naka dələv aŋgluwənək guzli day ki əkeɗeɗe'e vi wəzeɗe net assoŋ mbəreyti.

²⁰ Vi ɗəf məgəɗ mambray pak tay əzel əkeɗeɗe'e, ade na ara əkeɗeɗe ɓa, vi wəzeɗe nan adarbaŋ ɓa.

²¹ Ya ɗəf məgəɗ moggon pak tay əzzan ara əkeɗeɗe'e vi wəzeɗe nan dərbaŋgən appaka na də Maŋgəlva aɗɗe.

Yesu də Yohanna məgəɗ Baptem

²² Dərɓeget zəgeɗiski, Yesu pay dit gewleɗ nan aka dələv na Yuda. Asanək adak dənɗaŋ, agəɗək baptem sit ɗiyi.

²³ Yohanna tam agəɗ sitik baptem sit ɗiyi a Aynon, go'o də Salim, vi iŋkile tahəŋ adak diyɗa. Ɗiy tay əmbataŋ azani, tay əgəɗ sit baptem.

²⁴ Vi mərmani Yohanna a fərsəna tagay ɓa.

²⁵ Yaŋ kan əbay ma agəɗək a walaŋgit gewleɗ na Yohanna dit mə Yudeɗ aka wən na əbburo.

²⁶ Ndəɗaŋ mbat aza Yohanna, aɓsənən na: Mərbəzəga, ɗəf məs dəsan də is dəgar ki Yurdeŋ məs kəpel wən nan naka, yaŋ na, nan pak tay əɗɗa baptem, ɗiy pak əddoŋ azani.

²⁷ Yohanna azlanəka, amna: Zəga tay ɗəf adawrəh təttaka dayday an sə disiŋ məpsən ɓa ɓa.

²⁸ Munokum sən kikum tə miziwe naw nənah na: Naw Kristu nan ɓa, intə məs məslənu abani.

²⁹ Ɗəf məs dəɓel gulku, ndəni zilta. Ya bayna na məs dəɓeli, tay ziwwe əprəmən də ənneke, tay zən nek də wəla məs dəɓeli. Vaski kan ənnek naw gərakə.

³⁰ Nan dəɓayə, naw nəmndaw dirɓe.

Ɗəf məs dəde sə disiŋ

³¹ Ɗəf məs dəde sə disiŋ ndəni aka zəga pakə. Ɗəf naka dəlvafuŋ ɗəf na dəlvafuŋgi, wən na dəlvafuŋ adawpele. Ɗəf məs dəde sə disiŋ ndəni aka zəga pakə.

³² An məs awələ də an məs aprəmə, anani adawpele, ya ɗəf tay dədawtaf əpel nan ɓa.

³³ Ɗəf dətaf əpel nan pak asənək na Maŋgəlva gesiŋgi.

³⁴ Vi ɗəf an Maŋgəlva aslənə, əpel na Maŋgəlva adawpele vi apsənək Əmpəs nan meza meŋge ɓa.

³⁵ Afən aŋgluwək Wətəni, apsənək zəga pak ammba vani.

³⁶ Ɗəf məs dətaf Wətən pak tay də zeŋgile nassa faɗ səkayə. Ɗəf məs dəppan makran sən Wətən ɓa pak, awla na zeŋgile ɓa, ya ədagədəv na Maŋgəlva tay akani.