Yohanna 21 - Bible en Guidar

Əgrakən: ərba məs Daya arban zən əmpa a Galile ( 21:1-25 ) Yesu tay ərban zən azet gewleɗ buhul

¹ Dərɓaga aska Yesu arbanək zən əmpa azet gewleɗ a pehe na Tiberiyas. Vaŋ arban zəni:

² Simoŋ Piyer, Tomas məs adawyaŋ na meseŋge, Natanayel na Kana'an na Galile, kirtin Zebede gəm sula səret gewleɗ nan meɓɓet tahəŋ matakə.

³ Simoŋ Piyer aɓsit na: Wanəmbat ərma kilfi. Aɓsənən na, nam pak waməl də isi. Ndəɗaŋ vit apeŋgeŋ addəv bəlay. Ya dəfəɗ nan dəpaska, zəga tay armaŋ ɓa.

⁴ Adan bapummo agəɗə, Yesu aziwik ama busgum, ya gewleɗ dəsənən na Yesu yi ɓa.

⁵ Yaŋ Yesu aɓsit na: Kirni mənokum tat də zəga nawzəm siɗikke ɓa sa? Azlan sənən na: Awwo.

⁶ Aɓsit na məzgan zəva dəka dəzəŋ na bəlay wakərəhaŋ. Ndəɗaŋ firik əzgan kana, ya dəɓap əkdəhnən ɓa sən kilif tahəŋ diyɗa.

⁷ Yaŋ gawla məs Yesu aŋgəl nak aɓsən Simoŋ Piyer kan na: Daya yi. Adan Simoŋ Piyer aprəm vaska, ndən lukut azan heri, vi zən mekeleŋgi, azlah aret iŋkile.

⁸ Gewleɗ meɓɓet azzoŋguk də bəlay muzliya, vi kakdəh zəva məknəhən dit kilif naka adan faraɗaŋ sə mabuzgum ɓa, wagəɗ zəga na metər səkatə.

⁹ Adan apurkoŋ afuŋgu, awlaŋgək slay offo ta' də kilif akani gəm mepteke.

¹⁰ Yesu aɓsit na: Məki kilif məs kərmaŋ kakaŋ van siɗikke.

¹¹ Simoŋ Piyer peŋ kan addəv bəlay, akdəh zəva afuŋ, məknəhən dit kilfeŋge gugriɗ gugriɗ səkat də kaklaw sle kiyit hoku. Də assoŋ gbaskəska, zəva dəŋgar ɓa.

¹² Yesu aɓsit na: Məde məzəm waya. Tay dəda kiyən səret gewleɗ nan əssohon na: Nawa kənan di ɓa? Vi asənənək na Daya yi.

¹³ Yesu payə, agəm mepteke, apsiti vas agəɗ dit kilfi'e.

¹⁴ Təl mohokon yas Yesu arban zən azet gewleɗ nan səza asil sə waleŋgit ɗiy mimtiti.

Yesu də Piyer

¹⁵ Dərɓaga azəmaŋ kana, Yesu aɓsən Simoŋ Piyer na: Simoŋ wətən Yohanna, kəŋgluwək dayki ɗiy eŋ sa? Aɓsən na: Daya kəsənəka nəŋglukuko. Yesu aɓsən na ateɗ kirtit timiŋgiɗ nawa.

¹⁶ Yaŋ anah sən təl masula'ən, aɓsən na: Simoŋ wətən Yohanna, kəŋgluwək sa? Azlanəka: Kəsənəka nəŋglukuko. Yesu aɓsən na: Assok məzutaɗa net timeŋgiɗ nawa.

¹⁷ Anah sən təl mohoko'ən əmpa, aɓsən na: Simoŋ wətən Yohanna, kəŋgluwək sa? Piyer asanək man ɓəɓiɓəɓi, vi anah sən təl mohoko'ən na: Kəŋgluwək sa? Azlan sənək na: Daya zəga pak nok kəsənəka, nok kəsənək na nəŋglukuko. Yesu aɓsən na: Ateɗ timeŋgiɗ nawa.

¹⁸ Gesiŋ gesiŋ nedawnah suko: Aka kəsok gawla, is kədaynan dadakko, is əddok a təki kəŋgələ. Pay kədawgala, wakəppar voko, ɗəf maɓɓan naynan suk dadakko, wakuk a təki məs kəŋgəl kəta ɓa.

¹⁹ Anah vasna vi karban na də əmta awani Piyer adawgagdakan Maŋgəlva di. Səza apel vaska aɓsən na azbawa.

Yesu də gawla məs aŋgələ

²⁰ Piyer kpaŋgən harani, awla gawla məs Yesu aŋgəl nak əzzan dərɓagani, ndəni dəsan a maŋgava Yesu aka adawzəmaŋgə, assohõn na: Naway nawzəm kiyuk di naka?

²¹ Adan Piyer awla, aɓsən Yesu na: Daya, na ɗəf aŋ mbari di?

²² Yesu aɓsən na: An nəŋgələk dəsangən məza əmta ɓa hã pay gap əmilye naw na, mi nok di? Nok azbawa.

²³ Wən nan atrayək a waleŋgit məzutafaŋ na: Gawlas amtə na ɓa. Ya Yesu dənah sən na amtə na ɓa ɓa. Ya aɓsən na: An nəŋgələk dəsangən hã gap əmilye naw na, mi nok di?

²⁴ Gawla vanəski dəpel aket zəgeɗiski, dəvere, məsənək na əpel nan gesiŋgi.

²⁵ Yesu agəɗək wəzeɗe meɓɓet diyɗa. Va məverti taka taka na, in əɗɗumun na, mamba dələv wagəs natef ɗerewelɗe məverit veti.